1-3. Ni faida gani utakazopata kwa kuendelea kusoma Biblia na kutumikisha mashauri yake?

 “NINAMUSHUKURU Yehova kila asubuhi kwa kuwa amenisaidia kuielewa Biblia.” Dada mwenye kuzeeka aliyesema maneno hayo amekwisha kusoma Biblia nzima zaidi ya mara 40, na anaendelea kufanya hivyo. Dada mumoja kijana aliandika kwamba usomaji wa Biblia umemusaidia kujua kwamba Yehova ni mutu halisi, yeye si mutu wa kuwazia tu. Kwa hiyo, amemukaribia zaidi Baba yake wa mbinguni. Anasema hivi: “Sasa nimekuwa na furaha kubwa katika maisha yangu!”

² Mutume Petro aliwatia moyo Wakristo wote ‘wakuze [ao wakomalishe] tamaa ya maziwa yasiyochanganywa kitu ambayo ni ya lile neno.’ (1 Pet. 2:2) Wale wanaotosheleza tamaa hiyo kwa kujifunza Biblia na kutumikisha mashauri yake wana zamiri safi na furaha ya kweli katika maisha kwa sababu wanaishi kulingana na mapenzi ya Mungu. Wanafanya urafiki unaodumu pamoja na wengine wanaomupenda na kumutumikia Mungu wa kweli. Hizo ni sababu zinazotufanya ‘tuipende sheria ya Mungu.’ (Rom. 7:22) Lakini kuna faida nyingine nyingi tunazoweza kupata. Ni faida gani hizo?

³ Unapoendelea kujifunza mengi juu ya Yehova na Mwana wake, utawapenda zaidi na utawapenda wanadamu wengine. Ujuzi wa kweli wa Maandiko utakusaidia kutambua namna karibuni Mungu ataharibu ulimwengu huu na kuokoa wanadamu watiifu. Kwa kweli, hiyo ni habari njema unayoweza kuwaelezea wengine. Yehova atakubariki unapofundisha wengine yale ambayo umejifunza katika Neno lake.

4. Kusoma Biblia kwa “sauti ya chini” kunamaanisha nini?

⁴ Yehova hataki watumishi wake wasome Neno lake haraka-haraka. Mungu alimuambia Yoshua hivi: ‘Kitabu hiki cha sheria kisiondoke katika kinywa chako, nawe ukisome kwa sauti ya chini muchana na usiku.’ (Yos. 1:8; Zab. 1:2) Je, maneno hayo yanamaanisha kwamba tunapaswa  kusoma maandiko kuanzia Mwanzo mupaka Ufunuo kwa sauti ya chini tu? Hapana. Maneno hayo yanamaanisha kwamba namna yetu ya kusoma inapaswa kutupatia nafasi ya kutafakari ao kufikiri sana juu ya yale tunayosoma. Kusoma Biblia “kwa sauti ya chini” kutakusaidia kukazia akili sehemu fulani unazoweza kutumia na zinazoweza kukutia moyo wakati huo. Unapokutana na misemwa, mistari, ao masimulizi kama hayo, soma polepole, na labda unaweza kujisemesha kuhusu maneno unayosoma. Wazo fulani nzito la Maandiko linaweza kugusa moyo wako katika njia fulani inayokuhusu wewe. Sababu gani hilo ni jambo la maana? Kwa sababu kuelewa maana ya shauri la Mungu kutakuchochea utumikishe mambo unayosoma.

5-7. Toa mifano inayoonyesha namna kusoma Neno la Mungu kwa sauti ya chini kunavyoweza kutusaidia (a) kuwa na mwenendo safi; (b) kuwavumilia wengine na kuwaonyesha wema; (c) kumutumaini Yehova hata wakati wa matatizo.

⁵ Kusoma Biblia kwa sauti ya chini ni kwa maana sana tunaposoma vitabu fulani vya Biblia ambavyo hatuzoee kusoma. Acheni tufikirie mifano mitatu. Kwanza, fikiria ndugu fulani kijana ambaye amefika kwenye unabii wa Hosea katika programe yake ya usomaji wa Biblia. Katika sura ya 4, anasimama kidogo kisha kusoma mistari ya 11 mupaka 13 ili atafakari. (Soma Hosea 4:11-13.) Sababu gani? Maandiko hayo yanamufanya afikiri kwa sababu wanafunzi wenzake wanamusumbua ili afanye uasherati. Anapotafakari juu ya mistari hiyo, anaanza kufikiri hivi: ‘Yehova anaona makosa ambayo watu wanafanya hata ikiwa wako pekee yao. Sitaki kumukosea.’ Kwa hiyo, ndugu huyo anaamua kwamba ataendelea kuwa na mwenendo safi mbele ya Mungu.

⁶ Katika mufano wa pili, fikiria dada Mukristo anayesoma unabii wa Yoeli na anafika kwenye sura ya 2, mustari wa 13. (Soma Yoeli 2:13.) Anaposoma andiko hilo kwa sauti ya chini, anafikiria namna anavyoweza kumuiga Yehova, ambaye ‘ana neema na rehema, si mwepesi wa hasira naye ni mwingi wa fazili zenye upendo.’ Kwa hiyo, anaamua kwamba atajikaza kuondoa maneno ya zihaka na maneno makali anayotumia wakati fulani anapozungumuza na bwana yake ao na watu wengine.

⁷ Mufano wa tatu: Fikiria baba Mukristo ambaye amepoteza kazi yake na kwa hiyo anajiuliza ikiwa bibi na watoto wake wataishi namna gani. Anasoma kwa sauti ya chini andiko la Nahumu 1:7, kwamba Yehova ‘anatambua wale wanaotafuta kimbilio kwake’ na anawalinda kama “ngome katika siku ya taabu.” Mawazo hayo yanamufariji kabisa. Anatambua kwamba Yehova anatuhangaikia kwa upendo na anaacha kuogopa kupita kiasi. Kisha anasoma kwa sauti ya chini mustari wa 15. (Soma Nahumu 1:15.) Ndugu yetu anatambua kwamba anapohubiri wakati wa matatizo, anaonyesha kwamba anamuona Yehova kuwa ngome yake kabisa. Anapoendelea kutafuta kazi ya kimwili, ndugu huyo anajikaza pia kutegemeza programe ya mahubiri kila juma.

8. Eleza kwa kifupi hazina ya kiroho ambayo umevumbua katika usomaji wako wa Biblia.

⁸ Mawazo hayo yenye kutia moyo ambayo tumezungumuzia yanapatikana katika vitabu vya Biblia ambavyo watu fulani wanaweza kufikiri kwamba ni vigumu kuelewa. Unapochunguza kitabu cha Hosea, Yoeli, na Nahumu ukiwa na tamaa ya kujua mengi, utapenda kusoma mistari mingine ya vitabu hivyo kwa sauti ya chini. Wazia hekima na faraja nyingi utakayopata katika vitabu vya manabii hao! Unafikiri nini basi kuhusu vitabu vingine vya Biblia? Neno la Mungu ni kama mahali wanapochimba almasi (diamant). Chimba vizuri mahali hapo. Kwa kweli, unapaswa kusoma Biblia yote nzima ili upate hazina, ni kusema, uongozi wa Mungu na mashauri yanayoweza kukutia nguvu.

9. Tunaweza kufanya nini ili kuelewa vizuri zaidi mambo tunayosoma?

⁹ Hata ikiwa ni jambo la maana kusoma sehemu fulani ya Biblia kila siku, tunapaswa  pia kujikaza kuelewa vizuri zaidi mambo tunayosoma. Kwa hiyo, tunapaswa kutumia vizuri vichapo ambavyo tengenezo la Yehova linatutolea ili kujua mengi juu ya watu wanaozungumuziwa katika Biblia, mahali walipoishi, na mambo yaliyotendeka wakati wao. Na ikiwa unajiuliza namna unavyoweza kutumia fundisho fulani la Biblia katika maisha yako, unaweza kuomba muzee fulani wa kutaniko ao Mukristo fulani mwenye kukomaa kiroho akusaidie. Ili tuone faida ya kujikaza kuelewa vizuri zaidi mambo tunayosoma, acheni tuzungumuzie Mukristo mumoja wa wakati wa mitume aliyejikaza kufanya hivyo. Mukristo huyo ni Apolo.

10, 11. (a) Namna gani Apolo alisaidiwa ili awe muhubiri muzuri zaidi wa habari njema? (b) Habari ya Apolo inatufundisha nini? (Soma kisanduku “Je, Unaendelea Kufundisha Mambo ya Zamani?”)

¹⁰ Apolo alikuwa Mukristo Muyahudi “mwenye ujuzi mwingi wa Maandiko” na “mwenye kuwaka roho.” Kitabu cha Matendo kinasema kumuhusu hivi: ‘Alianza kusema na kuyafundisha kwa usahihi mambo juu ya Yesu, lakini alikuwa anaufahamu ubatizo wa Yohana tu.’ Bila kujua, Apolo alikuwa anafundisha mambo ya zamani kuhusu ubatizo. Kisha kumusikiliza akifundisha katika muji wa Efeso, Wakristo wawili, Akila na bibi yake Prisila, walimufasiria “kwa usahihi zaidi njia ya Mungu.” (Mdo. 18:24-26) Namna gani hilo lilimusaidia Apolo?

¹¹ Kisha kuhubiri katika muji wa Efeso, Apolo alienda Akaya. ‘Alipofika huko, aliwasaidia sana wale waliokuwa wameamini kwa sababu ya fazili zisizostahiliwa za Mungu; kwa maana kwa juhudi nyingi alisibitisha kikamili hazarani kuwa Wayahudi ni wenye makosa, huku akionyesha kwa Maandiko kwamba Yesu alikuwa ndiye Kristo.’ (Mdo. 18:27, 28) Kisha kusaidiwa na Akila na Prisila, Apolo alianza kufasiria vizuri maana ya ubatizo wa Kikristo. Kwa kuwa alikuwa ameelewa mambo vizuri zaidi, Apolo ‘aliwasaidia sana’ wapya ili wafanye maendeleo katika ibada ya kweli.  Habari hiyo inatufundisha nini? Kama Apolo, tunajikaza kuelewa vizuri yale tunayosoma katika Biblia. Lakini, mwamini mwenzetu aliyekomaa kiroho akitutolea mashauri kuhusu namna ya kufundisha vizuri zaidi, tunapaswa kukubali mashauri hayo kwa unyenyekevu na kumushukuru. Tukifanya hivyo, utumishi wetu mutakatifu utakuwa muzuri zaidi.

12, 13. Eleza namna kutumia Maandiko kwa hekima kunavyoweza kusaidia wanafunzi wa Biblia wafanye maendeleo ya kiroho.

¹² Tunaweza kuwasaidia wengine kama walivyofanya Prisila, Akila na Apolo. Unajisikia namna gani unapomusaidia mutu fulani anayependezwa, kushinda tatizo linalomuzuia kufanya maendeleo ya kiroho? Ao ikiwa wewe ni muzee wa kutaniko, unajisikia namna gani wakati ndugu ao dada fulani anakushukuru kwa sababu mashauri ya Biblia uliyomutolea yalimusaidia kupambana na matatizo fulani? Kwa kweli, tunajisikia wenye kutosheka na wenye furaha tunapotumia Neno la Mungu ili kusaidia wengine wafanye maisha yao yawe mazuri zaidi. * Tuzungumuzie namna tunavyoweza kufanya hivyo.

¹³ Waisraeli wengi wa wakati wa Eliya walikuwa wenye kusitasita. Mashauri ambayo nabii Eliya aliwatolea yanaweza kumusaidia mwanafunzi wa Biblia anayesita kufanya maendeleo ya kiroho. (Soma 1 Wafalme 18:21.) Fikiria mufano mwengine: Ikiwa mutu fulani mwenye kupendezwa anaogopa rafiki zake ao familia yake, unaweza kumutia moyo aamue kumuabudu Yehova kwa kufikiri naye kuhusu andiko la Isaya 51:12, 13.​—Soma.

14. Unapaswa kufanya nini ili kukumbuka maandiko unapoyahitaji?

¹⁴ Bila shaka, kuna maneno mengi katika Biblia yanayoweza kutia moyo, kusahihisha na kutia nguvu wasomaji wake. Lakini unaweza kujiuliza, ‘Ninapaswa kufanya nini ili kukumbuka maandiko ninapoyahitaji?’ Soma Biblia na utafakari juu ya mawazo ya Mungu kila siku. Kwa kufanya hivyo, utakuwa na maandiko mengi ambayo roho ya Mungu inaweza kukumbusha unapoyahitaji.​—Mk 13:11; soma Yohana 14:26. *

15. Unapaswa kufanya nini ili kuelewa vizuri zaidi Neno la Mungu?

¹⁵ Kama Mufalme Sulemani, muombe Yehova hekima ili kutimiza vizuri madaraka yako ya kiteokrasi. (2 Nya. 1:7-10) Kama manabii wa zamani, fanya “uchunguzi kwa bidii na kutafuta kwa uangalifu” katika Neno la Mungu ili upate ujuzi wa kweli juu ya Yehova na mapenzi yake. (1 Pet. 1:10-12) Mutume Paulo alimutia moyo Timotheo ajilishe “maneno ya imani na fundisho zuri.” (1 Tim. 4:6) Ukifanya hivyo, utawasaidia wengine vizuri ili wafanye maendeleo ya kiroho. Wakati huo huo, utakuwa ukiifanya imani yako iwe nguvu.

16. (a) ‘Kuchunguza Maandiko kwa uangalifu kila siku’ kuliwaletea Waberoya faida gani? (b) Sababu gani ni jambo la maana sana tusome Biblia kila siku?

¹⁶ Wayahudi walioishi Beroya, katika muji wa Makedonia walizoea ‘kuyachunguza Maandiko kwa uangalifu kila siku.’ Paulo alipowahubiria Wayahudi hao habari njema, walilinganisha mambo aliyosema na Maandiko waliyojua. Walipata faida gani? Wengi walisadiki kwamba alikuwa akifundisha kweli, na “wakawa waamini.” (Mdo. 17:10-12) Hilo linaonyesha kwamba kusoma Biblia kila siku kunafanya imani yetu iwe nguvu. Imani hiyo, ni kusema,  “tarajio lililohakikishwa la mambo yanayotumainiwa,” ni ya maana sana ili tuokolewe na kuingia katika ulimwengu mupya wa Mungu.​—Ebr. 11:1.

17, 18. (a) Namna gani imani yenye nguvu na upendo vinaweza kulinda moyo wa mufano wa Mukristo? (b) Namna gani tumaini linatuepusha na hatari?

¹⁷ Paulo alikuwa na sababu nzuri ya kuandika hivi: ‘Lakini kwa habari yetu sisi tulio wa muchana, na tutunze akili zetu na kuvaa bamba la kifuani la imani na upendo na lile tumaini la wokovu kama kofia ya chuma.’ (1 Thes. 5:8) Moyo wa askari unapaswa kulindwa ili usiumizwe na adui. Vilevile, moyo wa mufano wa Mukristo unapaswa kulindwa ili usiumizwe na nguvu ya zambi. Ni jambo gani linaloweza kutokea wakati mutumishi wa Yehova anaonyesha imani yenye nguvu katika ahadi za Mungu na upendo kwa Mungu na wanadamu wenzake? Mutumishi huyo anavaa bamba la kifuani lenye kuwa nguvu kabisa. Kufanya hivyo kunaweza kumusaidia asifanye jambo lolote linaloweza kumufanya akataliwe na Mungu.

¹⁸ Mutume Paulo alizungumuzia pia kofia, ni kusema, “tumaini la wokovu.” Zamani, askari angepoteza maisha yake kwa urahisi katika vita ikiwa hangefunika kichwa chake. Lakini ikiwa angevaa kofia nzuri ya chuma, hangeumizwa kwenye kichwa ikiwa anatupiwa kitu fulani. Tunapojifunza Neno la Yehova, tumaini letu katika nguvu yake ya kuokoa linakuwa nguvu. Tumaini lenye nguvu linatusaidia kuepuka waasi-imani na ‘maneno yao matupu’ yanayoweza kuharibu hali yetu ya kiroho. (2 Tim. 2:16-19) Tumaini letu litatupatia nguvu ya kutowasikiliza wale wanaoweza kutuchochea kufanya mambo yanayomuchukiza Yehova.

19, 20. Sababu gani na namna gani tunaonyesha kama Neno la Mungu ni kitu cha maana sana? (Soma kisanduku “Yehova Ananipa Tu Kile Ninachohitaji.”)

¹⁹ Kadiri mwisho unavyokaribia, tunapaswa kutegemea uongozi wa Neno la Mungu zaidi na zaidi. Mashauri tunayopata katika Neno la Mungu yanatusaidia kuacha tabia mbaya na kuzuia mwelekeo wetu wa zambi. Vitia moyo na faraja tunavyopata katika Neno la Mungu vitatusaidia kushinda majaribu ya Shetani na ulimwengu wake. Uongozi wa Neno la Yehova utatusaidia kubaki katika barabara inayoongoza kwenye uzima wa milele.

²⁰ Kumbuka kwamba Mungu anataka “watu wa namna zote waokolewe.” Watumishi wa Yehova ni kati ya ‘watu hao wa namna zote.’ Watu hao wanatia ndani wale tunaohubiri na kufundisha. Lakini wote wanaotaka kuokolewa wanapaswa kupata “ujuzi sahihi wa kweli.” (1 Tim. 2:4) Kwa hiyo, kuokoka katika siku za mwisho kunategemea sana kusoma Biblia na kutumikisha maagizo yaliyoongozwa na roho ya Mungu. Bila shaka, kwa kusoma Biblia kila siku tunaonyesha namna tunavyosamini sana Neno la kweli la Yehova.​—Yoh. 17:17.