Swali hilo huzuka kwa sababu Yesu alimwahidi uhai katika Paradiso yule mhalifu aliyeuawa pamoja naye. Alisema hivi: “Kwa kweli mimi nakuambia leo, Utakuwa pamoja nami katika Paradiso.” (Luka 23:43) Ona kwamba Yesu hakutaja mahali ambapo Paradiso ingekuwa. Hivyo basi, je, Yesu alimaanisha kwamba yule mtenda-maovu angekutana naye mbinguni?

Kwanza, acheni tuchunguze kama mtenda-maovu huyo alistahili kuishi mbinguni. Wanadamu wenye tumaini la kimbingu wamebatizwa katika maji na kwa roho takatifu na hivyo ni wanafunzi wa Yesu waliozaliwa kwa roho. (Yohana 3:3, 5) Ni lazima pia wafuate viwango vya Mungu vya maadili na kuonyesha sifa kama vile unyoofu, utimilifu, na huruma. (1 Wakorintho 6:9-11) Pia, lazima wabaki washikamanifu kwa Mungu na Kristo mpaka mwisho wa maisha yao duniani. (Luka 22:28-30; 2 Timotheo 2:12) Wakitimiza matakwa hayo tu ndipo wanaweza kuonyesha kwamba wanastahili kufufuliwa na kupewa wajibu mkubwa unaowasubiri mbinguni, yaani, kutumika wakiwa makuhani na wafalme pamoja na Kristo juu ya wanadamu kwa miaka elfu.—Ufunuo 20:6.

Kinyume cha hilo, mhalifu aliyekuwa kando ya Yesu aliishi na kufa akiwa mhalifu. (Luka 23:32, 39-41) Ni kweli, alionyesha heshima alipomwambia Yesu: “Unikumbuke utakapoingia katika ufalme wako.” (Luka 23:42) Hata hivyo, hakuwa amebatizwa, hakuwa mwanafunzi wa Yesu aliyezaliwa kwa roho, wala hakuwa ameweka rekodi nzuri ya maadili na uaminifu. Je, inapatana na akili kwa Yesu kumwahidi ufalme wa kimbingu pamoja na wafuasi wake waaminifu, ambao wameonyesha utimilifu?—Waroma 2:6, 7.

Kwa mfano: Ikiwa mtu aliyekuibia pesa anakuomba msamaha, unaweza kuamua kutomdai pesa hizo. Lakini je, utamwamini asimamie biashara yako au kutunza familia yako? Unaweza kuwapa daraka hilo wale tu unaowaamini zaidi. Vivyo hivyo, lazima wote wanaopewa tumaini la kuishi mbinguni wathibitishe kabisa kwamba watatetea viwango vya haki vya Mungu watakapotawala wanadamu. (Ufunuo 2:10) Ingawa yule mtenda-maovu alimsihi Yesu kwa unyoofu, hakuthibitisha ushikamanifu wake.

Lakini je, Yesu hakumwambia yule mtenda-maovu kwamba angekuwa naye mbinguni siku hiyohiyo? Haingewezekana kwa kuwa Yesu mwenyewe hakuingia mbinguni siku hiyo. Badala yake alikaa “katika moyo wa dunia,” yaani, kaburini kwa siku tatu. (Mathayo 12:40; Marko 10:34) Hata baada ya kufufuliwa, alikaa duniani siku 40 kabla ya kupaa mbinguni. (Matendo 1:3, 9) Hivyo, yule mtenda-maovu hangekuwa na Yesu mbinguni siku hiyo.

Hivyo basi, yule mtenda-maovu angeingia katika Paradiso gani? Baada ya kufufuliwa, ataishi katika dunia Paradiso ambayo itatawaliwa na Yesu. (Matendo 24:15; Ufunuo 21:3, 4) Ili ujifunze mengi kuhusu Paradiso hiyo na yale ambayo Mungu anataka, zungumza na mmoja wa Mashahidi wa Yehova.