Ijumaa, Julai 5, 2013, ndugu Anthony Morris, mshiriki wa Baraza Linaloongoza la Mashahidi wa Yehova alitoa tangazo ambalo liliwasisimua washiriki wa familia ya Betheli ya Marekani. Alisema: “Makubaliano yamefikiwa ya kuuza majengo sita kutia ndani majengo ya 117 Adams Street na 90 Sands Street yaliyopo Brooklyn. * Kuuzwa kwa majengo namba 1 hadi 5 kunaonyesha kwamba tunapaswa kuyahama majengo hayo kufikia katikati ya mwezi wa Agosti mwaka huu.”

Hiyo haingekuwa kazi rahisi hata kidogo. Ukubwa wa sakafu wa majengo hayo yote unatoshana na viwanja 11 vya mpira vinavyoweza kutumiwa kwa ajili ya mechi za kimataifa! Tena majengo yalipaswa kuhamwa katika muda wa siku 60!

Kwa miaka mingi, Majengo namba 1 hadi 5 yalikuwa na mashine za uchapishaji na za kujalidi vitabu, lakini mwaka wa 2004 mashine hizo zilihamishiwa Wallkill, New York.

Tangu wakati huo, majengo hayo yametumiwa kwa ajili ya kuhifadhi na kurekebishia vifaa. Vitu vinavyohifadhiwa katika majengo hayo vinatia ndani vifaa vya ujenzi, fanicha za ofisini, na vifaa vinavyotumika katika miradi ya ujenzi nchini Marekani na kwingineko.

Ili kuyahama majengo hayo katika muda uliotolewa, mipango ilihitaji kufanywa kwa makini sana. Kwanza ilihitajika kuorodhesha vitu vilivyokuwemo ndani ya majengo hayo ili iamuliwe ni vitu gani vitakavyouzwa, vitakavyoharibiwa au kuhifadhiwa. Kisha mipango ilifanywa ili kazi hiyo itimizwe kwa usalama na utaratibu.

Familia ya Betheli ilifanya kazi kwa bidii ili kuunga mkono kazi hiyo. Kwa kuongezea, wajitoleaji wa muda 41 walialikwa Betheli ili wasaidie. Wajitoleaji hao walitoka sehemu mbalimbali za Marekani. Wengi wao walikuwa vijana waseja wenye nguvu. Walikubali mwaliko wa kufanya kazi kwa muda wa majuma 6 hadi 10, wakiacha familia zao, marafiki, na kazi zao ili wafanye kazi Betheli. Walihisije baada ya kufanya kazi hiyo?

Jordan, mwenye umri wa miaka 21 kutoka Jimbo la Washington alisema: “Laiti ningejaza ombi langu la kuja Betheli mapema zaidi.”

Steven, mwenye umri wa miaka 20, kutoka Texas alisema: “Ninahisi nikiwa sehemu ya familia kubwa iliyoenea ulimwenguni pote yenye washiriki wenye bidii na furaha.”

Justin, mwenye umri wa miaka 23 aliandika maneno haya: “Nahisi nikiwa nimestarehe hapa Betheli. Ujuzi, upendo, hekima nyingi ya kiroho na ushirika uliopo ni mambo yanayonivutia sana.”

Adler mwenye umri wa miaka 20, kutoka Puerto Rico, alisema: “Imekuwa changamoto kubwa sana kwangu kuamka asubuhi na mapema, hata hivyo nimefaulu kupata marafiki wa kudumu.”

William, mwenye umri wa miaka 21, alisema: “Tangu nilipokuwa mchanga nimekuwa nikitamani sana kuja Betheli. Nilidhani ningehisi upweke, kumbe nilikuwa na maoni yasiyofaa. Hakuna jambo ambalo limewahi kunisisimua maishani kama kuwa hapa Betheli! Siwezi hata kuwazia kuwa kuna jambo lingine zuri kuliko kuwa hapa.”

Je, kikundi hicho cha wajitoleaji kilifanikiwa kumaliza kazi hiyo katika muda wa siku 60? Ndiyo, walifaulu kuitimiza​—kwa siku 55 tu.