Kwa zaidi ya miaka kumi, vigari vya machapisho vimekuwa sehemu ya huduma yetu inayovuta uangalifu wa watu. Ulimwenguni pote, vigari hivyo vinatambuliwa kwa urahisi. Ni vya kipekee na rahisi kutumia. Huenda ukakubaliana na Dada Asenata anayeishi nchini Poland, anayesema hivi: “Vigari hivyo vina muundo usio na mambo mengi lakini vinavutia sana. Ni rahisi kuunganisha na kutumia.”

 Je, umewahi kujiuliza vigari vilibuniwa jinsi gani?

 Mwaka wa 2001, baada ya kupata kibali cha Baraza Linaloongoza, ndugu na dada zetu nchini Ufaransa walianza kujaribu mbinu mbalimbali za mahubiri ya hadharani, kutia ndani kutumia vigari. Walijaribu miundo mbalimbali. Kwa mfano, walibadili masanduku ya kupakia nguo na toroli za madukani ili wazitumie kuonyesha na kuhifadhi machapisho. Hatimaye, ofisi ya tawi ya Ufaransa ilichagua muundo mmoja ambao wahubiri walitumia kwa miaka mingi.

 Akina ndugu nchini Ufaransa walipata matokeo mazuri sana katika mahubiri ya hadharani. Kwa hiyo, mwaka wa 2011, Baraza Linaloongoza liliidhinisha programu ya majaribio ya mahubiri ya hadharani New York City, Marekani, wakitumia vigari na meza. Mapainia waliohusika katika programu hiyo walitambua upesi kwamba vigari hivyo vilikuwa na faida kubwa. Mojawapo ya faida hizo ni kwamba ilikuwa rahisi kuvihamisha. Pia, mapainia hao walitoa mapendekezo mazuri ya jinsi ya kuboresha muundo wa vigari hivyo. Vigari vya awali vilivyotengenezwa kwa mkono kwa kutumia mbao vilikuwa vizito, na ilikuwa vigumu kuvishusha na kuvipandisha kwenye ngazi. Kwa hiyo, viliundwa upya ili viwe vyepesi zaidi, lakini si vyepesi kupita kiasi ili visiangushwe na upepo. Muundo huo mpya ulitia ndani magurudumu makubwa zaidi na yanayoweza kuhimili mshtuko, jambo ambalo lingefanya iwe rahisi kuvivuta kwenye vijia ambavyo si tambarare. Mbali na hilo, sanduku dogo liliongezwa ili kuhifadhi machapisho ya ziada.

 Programu hiyo ya majaribio ilifanikiwa! Kwa hiyo, katika mwaka wa 2012, Baraza Linaloongoza liliidhinisha vigari vya machapisho vitumiwe ulimwenguni pote. Mipango ilifanywa ili kampuni fulani itengeneze vigari vingi sana kwa kutumia vifaa vyepesi lakini vinavyodumu.

 Kadiri miaka ilivyopita, mabadiliko madogo-madogo yalifanywa kwenye vigari hivyo. Kwa mfano, mwaka wa 2015, kifuniko cha mvua kilicho na plastiki upande wa mbele kiliongezwa. Dina, anayeishi nchini Georgia, anathamini sana kifuniko hicho. Anasema hivi: “Kigari hicho kina ‘koti lake la mvua’ ili kulinda machapisho.” Mwaka wa 2017, mabango ya sumaku yalitengenezwa katika lugha kadhaa. Tomasz, ndugu nchini Poland, anasema hivi: “Ilikuwa kazi kubwa kubadilisha mabango ya awali kwa sababu tulitumia gundi kuyaunganisha. Mabango ya sumaku yalitatua tatizo hilo.” Katika mwaka wa 2019, mabadiliko ya ziada yalifanywa katika vifaa na muundo wa vigari hivyo ili kuvifanya vidumu kwa muda mrefu zaidi.

 Vigari vya machapisho vinatengenezwa na kampuni fulani kisha vinasambazwa ulimwenguni kote. Kwa sasa, kigari kimoja kinagharimu dola 43 za Marekani, bila kuhesabu gharama za usafirishaji na gharama nyingine. Kufikia leo, zaidi ya dola milioni 16 za Marekani zimetumiwa kutengeneza vigari, na zaidi ya vigari 420,000 vimesambazwa kwa makutaniko ulimwenguni pote.

 Ili kutumia michango kwa njia bora, vigari vya machapisho huagizwa kwa jumla. Mbali na hilo, sasa makutaniko yanaweza kuagiza vifaa vya kurekebisha vigari walivyo navyo badala ya kuagiza kigari kipya.

 Wahubiri ulimwenguni pote wanafurahia kutumia vigari vya machapisho. Martina, nchini Ghana, anasema hivi: “Katika aina nyingi za huduma yetu, sisi ndio tunaowafikia watu. Lakini ninachopenda kuhusu mahubiri ya vigari ni kwamba watu ndio wanaotufikia. Hata wapita-njia wanapata ushahidi.”

 Katika nchi nyingine ya Afrika, mwanamume fulani alifika kwenye kigari kujipatia machapisho katika lugha yake. Alirudi juma lililofuata na kusema: “Nimesoma machapisho yote. Habari hiyo ni muhimu sana. Nitawapelekea watu wa familia yangu kule kijijini.” Kijiji chao kilikuwa umbali wa kilomita 500. Miezi miwili baadaye, alirudi na kusema: “Watu katika kijiji changu walisoma machapisho yote, na walifurahia sana habari hiyo. Wanataka kuwa Mashahidi wa Yehova lakini wana maswali. Kwa mfano, wanaelewa kwamba ili wabatizwe, lazima wazamishwe katika maji. Hata hivyo, hakuna mto karibu na kijiji chetu. Je, lazima tuje huku ili tubatizwe?” Wahubiri walipanga painia anayezungumza lugha ya mwanamume huyo awasiliane naye. Tangu wakati huo, wote wawili wamekuwa na mazungumzo ya Biblia kwa ukawaida.

 Inasisimua kuona vigari vya machapisho vikitumiwa kuhubiri “katika dunia yote inayokaliwa ili kuwa ushahidi kwa mataifa yote.” (Mathayo 24:14) Gharama za kuvitengeneza zinashughulikiwaje? Kupitia michango inayotolewa kwa ajili ya kazi ya ulimwenguni pote na mingi kati ya michango hiyo inakusanywa kupitia donate.dan124.com. Asante kwa ukarimu wako.