Yehova anatazamia wale ambao wamefunga ndoa waendelee kuwa waaminifu kwa nadhiri ya ndoa. Alipokuwa akiunganisha mwanamume na mwanamke wa kwanza katika ndoa, Yehova alisema: “Mwanamume . . . atashikamana na mke wake nao watakuwa mwili mmoja.” Baadaye, Yesu Kristo alirudia maneno hayo na kuongeza hivi: “Kwa hiyo, kile ambacho Mungu ameunganisha mtu yeyote asikitenganishe.” (Mwanzo 2:24; Mathayo 19:3-6) Hivyo, Yehova na Yesu huona ndoa kuwa muungano wa kudumu ambao huisha wakati mwenzi mmoja anapokufa. (1 Wakorintho 7:39) Kwa kuwa ndoa ni mpango mtakatifu, talaka haipaswi kuonwa kuwa  jambo dogo. Yehova anachukia talaka ambazo hazina msingi wa Kimaandiko.—Malaki 2:15, 16.

Msingi wa Kimaandiko wa talaka ni nini? Yehova anachukia uzinzi na uasherati. (Mwanzo 39:9; 2 Samweli 11:26, 27; Zaburi 51:4) Bila shaka, anaona uasherati kuwa jambo lenye kuchukiza sana hivi kwamba anauruhusu kuwa msingi wa talaka. (Neno uasherati linafafanuliwa katika Sura ya 9, fungu la 7.) Yehova anampa mwenzi asiye na hatia haki ya kuamua ikiwa ataendelea kukaa na mwenzi wake mwenye hatia au kumpa talaka. (Mathayo 19:9) Hivyo, mwenzi asiye na hatia akiamua kuomba talaka, Yehova hatachukizwa na talaka hiyo. Hata hivyo, kutaniko la Kikristo halitamtia moyo mtu yeyote aombe talaka. Katika visa fulani, huenda mwenzi asiye na hatia akaamua kuendelea kuishi na mwenzi mwenye hatia, hasa ikiwa huyo mwenye hatia anatubu kikweli. Hata hivyo, wale walio na msingi wa Kimaandiko wa talaka watafanya uamuzi wao wenyewe na kukubali matokeo yoyote ambayo huenda yakatokana na talaka.—Wagalatia 6:5.

Katika visa fulani vinavyopita kiasi, Wakristo wengine wameamua kutengana na mwenzi wao wa ndoa au kumtaliki hata ingawa mwenzi huyo hajafanya uasherati. Katika hali kama hiyo, Biblia inasema kwamba mwenzi anayeondoka “akae mseja kama sivyo apatane tena na mume wake.” (1 Wakorintho 7:11) Mkristo huyo hayuko huru kufunga ndoa na mtu mwingine. (Mathayo 5:32) Watu fulani wameona hali zifuatazo zisizo za kawaida kuwa msingi wa kutengana.

Kutotegemeza familia kimakusudi. Huenda familia ikawa maskini, na kukosa mahitaji ya msingi kwa sababu mume anakataa kuyaandaa ingawa ana uwezo wa kufanya hivyo. Biblia inasema: “Ikiwa yeyote hawaandalii mahitaji . . . washiriki wa nyumba yake, ameikana imani naye ni mbaya kuliko mtu asiye na imani.” (1 Timotheo 5:8) Mtu huyo akikataa kubadili mwenendo wake, itambidi mke aamue ikiwa kuna uhitaji wa kujilinda yeye mwenyewe na watoto wake kwa kutengana naye kisheria. Bila shaka, wazee Wakristo wanapaswa kuchunguza mambo kwa makini Mkristo yeyote  anaposhtakiwa kwamba amekataa kuiandalia familia yake. Mtu anaweza kutengwa na ushirika kwa kukataa kuitunza familia yake.

Kuumizwa kimwili kupita kiasi. Mtu anaweza kumtendea kikatili sana mwenzi wake wa ndoa hivi kwamba afya au hata uhai wa yule anayetendewa kikatili unaweza kuwa hatarini. Ikiwa mwenzi anayetenda kikatili ni Mkristo, wazee wa kutaniko wanapaswa kufanya uchunguzi kuhusu jambo hilo. Mtu anaweza kutengwa na ushirika kwa sababu ya milipuko ya hasira na kuzoea kutenda ujeuri.—Wagalatia 5:19-21.

Kuhatarisha kabisa hali ya kiroho. Huenda mwenzi wa ndoa akajaribu tena na tena kumzuia mwenzi wake asishiriki katika ibada ya kweli au hata kujaribu kumlazimisha avunje amri za Mungu kwa njia fulani. Katika hali kama hiyo, mwenzi aliye hatarini anaweza kuamua kwamba njia pekee ya ‘kumtii Mungu kuwa mtawala kuliko wanadamu’ ni kutengana na mwenzi wake kisheria.—Matendo 5:29.

Katika visa vyote vinavyopita kiasi kama vile ambavyo vimezungumziwa, hakuna mtu anayepaswa kumhimiza mwenzi asiye na hatia atengane au aendelee kukaa na mwenzi wake. Ingawa huenda wazee na marafiki wakomavu kiroho wakatoa utegemezo na shauri lenye msingi wa Biblia, hawawezi kujua mambo yote yanayohusika kati ya mume na mke. Ni Yehova pekee anayeweza kuona hayo. Bila shaka, mke au mume Mkristo anayefanya matatizo yao ya ndoa yaonekane kuwa makubwa kuliko yalivyo kikweli, ili tu atengane na mwenzi wake, anakosa kumheshimu Mungu au mpango wa ndoa. Yehova anaona hila zote zinazopangwa ili kutengana, hata mtu akijaribu kuzificha namna gani. Kwa kweli “vitu vyote viko uchi navyo vimefunuliwa wazi machoni pake yeye ambaye tunatoa hesabu kwake.” (Waebrania 4:13) Lakini ikiwa hali mbaya kupita kiasi inaendelea, hakuna mtu anayepaswa kumchambua Mkristo anayefikia uamuzi wa kutengana na mwenzi wake baada ya kujaribu njia nyingine zote. Vyovyote vile, “sisi sote tutasimama mbele ya kiti cha hukumu cha Mungu.”—Waroma 14:10-12.