1, 2. Watu wa Mungu wamejisikia namna gani katika ulimwengu huu, na ni katika maana gani wao wana makao?

  JE, UNAJISIKIA kabisa kwamba uko vizuri katika ulimwengu huu? Ikiwa sivyo, jua kwamba kuna watu wengine wanaojisikia kama wewe! Tangu zamani, wale wote ambao wamemupenda kabisa Yehova wamejisikia kuwa wageni katika ulimwengu huu muovu. Kwa mufano, watumishi wa Mungu walipokuwa wakihamisha kambi yao kutoka mahali pamoja na kuenda mahali pengine katika inchi ya Kanaani, ‘walitangaza hazarani [waziwazi] kwamba wao ni wageni na wakaaji wa muda.’​—Ebr. 11:13.

² Vivyo hivyo, wafuasi wa Kristo watiwa-mafuta, ambao, ‘uraia wao uko mbinguni,’ wanajiona kama “wageni na wakaaji wa muda” katika ulimwengu huu muovu. (Flp. 3:20; 1 Pet. 2:11) Pia, “kondoo wengine” wa Kristo “si sehemu ya ulimwengu, kama vile [Yesu hakuwa] sehemu ya ulimwengu.” (Yoh. 10:16; 17:16) Hata hivyo, watu wa Mungu wana “makao.” Kwa kweli, kupitia macho ya imani sisi tunaweza kuona makao yetu mazuri ajabu ambamo tunafurahia ulinzi wa hali ya juu. Musa aliandika hivi: ‘Ee Yehova, wewe mwenyewe umekuwa makao yetu kwa kizazi baada ya kizazi.’ (Zab. 90:1) Namna gani Yehova alikuwa “makao” ya watumishi wake wa zamani? Namna gani Yehova ni “makao” ya watu wanaochukua jina lake leo? Na namna gani ni yeye tu atakayekuwa makao yenye usalama wakati ujao?

3. Kuhusu usemi wa mufano ni mambo gani matatu yanayoonyeshwa katika andiko la Zaburi 90:1?

³ Katika Biblia muna maneno mengi ya usemi wa mufano yanayotumiwa ili kufundisha jambo fulani. Katika usemi huo wa mufano unaweza kukuta 1) jambo linalozungumuziwa, 2) jambo linalolinganishwa na jambo lililozungumuziwa na, 3) ulingano ao ufanani kati  ya mambo hayo mawili. Kwa mufano, andiko la Zaburi 90:1 linatumia usemi huo wa mufano. Yehova ni jambo linalozungumuziwa. Makao ni jambo linalolinganishwa na jambo lililozungumuziwa. Yehova analingana na makao katika njia nyingi. Kwa mufano, Yehova analinda watu wake. Hilo linapatana na wazo la kwamba yeye ni upendo. (1 Yoh. 4:8) Yeye pia ni Mungu wa amani, anayefanya watumishi wake ‘wakae kwa usalama.’ (Zab. 4:8) Fikiria kwa mufano namna alivyowatendea mababu wa Waisraeli, kuanzia Abrahamu.

4, 5. Namna gani Mungu alikuwa “makao” ya Abrahamu?

⁴ Katika akili yako unaweza kuona namna Abrahamu aliyeitwa Abramu wakati huo, alivyojisikia wakati Yehova alimuambia: ‘Nenda zako kutoka katika inchi yako na kutoka kwa watu wa jamaa yako mupaka katika inchi ambayo nitakuonyesha.’ Ikiwa hilo lilimuhangaisha Abrahamu, yeye alitulia wakati Yehova alimuambia tena hivi: ‘Nami nitafanya taifa kubwa kutokana nawe, nitakubariki na kulifanya jina lako kuwa kubwa. Nami nitawabariki wale wanaokubariki, na yule anayekulaani nitamulaani.’​—Mwa. 12:1-3.

⁵ Kupitia maneno hayo, Yehova mwenyewe alichukua daraka la kuwa makao yenye usalama ya Abrahamu na ya wazao wake. (Mwa. 26:1-6) Yehova alitimiza ahadi yake. Kwa mufano, alizuia Farao wa Misri na Mufalme Abimileki wa Gerari wasilale Sara kinguvu na wasimue Abrahamu. Alilinda Isaka na Rebeka katika hali kama hiyo. (Mwa. 12:14-20; 20:1-14; 26:6-11) Tunasoma hivi: “[Yehova] hakumuruhusu binadamu yeyote awapunje, bali aliwakaripia wafalme kwa sababu yao, akisema: ‘Musiwaguse watiwa-mafuta wangu, wala musiwatendee manabii wangu lolote lililo baya.’”​—Zab. 105:14, 15.

6. Isaka alimuambia Yakobo afanye nini, na labda Yakobo alijisikia namna gani?

⁶ Yakobo, mujukuu wa Abrahamu, alikuwa kati ya manabii hao. Wakati Yakobo alitaka kuoa, Isaka, baba yake, alimuambia hivi: ‘Usichukue mwanamuke kutoka kwa binti za Kanaani. Ondoka, uende mupaka Padan-aramu kwa nyumba ya Bethueli baba ya mama yako na kutoka huko ujichukulie mwanamuke kati ya binti za Labani ndugu ya mama yako.’ (Mwa. 28:1, 2) Yakobo alitii bila kusita. Aliacha kuishi na familia yake iliyokuwa ikiishi huko Kanaani, akasafiri, yeye mwenyewe, mamia ya kilometre mupaka Harani. (Mwa. 28:10) Labda alijiuliza: “Nitafanya muda gani huko? Je, mujomba wangu atanipokea kwa uchangamufu na kunipatia mwanamuke anayemuogopa Yehova?” Ikiwa hilo lilimuhangaisha Yakobo, bila shaka alitulia alipofika Luzi, muji uliopatikana kwenye kilometre 100 hivi kutoka Beer-sheba. Ni jambo gani lilitokea hapo Luzi?

7. Mungu alimuhakikishia Yakobo jambo gani kupitia ndoto?

 ⁷ Hapo Luzi, Yehova alimutokea Yakobo katika ndoto, na akamuambia hivi: ‘Mimi nipo pamoja nawe, nami nitakutunza katika njia yote unayoenda, nami nitakurudisha kwenye inchi hii, kwa sababu sitakuacha mupaka niwe kwa kweli nimefanya hayo ambayo nimekuambia.’ (Mwa. 28:15) Maneno hayo yenye upendo yalimufanya Yakobo awe na uhakika na yalimufariji! Katika akili yako unaweza kuona namna Yakobo anavyoenda mbio, akingojea kwa hamu kuona namna Mungu atatimiza maneno Yake. Ikiwa uliacha wazazi wako na watu wa jamaa yako ili kuenda kumutumikia Yehova katika inchi ya kigeni, unaweza kuelewa namna Yakobo alivyojisikia. Na bila shaka umejionea mambo yanayokuhakikishia kwamba Yehova anakushugulikia.

8, 9. Ni katika njia gani Yehova alikuwa “makao” ya Yakobo, na jambo hilo linaweza kutufundisha nini?

⁸ Yakobo alipofika Harani, mujomba wake Labani alimukaribisha kwa uchangamufu na kisha akamutolea Lea na Rachel, binti zake, ili wawe bibi zake. Ni kweli kwamba baadaye Labani alijaribu kumupunja Yakobo, kwa kubadili mushahara wake mara kumi! (Mwa. 31:41, 42) Hata hivyo, Yakobo alivumilia ukosefu huo wa haki akiwa hakika kwamba Yehova ataendelea kumushugulikia, na kweli Yehova alimushugulikia. Kwa kweli, wakati Mungu alimuambia Yakobo arudi Kanaani, muzee huyo alikuwa amekwisha pata “makundi makubwa na wajakazi na watumishi wanaume na ngamia na punda.” (Mwa. 30:43) Yakobo alishukuru sana na kusali hivi: ‘Mimi sistahili fazili zote zenye upendo na uaminifu wote ambao umemuonyesha mutumishi wako, kwa maana nilivuka huu muto Yordani nikiwa na fimbo yangu tu na sasa nimekuwa kambi mbili.’​—Mwa. 32:10.

⁹ Bila shaka, sala ya Musa ilikuwa ya kweli kabisa: ‘Ee Yehova, wewe mwenyewe umekuwa makao yetu kwa kizazi baada ya kizazi’! (Zab. 90:1) Maneno hayo yanatimia pia leo, kwa kuwa Yehova, ambaye ‘habadilike, kama kugeuka kwa kivuli,’ anaendelea kuwa makao yenye upendo na usalama ya watumishi wake waaminifu. (Yak. 1:17) Acheni tuone anafanya hivyo namna gani.

10. Sababu gani tunaweza kuwa hakika kwamba Yehova anaendelea kuwa makao yenye usalama ya watumishi wake?

¹⁰ Fikiria jambo hili: Umeitwa kwenye tribinale ili ushuhudie kwamba kikundi fulani cha wauaji kimemuua mutu fulani. Kikundi hicho kinasimamiwa na mutu mwenye akili sana, mwenye nguvu, muuaji asiye na huruma na muongo. Utajisikia namna gani unapotoka kwenye tribinale hiyo? Tuseme ni mangaribi! Je, utajisikia salama? Hapana! Na bila shaka, utapenda upewe ulinzi. Mufano huo unaonyesha hali ya watumishi wa Yehova. Wanamutetea Yehova kwa ujasiri na wanafunua wazi Shetani ambaye ni adui mukubwa wa Yehova! (Soma Ufunuo 12:17.) Lakini, je, Shetani ameweza kuwanyamazisha watu wa Mungu? Hapana! Kwa kweli tunaendelea kufanikiwa kiroho. Hilo linawezekana namna gani? Yehova ni kimbilio letu, “makao” yetu, zaidi sana katika siku hizi za mwisho. (Soma Isaya 54:14, 17.) Hata hivyo, ikiwa tunamuruhusu Shetani atudanganye na kutuondoa mahali hapo, basi Yehova hawezi tena kuwa makao yetu yenye usalama.

11. Tunajifunza nini kutokana na mababu wa Waisraeli?

¹¹ Mara ingine tena, acheni tujifunze jambo fulani kutokana na mababu wa Waisraeli. Ijapokuwa waliishi katika inchi ya Kanaani, waliendelea kujitenga na watu wa inchi hiyo, walichukia mambo mabaya waliyokuwa wanafanya na matendo yao ya uasherati. (Mwa. 27:46) Waliongozwa na  kanuni, hawakuongozwa na sheria nyingi na ngumu. Kumujua Yehova na sifa zake kuliwasaidia. Kwa kuwa Yehova alikuwa makao yao, hawakufanya urafiki na watu wa ulimwengu. Tofauti na hilo, walijitenga na watu hao kadiri iwezekanavyo. Walituachia mufano muzuri kabisa! Je, unajikaza kuiga wazee hao waaminifu wa zamani unapochagua marafiki na mambo ya kujifurahisha? Jambo la kuhuzunisha ni kwamba, ndugu na dada fulani wanaonyesha kwa kiasi fulani kwamba wanajisikia vizuri katika ulimwengu huu wa Shetani. Ikiwa unajisikia hivyo, hata kwa kiasi kidogo, sali kwa ajili ya jambo hilo. Usisahau kama ulimwengu huu ni wa Shetani na unaonyesha tabia zake, ni kusema, ukosefu wa upendo, na kujipenda.​—2 Kor. 4:4; Efe. 2:1, 2.

12. (a) Ni mipango gani ya kiroho ambayo Yehova anatumia ili kulisha watu wake? (b) Unaiona mipango hiyo namna gani?

¹² Ili kupinga ujanja wa Shetani, tunahitaji kufaidika kabisa na mipango ya kiroho ambayo Yehova anatolea watu wa nyumba yake ya imani, wale wanaomufanya kuwa makao yao. Mipango hiyo inatia ndani, mikutano, ibada ya familia, na “zawadi katika wanadamu,” ni kusema, wazee wa kutaniko ambao waliwekwa na Mungu ili kutufariji na kututegemeza tunapopambana na matatizo ya maisha. (Efe. 4:8-12) Ndugu George Gangas, aliyekuwa mushiriki wa Baraza Linaloongoza kwa miaka mingi, aliandika hivi: “Ninapokuwa kati ya [watu wa Mungu] ninajisikia kuwa nyumbani pamoja na familia yangu, katika paradiso ya kiroho.” Je, wewe pia unajisikia hivyo?

13. Ni somo gani la maana tunalojifunza katika andiko la Waebrania 11:13?

¹³ Sifa ingine ya mababu hao wa Waisraeli ambayo inastahili kuigwa ni ile ya kuwa tayari kujitofautisha na majirani wao. Kama tulivyoona katika  fungu la kwanza ‘walitangaza hazarani [waziwazi] kwamba wao ni wageni na wakaaji wa muda katika inchi.’ (Ebr. 11:13) Je, unaazimia kabisa kuwa tofauti? Ni kweli kwamba kufanya hivyo si rahisi sikuzote. Lakini kwa musaada wa Mungu na wa Wakristo wenzetu, tunaweza kufanikiwa. Kumbuka, hauko peke yako. Wote wanaotaka kumutumikia Yehova wanapigana vita hiyo! (Efe. 6:12) Lakini, ni vita ambayo tunaweza kushinda ikiwa tunamutegemea Yehova na kumufanya awe makao yetu yenye usalama.

14. Watumishi wa Yehova walingojea “jiji” gani?

¹⁴ Jambo lingine la maana ni hili: Iga Abrahamu kwa kukaza macho yako kwenye zawadi. (2 Kor. 4:18) Mutume Paulo aliandika kwamba Abrahamu ‘alikuwa akingojea jiji lililo na misingi ya kweli, ambalo mujenzi na mutengenezaji wa jiji hilo ni Mungu.’ (Ebr. 11:10) “Jiji” hilo ni Ufalme wa Kimasiya.  Bila shaka, Abrahamu alipaswa kungojea “jiji” hilo. Katika maana fulani, sisi hatungojee jiji hilo. Ufalme huo unatawala sasa mbinguni. Mambo mengi yanahakikisha kwamba Ufalme huo utatawala juu ya dunia yote hivi karibuni. Je, wewe unauona Ufalme huo kuwa si jambo la kuwazia tu? Namna yako ya kuishi, maoni yako kuhusu ulimwengu huu, na mambo unayotia pa nafasi ya kwanza katika maisha yako, yanaonyesha kama unaukubali Ufalme huo?​—Soma 2 Petro 3:11, 12.

15. Ni jambo gani litawapata wale wanaotumainia ulimwengu huu?

¹⁵ Kadiri ulimwengu huu wa Shetani unavyokaribia mwisho wake, “maumivu na taabu” vitaendelea kuongezeka. (Mt. 24:7, 8) Mwishowe, mambo yatakuwa mabaya hata zaidi wakati wa ziki kubwa. Matengenezo ambayo wanadamu wanategemea yataanguka, na watu wataogopa sana. (Hab. 3:16, 17) Kwa sababu ya kukata tamaa kabisa, watatafuta kukimbilia “katika mapango na katika miamba ya milima” kama walivyozoea kufanya. (Ufu. 6:15-17) Lakini, iwe mapango hayo ni ya mufano ao ni matengenezo ya politike ao ya biashara inayofananishwa na milima, hayatawatolea ulinzi wowote.

16. Tunapaswa kuona mikutano yetu namna gani, na sababu gani?

¹⁶ Lakini, watu wa Yehova wataendelea kufurahia usalama wa “makao” yao, ni kusema, Yehova Mungu. Kama nabii Habakuki, ‘watafurahi katika Yehova mwenyewe.’ ‘Watakuwa na shangwe katika Mungu wa wokovu wao.’ (Hab. 3:18) Namna gani Yehova ataonekana kuwa “makao” yao wakati huo wenye musukosuko? Tungojee na tutaona. Lakini tunaweza kuwa hakika na jambo hili: Kama ilivyokuwa wakati Waisraeli walitoka Misri, ‘mukutano mukubwa’ utaongozwa vizuri na kufuata muongozo wa Mungu kwa uangalifu. (Ufu. 7:9; soma Kutoka 13:18.) Uongozi huo utatoka kwa Mungu, labda kupitia makutaniko. Kwa kweli, inaonekana kwamba kuna uhusiano kati ya maelfu ya makutaniko duniani pote na ‘vyumba vya ndani’ vyenye kutoa ulinzi, kama ilivyotabiriwa katika Isaya 26:20. (Soma.) Je, unaona mikutano ya kutaniko kuwa ya maana sana? Je, unatii mara moja muongozo ambao Yehova anatoa kupitia kutaniko?​—Ebr. 13:17.

17. Ni katika maana gani Yehova ni “makao” pia ya watumishi wake waaminifu ambao wamekufa?

¹⁷ Yehova ni “makao” yenye usalama pia ya wale wanaokufa waaminifu mbele ya ziki kubwa. Namna gani? Miaka mingi kisha kufa kwa mababu waaminifu wa Waisraeli, Yehova alimuambia Musa hivi: “Mimi ni Mungu wa . . . Abrahamu, Mungu wa Isaka na Mungu wa Yakobo.” (Kut. 3:6) Kisha kurudilia maneno hayo, Yesu alisema hivi: “Yeye ni Mungu, si wa wafu, bali wa walio hai, kwa maana kwake, hao wote wako hai.” (Lu. 20:38) Bila shaka, watumishi waaminifu wa Yehova ambao wamekufa, machoni pake ni kama vile wanaishi; kufufuliwa kwao ni jambo lililo hakika.​—Mhu. 7:1.

18. Katika ulimwengu mupya, namna gani Yehova atakuwa “makao” ya watu wake katika maana nyingine?

¹⁸ Katika ulimwengu mupya ulio mbele yetu, Yehova atakuwa “makao” ya watu wake katika maana nyingine. Ufunuo 21:3 inasema hivi: ‘Tazama! Hema ya Mungu iko pamoja na wanadamu, naye atakaa pamoja nao.’ Kwanza, Yehova atakaa pamoja na wakaaji wa dunia mupya kupitia Yesu Kristo. Mwishoni mwa ile miaka elfu, Yesu atarudishia Baba yake Ufalme kisha kutimiza kabisa kusudi la Mungu kuhusu dunia. (1 Kor. 15:28) Kisha wanadamu wakamilifu hawatahitaji tena Yesu awapatanishe na Yehova; Yehova atakuwa pamoja nao. Huko mbele yetu kuna mambo mazuri kabisa. Lakini, tunapongojea mambo hayo, acheni tujikaze kuiga watumishi wa Yehova wa zamani kwa kumufanya Yehova kuwa ‘makao yetu.’