SURA YA 4

Kwa Nini Baba na Mama Waliachana?

“Nilikuwa nyumbani pamoja na Mama siku ambayo Baba alituacha. Nilikuwa na umri wa miaka sita tu, kwa hiyo sikuelewa kilichokuwa kikiendelea. Nilikuwa nimeketi kwenye sakafu nikitazama televisheni. Mama alikuwa akilia na kumsihi Baba asiondoke. Baba alishuka ngazi akiwa na sanduku, akapiga magoti nilipokuwa, akanibusu, na kusema, ‘Baba anakupenda sikuzote.’ Kisha akaondoka. Sikumwona tena kwa muda mrefu. Tangu wakati huo, nimekuwa na wasiwasi kwamba Mama ataniacha pia.”—Elaine, mwenye umri wa miaka 19.

 WAZAZI wako wanapotalikiana, huenda ikaonekana kwako kama mwisho wa ulimwengu, msiba mkubwa unaofuatwa na maisha ya taabu isiyo na mwisho. Mara nyingi mtu hulemewa na hisia kama vile aibu, hasira, wasiwasi, hofu ya kuachwa, hatia, kushuka moyo, na hasara kubwa—hata tamaa ya kulipa kisasi.

Ikiwa wazazi wako wameachana karibuni, huenda wewe pia ukawa na hisia kama hizo. Hilo halishangazi kwa kuwa Muumba wetu alikusudia watoto walelewe na wazazi wote wawili, baba na mama. (Waefeso 6:1-3) Sasa, hutakuwa ukimwona mmoja wa wazazi wako kila siku, mzazi ambaye huenda ulimpenda sana. “Nilimtegemea sana baba yangu nami nilitaka kuwa naye sikuzote,” asema Daniel, ambaye wazazi wake waliachana alipokuwa na umri wa miaka saba. “Lakini Mama ndiye aliyepewa haki ya kututunza.”

Kwa Nini Wazazi Huachana?

Mara nyingi, watoto hushangaa wazazi wao wanapoachana kwa sababu wazazi huwaficha matatizo yao. “Sikuamini macho yangu,” asema Rachel, aliyekuwa na umri wa miaka 15 wazazi wake walipotalikiana. “Sikuzote nilidhani wanapendana.” Hata wazazi wanapogombana mara kwa mara, huenda bado ikawa hali yenye kushangaza na kuhuzunisha wanapoachana!

Katika visa vingi, wazazi huachana kwa sababu mmoja wa wazazi amejihusisha katika mwenendo mpotovu kingono. Katika hali hizo, Mungu anamruhusu mwenzi asiye na hatia apate talaka na kuwa huru kufunga ndoa tena. (Mathayo 19:9) Katika hali nyingine, “ghadhabu na kupiga kelele na matukano” yametokeza jeuri, na kumfanya mzazi mmoja ahofie usalama wake na wa watoto wake.—Waefeso 4:31.

Ni kweli kwamba ndoa nyingi huvunjika pasipo misingi halali. Badala ya kutatua matatizo, watu fulani huonyesha ubinafsi kwa kutafuta talaka eti kwa sababu “hawana furaha” au “hawapendani tena.” Kufanya hivyo hakumpendezi Mungu,  ambaye “amechukia talaka.” (Malaki 2:16) Pia, maneno ya Yesu yalionyesha kwamba matatizo yangeweza kutokea katika familia, mmoja kati ya wenzi wa ndoa akiwa Mkristo.—Mathayo 10:34-36.

Vyovyote vile, kwa kuwa tu wazazi wako wameamua kutosema lolote au kutokupa majibu yaliyo wazi kuhusu talaka haimaanishi kwamba hawakupendi. Wakiwa wamelemewa na uchungu wao wenyewe, huenda wazazi wako wakaona vigumu kuongea juu ya talaka. (Methali 24:10) Huenda pia wakaona aibu kukubali udhaifu wao.

Unaloweza Kufanya

Tambua kinachokutia wasiwasi. Kwa kuwa talaka hubadili karibu kila kitu maishani mwako, huenda ukajikuta ukiwa na wasiwasi kuhusu mambo ambayo mwanzoni uliyapuuza. Hata hivyo, unaweza kupunguza wasiwasi wako kwa kutambua ni nini hasa kinachokutia wasiwasi. Tia alama ya ✔ hapa chini, kando ya mambo yanayokutia wasiwasi zaidi au uandike wasiwasi wako kando ya “Mambo mengine.”

□ Mzazi aliyebaki ataniacha pia.

□ Familia yetu haitakuwa na pesa za kutosha za kujiruzuku.

□ Nimechangia talaka hiyo kwa njia fulani.

□ Nikifunga ndoa, ndoa yangu pia itavunjika.

□ Mambo mengine ․․․․․

Zungumza kuhusu mahangaiko yako. Mfalme Sulemani alisema kwamba kuna “wakati wa kusema.” (Mhubiri 3:7) Kwa hiyo, jaribu kutafuta wakati unaofaa wa kuzungumza pamoja na wazazi wako kuhusu mambo yanayokuhangaisha. Waambie jinsi ulivyo na huzuni na ulivyovurugika. Huenda watakuambia kinachoendelea na kukupunguzia mahangaiko yako. Ikiwa wazazi wako hawataki au hawawezi kukutegemeza kwa sasa, unaweza kuzungumza na rafiki mkomavu. Chukua hatua ya kwanza ili kuzungumza  na rafiki huyo. Kuwa na mtu anayeweza kukusikiliza kwaweza kukufariji kwelikweli.—Methali 17:17.

Zaidi ya yote, Baba yako wa mbinguni, “msikiaji wa sala,” anaweza kukusikiliza. (Zaburi 65:2) Mfungulie moyo wako, ‘kwa sababu anakujali.’—1 Petro 5:7.

Mambo ya Kuepuka

Usiwe na kinyongo. “Wazazi wangu walikuwa na ubinafsi,” asema Daniel, aliyenukuliwa awali. “Hawakutufikiria wala kufikiria hatua waliyochukua ingekuwa na matokeo gani kwetu.” Inaeleweka ni kwa nini Daniel angehisi hivyo, na huenda ni kweli. Hata hivyo, ungejibuje maswali yafuatayo? Andika majibu yako katika nafasi iliyoandaliwa.

Ni madhara gani yanayoweza kutokea ikiwa Daniel angeamua kuweka kinyongo na kukasirika daima? (Soma Methali 29:22.) ․․․․․

Ijapokuwa si rahisi, kwa nini ingefaa Daniel ajaribu kuwasamehe wazazi wake kwa sababu ya uchungu ambao wamemsababishia? (Soma Waefeso 4:31, 32.) ․․․․․

Kweli ya msingi inayotajwa katika Waroma 3:23 inawezaje kumsaidia Daniel awe na maoni yanayofaa kuwahusu wazazi wake? ․․․․․

Epuka mazoea yanayoweza kukudhuru. “Sikuwa na furaha, nami nilikuwa nimeshuka moyo wazazi wangu  walipotalikiana,” akumbuka Denny. “Nilianza kupata matatizo shuleni nami nikaanguka mwaka mmoja. Kisha . . . nikawa mtukutu darasani na kuanza kupigana-pigana.”

Unafikiri Denny alikuwa akijaribu kutimiza nini kwa kuwa mtukutu darasani? ․․․․․

Ni kwa nini alianza kupigana-pigana? ․․․․․

Ikiwa unahisi kwamba unataka kuwaadhibu wazazi wako kwa kuwa na mwenendo usiofaa, kanuni ya Wagalatia 6:7 inaweza kukusaidiaje kuwa na maoni yanayofaa? ․․․․․

 Mambo Unayoweza Kutazamia Wakati Ujao

Jeraha halisi, kama vile kuvunjika kwa mfupa, laweza kuchukua majuma au hata miezi kabla ya kupona kabisa. Vivyo hivyo, majeraha ya kihisia yanaweza kuchukua muda mrefu kabla ya kupona. Wataalamu fulani wanahisi kwamba majeraha mabaya ya talaka yanaweza kupona kwa miaka mitatu. Huenda huo ukaonekana kuwa muda mrefu, lakini kumbuka, lazima mengi yatendeke kabla hujarudia hali yako ya kawaida.

Kwanza, mazoea ya kawaida nyumbani—ambayo yamevurugwa na talaka—lazima yapangwe upya. Pia itachukua muda kabla wazazi wako hawajapata usawaziko kihisia. Kisha, ndipo wanapoweza kukutegemeza wewe ifaavyo. Hata hivyo, kadiri mambo yanavyorudia hali ya kawaida, ndivyo utakavyoanza kutulia tena.

PATA HABARI ZAIDI KATIKA BUKU LA 2, SURA YA 25

KATIKA SURA INAYOFUATA

Una mahangaiko kwa sababu mzazi wako amefunga ndoa upya? Unaweza kukabiliana na hali hiyo jinsi gani?

ANDIKO MUHIMU

“Kuna wakati . . . wa kuponya.” —Mhubiri 3:1, 3.

PENDEKEZO

Ikiwa wazazi wako wametalikiana, yaelekea mmoja wao au hata wote wawili wamefanya makosa fulani. Jaribu kuyatambua makosa hayo ili uweze kuyaepuka utakapoamua kufunga ndoa wakati ujao. —Methali 27:12.

JE, WAJUA . . . ?

Kutokuwa na furaha katika ndoa si laana unayoweza kurithi kutoka kwa wazazi wako.

HATUA ZA KUCHUKUA!

Ninaweza kumfunulia moyo wangu (andika jina la mtu mkomavu ambaye ungependa kuzungumza naye) ․․․․․

Nikihisi kwamba ninataka kuwaadhibu wazazi wangu kwa kutenda isivyofaa, ninaweza kuepuka kufanya hivyo kwa kufanya yafuatayo: ․․․․․

Mambo ambayo ningependa kuuliza mzazi (wazazi) wangu kuhusu habari hii ni ․․․․․

UNA MAONI GANI?

● Kwa nini huenda isiwe rahisi kwa wazazi wako kuzungumza nawe kuhusu talaka yao?

● Kwa nini unapaswa kukumbuka kwamba talaka ni tatizo kati ya wazazi wako—si kati yao na wewe?

[Blabu katika ukurasa wa 32]

“Baada ya mama kutuacha, nilishuka moyo na kulia kila siku. Hata hivyo nilisali mara nyingi, nikajishughulisha na kuwasaidia wengine, na kufanya urafiki na watu wakomavu. Naamini kwamba kupitia njia hizo, Yehova Mungu alinisaidia kuvumilia.”—Natalie

[Picha katika ukurasa wa 33]

Kupona kutokana na matokeo ya talaka ya wazazi wako ni kama kupona mkono uliovunjika—unakuwa na maumivu, hata hivyo hatimaye utapona