Ronaldo, anayeishi Brazili, alikuwa katika motokari iliyofanya aksidenti ambamo watu watano wa familia yake walikufa, kutia ndani mama na baba yake. Anasema hivi: “Kisha kumaliza miezi miwili katika hospitali, nilisikia kama walikufa katika aksidenti hiyo.”

“Mwanzoni, sikuamini kwamba walikuwa wamekufa. Namna gani wote wanaweza kufa? Wakati tu nilitambua kwamba ilikuwa kweli, niliumia sana moyoni. Nilikuwa sijaumizwa moyoni kwa namna hiyo. Siku zilizofuata, nilijisikia kuwa kuishi bila wao haina maana. Kwa muda wa miezi mingi, nilikuwa ninalia kila siku! Nilijilaumu kwa sababu niliacha mutu mwengine atembeze motokari. Pengine hawangekufa ikiwa ni mimi nilitembeza.”

“Miaka kumi na sita imepita, na nimerudilia maisha yangu ya kawaida. Lakini, kifo chao kimeacha katika moyo wangu kidonda ambacho hakijapona mupaka sasa.”

Omboleza mupendwa wako aliyekufa. Biblia inasema kwamba kuna “wakati wa kulia.” (Mhubiri 3:1, 4) Ronaldo anasema hivi: “Kila mara wakati nilijisikia nataka kulia, sikujizuia. Kwa kweli, haikuwa lazima kuzuia machozi kwa sababu nilijisikia vizuri kisha kulia.” Bila shaka, watu wote hawaonyeshe huzuni yao kwa namna moja. Kwa hiyo, ikiwa wewe hauna tabia ya kuonyesha huzuni yako waziwazi, hilo halimaanishe kama unazuia huzuni yako ao kama ni lazima ujikaze mupaka utoe machozi.

Usijitenge na wengine. (Methali 18:1) Ronaldo anasema hivi: “Ninajikaza ili nisijitenge na wengine. Watu wananitembelea, na ninawakaribisha. Tena, ninaelezea bibi yangu na marafiki wangu wa karibu mambo yaliyo katika moyo wangu.”

Uwe mutulivu hata kama mutu fulani anasema maneno yenye kuumiza. Unaweza kusikia masemi kama vile “Ilikuwa afazali akufe.” Ronaldo anakumbuka: “Masemi fulani ambayo yalisemwa ili kunifariji yalinivunja moyo.” Kuliko kuendelea kufikiria maneno yenye kuvunja moyo, ni vizuri kufuata shauri hili lenye hekima la Biblia: “Usiweke moyoni mwako maneno yote ambayo huenda watu wakasema.”—Mhubiri 7:21.

Jifunze ukweli juu ya hali ya watu ambao wamekufa. Ronaldo anasema hivi: “Katika andiko la Mhubiri 9:5, Biblia inaonyesha kwamba watu ambao wamekufa hawateseke, kujua hivyo kunanituliza. Biblia inafundisha pia kwamba kutakuwa ufufuo na kwamba watu ambao wamekufa watafufuliwa ili waishi tena. Kwa hiyo, ninaona wapendwa wangu ambao wamekufa kama watu ambao wamesafiri na ambao mwishowe watarudi.”—Matendo 24:15.

Je, ulijua? Biblia inaahidi kwamba kuna wakati ambao Mungu “atameza kifo milele.” *—Isaya 25:8.