Tumutolee Yehova Zabihu Zetu kwa Nafsi Yote

‘Lolote munalofanya, lifanyeni kwa nafsi yote kama kwa Yehova, na si kama kwa wanadamu.’​—KOL. 3:23.

JARIBU KUJIBU

Namna gani tunaweza kumuheshimu Yehova katika mambo tunayofanya kila siku?

Ni zabihu gani tunazomutolea Mungu katika ibada yetu kwake?

Namna gani tunaweza kumutolea Yehova vitu vyetu vya kimwili?

1-3. (a) Je, kifo cha Yesu kwenye muti wa mateso kilimaanisha kwamba Yehova hatuombi tumutolee tena zabihu yoyote? Eleza. (b) Ni ulizo gani linalotokezwa kuhusiana na zabihu tunazotoa leo?

 WAKATI wa mitume, Yehova aliwafunulia watu wake kwamba zabihu ya ukombozi ya Yesu imeondoa Sheria ya Musa. (Kol. 2:13, 14) Zabihu zote za wanyama ambazo Wayahudi walikuwa wakimutolea Yehova kwa muda wa miaka mingi hazikuwa tena za lazima na hazikuwa tena na faida yoyote. Sheria ilikuwa imekwisha kutimiza kazi yake ya kuwa ‘mutunzaji wa kuwaongoza kwa Kristo’​—Gal. 3:24.

² Hilo halimaanishe kwamba Wakristo hawapashwi tena kutoa zabihu yoyote. Mutume Petro alizungumuzia uhitaji wa ‘kutoa zabihu za kiroho zenye kukubalika kwa Mungu kupitia Yesu Kristo.’ (1 Pet. 2:5) Pia, mutume Paulo alionyesha waziwazi kwamba kila sehemu ya maisha ya Mukristo inaweza kuonwa kuwa ‘zabihu’​—Rom. 12:1.

³ Kwa hiyo basi, Mukristo anamutolea Yehova zabihu kwa kumutolea vitu fulani ao kwa kuacha vitu fulani kwa ajili yake. Kutokana na mambo tunayojua kuhusu yale Mungu aliwaomba Waisraeli wafanye ili akubali zabihu walizomutolea, namna gani tunaweza kuwa hakika kwamba Yehova anakubali zabihu zote tunazomutolea leo?

KATIKA MAISHA YETU YA KILA SIKU

4. Tunapaswa kukumbuka nini kuhusu kila jambo tunalofanya kila siku katika maisha?

⁴ Inaweza kuwa vigumu kuelewa kwamba maisha yetu ya kila siku yanahusiana na kumutolea Yehova zabihu. Tunaweza kufikiri kwamba kazi tunazofanya nyumbani, kwenye masomo, kazini, kununua vitu sokoni ao dukani, na mambo mengine kama hayo hayana uhusiano wowote na mambo ya kiroho. Lakini,  ikiwa ulijitoa kwa Yehova ili kumutumikia ao ikiwa unatumaini kufanya hivyo wakati ujao, basi ni jambo la maana kujua kwamba kila jambo unalofanya katika maisha yako linaweza kuharibu ao kufanya uhusiano wako pamoja naye uwe muzuri. Sisi ni Wakristo kila dakika. Tunapaswa kutumia kanuni za Biblia katika kila sehemu ya maisha yetu. Ndio sababu, Paulo alitutia moyo hivi: ‘Lolote munalofanya, lifanyeni kwa nafsi yote kama kwa Yehova, na si kama kwa wanadamu.’​—Soma Wakolosai 3:18-24.

5, 6. Tufikirie nini kila siku kuhusiana na mwenendo wetu na jinsi tunavyovalia?

⁵ Ni kweli kwamba utendaji wetu wa kila siku si sehemu ya utumishi wetu mutakatifu. Lakini, kwa kuwa Paulo alitutia moyo kutumika “kwa nafsi yote kama kwa Yehova,” hilo linatufanya tufikirie maisha yetu kwa ujumla. Basi, namna gani tunaweza kutumikisha shauri hilo? Je, tunatenda na kuvaa kila wakati inavyofaa? Ao tunapokuwa katika shuguli zetu za kila siku, je, tutasikia haya ya kujitambulisha kama Mashahidi wa Yehova, labda kwa sababu ya mwenendo wetu ao namna tunavyovalia? Isiwe hivyo hata kidogo! Watu wa Yehova hawatapenda kufanya jambo lolote linaloweza kuchafua jina la Mungu.​—Isa. 43:10; 2 Kor. 6:3, 4, 9.

⁶ Acheni tuzungumuzie jinsi nia ya kutumika “kwa nafsi yote kama kwa Yehova” inatia ndani sehemu nyingi za maisha yetu. Tunapozungumuzia habari hii, tukumbuke kwamba zabihu zote ambazo Waisraeli walimutolea Yehova zilipaswa kuwa bora zaidi.​—Kut. 23:19.

JINSI MAISHA YAKO YANAVYOHUSIKA

7. Kujitoa kwa Mungu kunatia ndani nini?

⁷ Ulipojitoa kwa Yehova, ulichukua uamuzi huo bila kumutilia Yehova masharti, sivyo? Bila shaka, ulimwambia Yehova kwamba atakuwa pa nafasi ya kwanza katika mambo yote ya maisha yako. (Soma Waebrania 10:7.) Kweli ulichukua uamuzi muzuri. Bila shaka umetambua kwamba unapotafuta kujua ni nini mapenzi ya Yehova katika jambo fulani na unapojikaza kutenda kulingana nayo, kila mara matokeo ni mazuri. (Isa. 48:17, 18) Watu wa Mungu ni watakatifu na wenye furaha kwa sababu wanaonyesha sifa za Yehova anayewafundisha.​—Law. 11:44; 1 Tim. 1:11.

8. Kwa kuwa Yehova alitazamia zabihu za Waisraeli kuwa takatifu, hilo linamaanisha nini kwetu?

⁸ Zabihu ambazo Waisraeli walimutolea Yehova zilitazamiwa kuwa takatifu. (Law. 6:25; 7:1) Neno la Kiebrania linalotafsiriwa kuwa “utakatifu” linatoa wazo la kutenga kitu ao mutu fulani, kitu kilicho tu kwa ajili ya, ao kilichotakaswa kwa ajili ya Mungu. Ili zabihu zetu zikubaliwe na Yehova, zinapaswa kutengwa ili zisichafuliwe na mambo machafu ya ulimwengu. Kwa hiyo, hatupaswe kupenda  kitu chochote ambacho Yehova anachukia. (Soma 1 Yohana 2:15-17.) Hilo linamaanisha kwamba tunapaswa kuepuka urafiki wowote ao kujiingiza katika jambo lolote linaloweza kutufanya tuonekane kuwa wachafu machoni pa Mungu. (Isa. 2:4; Ufu. 18:4) Hilo linamaanisha pia kwamba hatuwezi kuruhusu macho yetu yaendelee kutazama mambo machafu ao ya uasherati wala kuacha akili zetu ziwazie​-wazie kwa kufurahia mambo hayo.​—Kol. 3:5, 6.

9. Kwa nini namna tunavyowatendea wengine ni jambo la maana?

⁹ Paulo aliwatia moyo waamini wenzake hivi: ‘Musisahau kutenda mema na kushiriki vitu pamoja na wengine, kwa maana Mungu anapendezwa vema na zabihu za namna hiyo.’ (Ebr. 13:16) Kwa hiyo, kuwa mwema na kuwatendea wengine mema ni jambo ambalo Yehova anaona kama zabihu zenye kukubalika kwake. Kwa kuwatendea wengine mema tunaonyesha kwamba sisi ni Wakristo wa kweli.​—Yoh. 13:34, 35; Kol. 1:10.

ZABIHU KATIKA IBADA

10, 11. Namna gani Yehova anaona kazi yetu ya kuhubiri na ibada yetu, na hilo litatuchochea kufanya nini?

¹⁰ Njia moja iliyo wazi ambayo kupitia hiyo sisi Wakristo tunawatendea wengine mema ni ‘tangazo la hazarani la tumaini letu.’ Je, unatumia kila nafasi ili kutoa ushahidi? Paulo aliuita utendaji huo wa maana wa Wakristo kuwa ‘zabihu ya sifa, yaani, tunda la midomo ambayo hulifanyia jina la [Mungu] tangazo la hazarani.’ (Ebr. 10:23; 13:15; Hos. 14:2) Ni vizuri kufikiria ni saa ngapi tunazopitisha katika kuhubiri habari njema ya Ufalme na namna gani tunaweza kufanya mahubiri yetu yawe bora zaidi. Sehemu nyingi kwenye Mukutano wa Utumishi zinaweza kutusaidia. Lakini jambo tunalopaswa kukumbuka kabisa ni kwamba, kwa kuwa kazi yetu ya kuhubiri, kutia ndani kutoa ushahidi wakati hatukupanga kufanya hivyo, ni ‘zabihu ya sifa,’ yaani ni sehemu ya ibada yetu, zabihu hiyo tunayomutolea Yehova inapaswa kuwa bora zaidi. Ni kweli kwamba kila mutu ana hali tofauti na ya mwengine, lakini mara nyingi kiasi cha saa tunazotumia ili kuhuribi habari njema kinaonyesha kwamba tunachukua kwa uzito mambo ya kiroho ao hapana.

¹¹ Mara nyingi Wakristo wanatumia wakati wa kumwabudu Yehova wakiwa kikundi katika kutaniko ao mutu akiwa pekee nyumbani. Yehova anatuomba kufanya hivyo. Ni kweli kwamba hatulazimishwe tena kushika Sabato wala kusafiri kwa ukawaida ili kuhuzuria sherehe  mbalimbali huko Yerusalemu. Hata hivyo, katika maisha ya Kikristo, kuna mambo yanayofananishwa na sherehe hizo. Leo pia Mungu anataka wakati mwengine tuachane na kazi zisizozaa matunda ili tupate wakati wa kujifunza Neno lake, kusali, na kuhuzuria mikutano. Na baba wa familia wanapaswa kuchukua hatua katika kufanya ibada ya familia pamoja na familia zao. (1 The. 5:17; Ebr. 10:24, 25) Kuhusiana na utendaji wetu wa kiroho, ni vizuri kila mumoja wetu ajiulize, ‘Je, ninaweza kufanya namna yangu ya kumwabudu Yehova iwe nzuri zaidi?’

12. (a) Kutolewa kwa uvumba katika Israeli kunaweza kufananishwa na nini leo? (b) Ulinganisho huo unatusaidia namna gani kuhusu sala zetu?

¹² Mufalme Daudi alimwimbia Yehova hivi: “Sala yangu na itayarishwe kama uvumba mbele zako.” (Zab. 141:2) Fikiria kwanza sala zako​—unasali mara ngapi na unasali kwa ajili ya mambo gani. Kitabu cha Ufunuo kinafananisha “sala za watakatifu” na uvumba katika maana ya kwamba sala zenye kukubaliwa zinapanda kwa Yehova kama harufu tamu na yenye kupendeza. (Ufu. 5:8) Katika Israeli, uvumba ambao ulitolewa kwa ukawaida kwenye mazabahu ya Yehova ulitayarishwa kwa uangalifu sana. Yehova alikubali uvumba huo ikiwa tu ulitolewa kulingana na maagizo yaliyotolewa. (Kut. 30:34-37; Law. 10:1, 2) Ikiwa sala zetu zenye kutoka moyoni zinatolewa kwa heshima na kwa uangalifu, basi tunaweza kuwa hakika kwamba Yehova atazikubali.

KUTOA NA KUPOKEA

13, 14. (a) Ni jambo gani ambalo Epafrodito na kutaniko la Filipi walimufanyia Paulo, naye alijisikia namna gani? (b) Namna gani tunaweza kufuata mufano wa Epafrodito na wa Wafilipi?

¹³ Michango ya feza inayotolewa ili kutegemeza kazi ya kuhubiri ulimwenguni pote inaweza kulinganishwa na zabihu, iwe tunatoa feza nyingi ao kidogo. (Marko 12:41-44) Wakati wa mitume, kutaniko la Filipi lilituma Epafrodito huko Roma ili kumuachia Paulo musaada kwa ajili ya mahitaji yake ya kimwili. Ni wazi kwamba Epafrodito alipeleka feza ambazo kutaniko la Filipi lilituma. Haikuwa mara ya kwanza kwa Wakristo wa Filipi kumuonyesha Paulo roho hiyo ya ukarimu. Wema wao uliwachochea wamuondolee Paulo mahangaiko ya feza ili awe na wakati mwingi wa kuhubiri. Namna gani Paulo aliona zawadi hiyo? Aliita zawadi hiyo ‘harufu tamu, zabihu yenye kukubalika, inayomupendeza Mungu vyema.’ (Soma Wafilipi 4:15-19.) Bila shaka, Paulo alipendezwa sana na wema huo wa Wafilipi, na Yehova pia.

¹⁴ Leo pia, Yehova anapendezwa sana na michango tunayotoa kwa ajili ya kazi ya kuhubiri ulimwenguni pote. Pia, anaahidi kwamba ikiwa tunaendelea kutia faida za Ufalme pa nafasi ya kwanza maishani mwetu, atashugulikia mahitaji yetu ya kimwili na ya kiroho.​—Mt. 6:33; Luka 6:38.

UWE MWENYE SHUKRANI

15. Ni mambo gani yanayokuchochea umushukuru Yehova?

¹⁵ Tuna sababu nyingi za kumushukuru Yehova. Kila siku tunapaswa kumushukuru kwa sababu ya zawadi ya uzima, sivyo? Anatutolea yote tunayohitaji ili kuishi​—chakula, mavazi, makao, na hewa tunayopumua. Pia, imani yetu inayotegemea ujuzi wa kweli, inatutolea tumaini. Basi, ni jambo lenye kufaa tumwabudu Yehova na kumutolea zabihu za sifa, kwa sababu ni yeye aliyetuumba na kwa sababu ya yote ambayo amefanya kwa ajili yetu.​—Soma Ufunuo 4:11.

16. Namna gani tutaonyesha shukrani yetu kuelekea zabihu ya ukombozi ya Kristo?

¹⁶ Kama tulivyoona katika habari iliyotangulia, zawadi ya pekee sana ambayo Mungu alitolea wanadamu ni zabihu ya ukombozi ya Kristo. Hilo ndilo onyesho kubwa la upendo wa Mungu kwetu.  (1 Yoh. 4:10) Kwa hiyo, ni njia gani inayofaa ili kuonyesha shukrani yetu? Paulo alisema hivi: ‘Kwa maana upendo alio nao Kristo hutulazimisha, kwa sababu hili ndilo tumehukumu, kwamba mutu mumoja alikufa kwa ajili ya wote; naye alikufa kwa ajili ya wote ili wale wanaoishi wasiishi tena kwa ajili yao wenyewe, bali kwa ajili ya yeye aliyekufa kwa ajili yao na kufufuliwa.’ (2 Kor. 5:14, 15) Kwa kweli, Paulo alipenda kusema kwamba ikiwa tunasamini fazili zisizostahiliwa za Mungu, tutatumia maisha yetu ili kumuheshimu Mungu na Mwana Wake. Tutaonyesha kwamba tunamupenda Mungu na Mwana Wake ikiwa tunawatii na kushiriki katika kazi ya kuhubiri na kufanya wanafunzi.​—1 Tim. 2:3, 4; 1 Yoh. 5:3.

17, 18. Ni katika njia gani watu fulani waliongeza zabihu yao ya sifa kwa Yehova? Toa mufano.

¹⁷ Je, inawezekana umutolee Mungu zabihu ya sifa iliyo bora zaidi? Ndugu wengi, walipofikiri sana juu ya mambo yote mazuri ambayo Yehova amewafanyia, walichochewa kupanga wakati wao na utendaji wao ili kushiriki zaidi katika mahubiri ao katika utendaji mbalimbali wa kiteokrasi. Wengine wamekuwa mapainia wasaidizi kwa mwezi mumoja ao zaidi kila mwaka, wengine wamekuwa mapainia wa kawaida. Wengine wamejitoa katika kazi ya ujenzi wa Majumba ya Ufalme. Hizo ni njia nzuri sana za kuonyesha shukrani kwa Yehova, sivyo? Matendo hayo ya utumishi mutakatifu yanakubaliwa na Mungu ikiwa tunayafanya kwa nia nzuri ili kuonyesha shukrani kwake.

¹⁸ Wakristo wengi wameona kwamba wana deni la kuonyesha shukrani kwa Yehova na wamechochewa kufanya jambo fulani. Tuchukue mufano wa dada Morena. Kabla hajakuwa Shahidi, alikuwa akitafuta majibu kwa maulizo mengi katika kanisa Katoliki, kanisa alimokomalia, alitafuta pia majibu katika filozofia ya Asia. Lakini hakutosheka. Ni wakati tu alipoanza kujifunza Biblia na Mashahidi wa Yehova ndipo kiu chake cha kiroho kilitulizwa. Dada Morena alimushukuru Yehova sana kwa kupata majibu ya Biblia yaliyokuwa wazi kwa maulizo yake yote na namna majibu hayo yalivyomusaidia awe na maisha yenye furaha. Kwa hiyo, ili kuonyesha shukrani yake kwa Yehova aliazimia kutumia nguvu zake zote katika kazi yake. Akawa painia musaidizi kisha tu kubatizwa, na mara moja wakati hali zake zilipomuruhusu akawa painia wa kawaida. Kumepita miaka 30, na mupaka sasa dada Morena angali katika utumishi wa wakati wote.

19. Wewe unaweza kuongeza zabihu zako kwa Yehova namna gani?

¹⁹ Bila shaka, kuna watumishi wengi waaminifu wa Yehova ambao hali zao haziwaruhusu kuwa mapainia. Hata hali yetu iwe namna gani katika utumishi wa Yehova, sisi wote tunaweza kumutolea zabihu za kiroho ambazo atakubali. Katika mwenendo wetu, ni lazima tufuate kanuni za Biblia kwa uangalifu, tukijua kwamba tunamuwakilisha Yehova kila wakati. Kwa imani, tunatumaini kabisa kwamba Mungu atatimiza makusudi yake. Katika kazi njema, tunasaidia kueneza habari njema. Kwa sababu ya yote ambayo Yehova ametufanyia, moyo wetu unajaa na shukrani kwake. Kwa hiyo, acheni tuendelee kumutolea Yehova zabihu kwa nafsi yote.

[Maulizo ya Funzo]

[Wazo la fungu kwenye ukurasa 25]

Je, wema wa Yehova unakuchochea ufanye zabihu yako ya sifa iwe nzuri zaidi?

[Picha katika ukurasa wa 23]

Je, unatumia kila nafasi ili kutoa ushahidi?