Esta 4:1-17
4 Wakati Mordekai+ alijua mambo yote yenye yalikuwa yamefanywa,+ akapasua nguo zake na kuvaa nguo za magunia na akajitia majivu. Kisha akaenda katikati ya muji, akilia kwa sauti kubwa na kwa uchungu.
2 Alienda tu mupaka kwenye mulango mukubwa wa mufalme, kwa maana hakuna mutu mwenye alipaswa kuingia katika mulango mukubwa wa mufalme akiwa mwenye kuvaa nguo za magunia.
3 Na katika kila jimbo*+ kwenye neno na amri ya mufalme ilifika, kulikuwa kilio kikubwa kati ya Wayahudi, pia walifunga+ na kulia na kuomboleza. Wengi walilala katika majivu wakiwa wenye kuvaa nguo za magunia.+
4 Wakati watumishi wanamuke na matowashi wa Esta walikuja na kumuambia habari hiyo, malkia akahuzunika sana. Kisha akamutumia Mordekai nguo za kuvaa pa nafasi ya nguo zake za magunia, lakini Mordekai akazikataa.
5 Basi Esta akamuita Hataki, mumoja wa matowashi wa mufalme, mwenye alikuwa amechaguliwa na mufalme ili kumutumikia Esta, na akamuagiza amuulize Mordekai maana ya jambo hilo na ni nini kilikuwa kinatendeka.
6 Basi Hataki akaenda kumuona Mordekai kwenye kiwanja cha muji wa watu wote mbele ya mulango mukubwa wa mufalme.
7 Mordekai akamuambia mambo yote yenye yalikuwa yamemupata na hesabu kamili ya feza+ zenye Hamani alikuwa ameahidi kulipa katika hazina ya mufalme ili Wayahudi waharibiwe.+
8 Pia akamupatia kopi ya maandishi ya amri yenye ilitolewa katika Shushani*+ kwamba waharibiwe. Hataki alipaswa kumuonyesha Esta kopi hiyo na kumufasiria na kumuagiza+ aende yeye mwenyewe kumuona mufalme ili kumuomba aonyeshe wema na kumulilia moja kwa moja kwa ajili ya watu wake.
9 Hataki akarudia na kumuelezea Esta mambo yenye Mordekai alisema.
10 Esta akamujibu Hataki na kumuagiza amuambie Mordekai:+
11 “Watumishi wote wa mufalme na watu wa majimbo ya* mufalme wanajua kwamba ikiwa mwanaume ao mwanamuke yeyote anaingia katika kiwanja cha ndani cha mufalme+ bila kuitwa, kuko sheria moja tu juu yake: Anapaswa kuuawa; anaweza kuishi kama tu mufalme anamunyooshea fimbo yake ya ufalme ya zahabu.+ Na mimi kwa siku makumi tatu (30) sasa sijaitwa kuingia kwa mufalme.”
12 Wakati Mordekai aliambiwa mambo yenye Esta alisema,
13 akamujibu Esta: “Usiwaze kwamba kwa sababu uko katika nyumba ya mufalme utaponyoka kuliko Wayahudi wengine wote.
14 Kwa maana ukinyamaza wakati huu, Wayahudi watapata kitulizo na ukombozi kutoka chanzo kingine,+ lakini wewe na nyumba ya baba yako mutaangamia. Na ni nani anajua ikiwa haiko kwa ajili ya wakati kama huu ndiyo maana umefikia cheo chako cha kifalme?”+
15 Kisha Esta akamujibu Mordekai:
16 “Uende, ukusanye Wayahudi wote wenye kuwa Shushani* na mufunge+ kwa ajili yangu. Musikule wala kunywa kwa siku tatu (3),+ usiku na muchana. Mimi pia pamoja na watumishi wangu wanamuke tutafunga. Kisha nitaingia kwa mufalme, jambo lenye kuwa kinyume na sheria, kama ni kufa, nitakufa.”
17 Kwa hiyo Mordekai akaenda na kufanya mambo yote yenye Esta alimuagiza kufanya.
