1. (a) Ni sifa gani ambazo Mukristo anaweza kukumbuka kwanza anapomufikiria Yehova? (b) Kujifunza kuhusu sifa za Yehova kunaweza kutufaidi namna gani?

 UNAPOMUFIKIRIA Yehova, ni sifa zake gani unazoweza kukumbuka kwanza? Wengi kati yetu wanafikiria kwanza upendo, haki, hekima, na nguvu. Lakini, tunajua kwamba Yehova ana sifa zingine nyingi zenye kuvutia. Kwa kweli, unaweza kupata sifa zaidi ya 40, na kila sifa imezungumuziwa katika vichapo vyetu. Tunaweza kuvumbua mambo mengi yenye kupendeza kumuhusu Yehova kupitia funzo letu la pekee ao funzo la familia. Kujifunza kuhusu sifa za Yehova kunaweza kutufaidi namna gani? Kunaweza kutusaidia tumupende sana Baba yetu wa mbinguni. Na kumupenda sana Yehova kutatuchochea tumukaribie zaidi na kumuiga.​—Yos. 23:8; Zab. 73:28.

2. (a) Onyesha kupitia mufano namna tunavyoweza kuanza kupendezwa sana na sifa za Yehova. (b) Tutazungumuzia nini?

² Lakini, “kupendezwa sana” na jambo fulani kunamaanisha nini? Katika habari hii, maneno “kupendezwa sana” yanamaanisha kutambua kwamba jambo fulani ni la maana sana. Mutu anaweza kupendezwa sana na jambo fulani hatua kwa hatua. Kwa mufano, tunaweza kuanza kupendezwa sana na chakula fulani wakati tunasikia harufu yacho kwa mara ya kwanza, kisha tunakionja, na mwishowe tunakipika sisi wenyewe. Vivyo hivyo, tunaanza kupendezwa sana na sifa za Yehova tunapojifunza kuhusu sifa hizo, tunapozifikiria, na kisha tunapozionyesha katika maisha yetu. (Efe. 5:1) Kusudi la habari hii na habari mbili zinazofuata ni kutusaidia tupendezwe sana na sifa zingine za Yehova kuliko kufikiria tu sifa zake kubwa. Tutakapozungumuzia sifa fulani, tutaona kwanza maana ya sifa hiyo, kisha, namna Yehova anavyoionyesha, na mwishowe namna tunavyoweza kumuiga Yehova kwa kuonyesha sifa hiyo.

3, 4. (a) Mutu mwenye kukaribiwa kwa urahisi ni mutu wa namna gani? (b) Namna gani Yehova anatuhakikishia kwamba yeye ni mwenye kukaribiwa kwa urahisi?

³ Tuzungumuzie kwanza sifa ya kuwa mwenye kukaribiwa kwa urahisi. Mutu mwenye kukaribiwa kwa urahisi ni mutu wa namna gani? Unaweza kusema kwamba ni, ‘mutu mwema, anayepatikana kwa urahisi, na ambaye ni rahisi kuzungumuza naye.’ Mara nyingi, tunaweza kutambua ikiwa mutu fulani ni mwenye kukaribiwa kwa urahisi ao hapana kwa kumusikiliza na kutazama ishara za mwili wake, ishara za uso wake, kama vile sura yenye kicheko, na ishara zingine anazofanya bila hata kusema jambo lolote.

⁴ Namna gani Yehova anaonyesha kwamba yeye ni mwenye kukaribiwa kwa urahisi? Ijapokuwa Yehova ni Mweza-Yote na Muumba wa ulimwengu wote, yeye anatuhakikishia kwamba iko tayari kusikiliza na kujibu sala zetu. (Soma Zaburi 145:18; Isaya 30:18, 19.) Tunaweza kuzungumuza naye kwa muda murefu, wakati wowote, na mahali popote. Tunaweza kumukaribia kwa uhuru, tukijua kwamba hatatulaumu kwa kufanya hivyo. (Zab. 65:2; Yak. 1:5) Biblia inapozungumuzia Yehova, inatumia maneno ambayo mwanadamu anaweza kuelewa ili kuonyesha kwamba anataka tumukaribie. Kwa mufano, mutunga-zaburi aliandika kwamba ‘macho ya Yehova yanatuelekea’ sisi na ‘mukono wake wa kuume unatushika sana.’ (Zab. 34:15; 63:8) Nabii Isaya alimulinganisha Yehova na muchungaji alipoandika hivi: ‘Atawakusanya pamoja wana-kondoo kwa mukono wake; naye atawabeba katika kifua chake.’ (Isa. 40:11) Jaribu kuwazia jambo hili! Yehova anataka tuwe karibu sana naye kama mwana-kondoo aliye katika kifua cha muchungaji mwenye upendo. Baba yetu Yehova ni mwenye kukaribiwa kwa urahisi kabisa. Namna gani tunaweza kumuiga?

5. Sababu gani wazee wanapaswa kuwa wenye kukaribiwa kwa urahisi?

⁵ Siku fulani zilizopita, Mashahidi wa  Yehova wenye bidii wanaoishi sehemu mbalimbali za dunia waliulizwa hivi: “Ni sifa gani ambayo ungependa muzee wa kutaniko aonyeshe?” Wengi walisema kwamba walipenda muzee “awe mutu mwenye kukaribiwa kwa rahisi ao ambaye ni rahisi kuzungumuza naye.” Kwa kweli, kila Mukristo anapaswa kukomalisha sifa hiyo kwa ukamili, lakini zaidi sana wazee. (Isa. 32:1, 2) Dada mumoja alionyesha sababu gani sifa hiyo ni ya maana sana kwa muzee aliposema hivi: “Tunaweza kufaidika na sifa zingine za muzee ikiwa tu yeye ni mwenye kukaribiwa kwa urahisi.” Dada huyo alisema kweli, sivyo? Lakini mutu anapaswa kufanya nini ili awe mwenye kukaribiwa kwa urahisi?

6. Ni nini siri ya kuwa mwenye kukaribiwa kwa urahisi?

⁶ Siri ya kuwa mwenye kukaribiwa kwa urahisi ni kupendezwa kikweli na wengine. Ikiwa muzee anawahangaikia wengine na anapenda kuwatumikia, ndugu na dada zake, na hata watoto, watamukaribia kwa urahisi. (Mk. 10:13-16) Carlos mwenye miaka 12 anasema hivi: “Ninafurahi ninapoona wazee wakionyesha sura yenye kicheko na wakipendezwa na wengine katika Jumba la Ufalme.” Bila shaka, muzee anaweza kusema kama yeye ni mwenye kukaribiwa kwa urahisi, lakini hilo halitoshe; yeye anapaswa pia kuonyesha sifa hiyo. (1 Yoh. 3:18) Namna gani anaweza kufanya hivyo?

7. Sababu gani kuvaa kitambulisho cha mukusanyiko kunachochea watu wazungumuze nasi, na hilo linaweza kutufundisha nini?

⁷ Fikiria jambo hili. Siku fulani zilizopita, ndugu mumoja alivaa kitambulisho chake cha mukusanyiko alipokuwa katika ndege akirudi nyumbani kisha kuhuzuria mukusanyiko katika inchi zingine. Mutu aliyekuwa akifanya kazi katika ndege hiyo alipoona maneno ‘Ufalme Wako Uje!’ kwenye kitambulisho hicho, alimuambia ndugu hivi: “Ndiyo kabisa, ni lazima uje—ningependa tuzungumuze mengi kuhusu jambo hilo.” Baadaye, walizungumuzia jambo hilo na mufanyakazi huyo alikubali magazeti yetu kwa furaha. Wengi kati yetu wamekutana na mambo kama hayo. Lakini, sababu gani mara nyingi kuvaa kitambulisho cha mukusanyiko kunachochea watu wazungumuze nasi? Kwa sababu, katika njia fulani kitambulisho hicho kinawaambia watu hivi: “Musiogope kunikaribia. Muniulize mahali ninapoenda.” Kitambulisho ni alama inayoonyesha watu kwamba tuko tayari kuwaambia mambo tunayoamini. Vivyo hivyo, muzee wa kutaniko anapaswa kuonyesha ndugu na dada kwamba iko tayari kuzungumuza nao. Ni mambo gani yanayoonyesha hilo?

8. Namna gani wazee wanaonyesha kwamba wanapendezwa kikweli na wengine, na hilo linaweza kuwa na matokeo gani juu ya kutaniko?

⁸ Kila inchi ina desturi zake, lakini kwa kawaida tunapowaonyesha ndugu na dada zetu sura yenye kicheko, tunapowakaribisha kwa shauku kwa kuwapatia mukono, tunapowasalimu kwa furaha, tunaonyesha kwamba tunapendezwa nao kikweli. Ni nani anayepaswa kuchukua hatua ya kwanza? Fikiria mufano ambao Yesu alituachia. Mathayo anaripoti kwamba kwenye mukutano mumoja aliofanya pamoja na wanafunzi wake, ‘Yesu aliwakaribia na kuwaambia [kuzungumuza nao].’ (Mt. 28:18) Vivyo hivyo, wazee wanachukua hatua ya kwanza ya kuwakaribia waamini wenzao na kuzungumuza nao. Hilo linaweza kuwa na matokeo gani juu ya kutaniko? Dada mumoja painia mwenye miaka 88 alisema hivi: “Wazee wanapozungumuza nami wakionyesha sura yenye kicheko na kunitia moyo ninapoingia katika Jumba la Ufalme, hilo linanifanya niwapende.” Dada mwengine mwaminifu aliongeza hivi: “Inaweza kuonekana kuwa jambo ndogo, lakini muzee anaponikaribisha kwenye mikutano akiwa na sura yenye kicheko, hilo linanitia moyo sana.”

9, 10. (a) Yehova anatuwekea mufano gani muzuri? (b) Namna gani wazee wanaonyesha kwamba wanapatikana kwa urahisi?

 ⁹ Bila shaka, watu hawawezi kutukaribia kwa urahisi ikiwa hatupatikane kwa urahisi. Yehova anatuwekea mufano muzuri katika jambo hilo. ‘Hayuko mbali na kila mumoja wetu.’ (Mdo. 17:27) Wazee wa kutaniko wanaonyesha kwamba wanapatikana kwa urahisi kwa kutafuta wakati wa kuongea na ndugu na dada, vijana na wazee, mbele na kisha mikutano. Ndugu mumoja painia alisema hivi: “Muzee anaponiuliza habari zangu na kuchukua wakati wa kusikiliza jibu langu, ninajisikia kuwa mutu wa maana sana katika kutaniko.” Dada mumoja ambaye amemutumikia Yehova kwa miaka karibu 50 alisema hivi: “Wazee wanaotafuta wakati ili kuzungumuza nami kisha mikutano wananifanya nijisikie kuwa mutu wa maana sana katika kutaniko.”

¹⁰ Bila shaka, wazee wa kutaniko wana kazi zingine za kufanya. Hata hivyo, wanapaswa kujiwekea muradi wa kupendezwa na kondoo za Yehova kwenye mikutano.

11, 12. (a) Kutokuwa na ubaguzi kunamaanisha nini? (b) Yehova anatuwekea mufano gani?

¹¹ Yehova hana ubaguzi. Hiyo ni sifa nyingine inayovutia. Kutokuwa na ubaguzi kunamaanisha nini? Kunamaanisha kuwatendea watu kwa haki ao kutowapendelea. Ili kuepuka ubaguzi tunapaswa kwanza kuamini katika moyo wetu kwamba kila mutu anastahili kutendewa kwa haki na tunapaswa kumutendea hivyo. Sababu gani ni lazima kufanya hivyo? Kwa sababu ikiwa tunaamini katika moyo wetu kwamba kila mutu anastahili kutendewa kwa haki, tutamutendea bila ubaguzi. Katika Maandiko ya Kigiriki, maneno “hana ubaguzi” yanamaanisha moja kwa moja “kutoangalia sura,” ao kutopendelea sura fulani kuliko ingine. (Mdo. 10:34; Kingdom Interlinear) Kwa hiyo, mutu asiye na ubaguzi, haangalie sura ao hali za inje, lakini anaangalia sifa za mutu.

¹² Yehova ni mufano mukubwa wa kutokuwa na ubaguzi. Neno lake linatuambia kwamba “hana ubaguzi” na ‘hamutendee yeyote kwa ubaguzi.’ (Soma Matendo 10:34, 35; Kumbukumbu 10:17.) Kuna jambo lililotokea wakati wa Musa linaloonyesha hivyo.

13, 14. (a) Binti watano wa Selofehadi walipambana na tatizo gani? (b) Namna gani Yehova alionyesha kwamba hana ubaguzi?

 ¹³ Mbele tu Waisraeli waingie katika Inchi ya Ahadi, binti watano wasioolewa wa Selofehadi walikuwa na tatizo fulani. Tatizo gani? Walijua kwamba kama familia zingine za Waisraeli, familia yao ilipaswa kupewa shamba ambalo baba yao angepewa. (Hes. 26:52-55) Hata hivyo, baba yao aliyekuwa wa kabila la Manase, alikuwa amekufa. Kulingana na Sheria, watoto wanaume wa Selofehadi ndio wangepaswa kuriti shamba lake, lakini alikuwa na binti tu. (Hes. 26:33) Kwa kuwa Selofehadi hakuwa na mutoto mwanaume, je, shamba lake lingepewa  watu wa jamaa? Je, binti zake wangebaki bila uriti?

¹⁴ Binti hao watano walimukaribia Musa na kumuuliza hivi: “Kwa nini jina la baba yetu liondolewe kutoka katikati ya familia yake kwa sababu hakuwa na mwana [mutoto mwanaume]?” Na walimusihi hivi: “Tupe miliki katikati ya ndugu za baba yetu.” Je, Musa aliwajibu hivi: ‘Sheria imesema, sina jambo lingine la kufanya’? Hapana, ‘aliweka kesi yao mbele za Yehova.’ (Hes. 27:2-5) Yehova alimujibu namna gani? Yehova alimuambia Musa hivi: ‘Binti za Selofehadi wanasema jambo lililo sawa. Wape miliki ya uriti katikati ya ndugu za baba yao, nawe utaupitisha uriti wa baba yao kwao.’ Yehova hakusimamia hapo. Alimuagiza Musa aongeze maneno haya katika Sheria: ‘Ikiwa mutu yeyote atakufa bila kuwa na mwana, mutaupitisha uriti wake kwa binti yake.’ (Hes. 27:6-8; Yos. 17:1-6) Kuanzia wakati huo na kuendelea, wanawake wote Waisraeli ambao wangepatwa na tatizo hilo wangepaswa kutendewa kama binti za Selofehadi.

15. (a) Namna gani Yehova anawatendea watumishi wake, zaidi sana wale wasio na mutu wa kuwasemea? (b) Ni masimulizi gani mengine ya Biblia yanayoonyesha kwamba Yehova hana ubaguzi?

¹⁵ Huo ulikuwa uamuzi muzuri na usio na ubaguzi kabisa. Yehova aliwatendea kwa heshima binti hao ambao hawakuwa na mutu wa kuwasemea kama vile alivyowatendea Waisraeli wote. (Zab. 68:5) Habari hii ni moja ya masimulizi mengi ya Biblia yanayotufundisha jambo hili lenye kuchangamusha moyo: Yehova anawatendea watumishi wake wote bila ubaguzi.​—1 Sam. 16:1-13; Mdo. 10:30-35, 44-48.

16. Namna gani tunaweza kuachana kabisa na tabia ya kuwabagua wengine?

¹⁶ Namna gani tunaweza kumuiga Yehova? Kumbuka kwamba tutatendea wengine bila ubaguzi ikiwa tu tunaamini katika moyo wetu kwamba kila mutu anastahili kutendewa kwa haki. Kwa kweli, sisi wote tunafikiri kwamba tuna maoni yanayofaa juu ya watu wengine na kwamba hatuna ubaguzi. Lakini, labda utakubali kwamba si rahisi siku zote kujijua vizuri. Kwa hiyo, tunaweza kufanya nini ili kujua kwamba hatuna ubaguzi? Yesu alipotaka kujua maoni ambayo watu walikuwa nayo kumuhusu, aliwauliza hivi rafiki zake wenye kutumainika: “Watu wanasema Mwana wa binadamu ni nani?” (Mt. 16:13, 14) Je, hauwezi kufanya kama Yesu? Unaweza kumuuliza rafiki yako ambaye hawezi kukuficha jambo lolote ili akuambie ikiwa wewe una ubaguzi ao hapana. Utafanya nini ikiwa anakuambia kwamba wewe una muelekeo wa kupendelea tu watu wa rangi, jamii fulani, ao walio na feza? Sali Yehova kwa bidii kuhusu hali yako, umulilie akusaidie kubadili muelekeo wako ili uachane kabisa na tabia ya kuwabagua wengine.​—Mt. 7:7; Kol. 3:10, 11.

17. Ni katika njia gani tunaweza kuwatendea wengine bila ubaguzi?

 ¹⁷ Katika kutaniko la Kikristo, tunaonyesha kama tunapenda kuiga sifa ya Yehova ya kutokuwa na ubaguzi kwa kuwaheshimu na kuwatendea wengine mema. Kwa mufano, ikiwa tunataka kuwaalika waamini wenzetu nyumbani kwetu, ni vizuri tualike ndugu na dada wa hali zote, hata wale walio na desturi zinazotofautiana na zetu, vilevile maskini, mayatima ao wajane. (Soma Wagalatia 2:10; Yakobo 1:27.) Zaidi ya hilo, katika kazi yetu ya kuhubiri, tunawatangazia watu wote habari njema bila ubaguzi, hata watu kutoka inchi za kigeni. Vichapo vyetu vinapatikana katika luga 600 hivi. Hilo ni jambo linalohakikisha kwamba hatuna ubaguzi!

18. Namna gani wewe unaweza kuonyesha kwamba unapendezwa sana na sifa ya Yehova ya kuwa mwenye kukaribiwa kwa urahisi na kutokuwa na ubaguzi?

¹⁸ Kwa kweli, kuchukua wakati wa kufikiria sifa ya Yehova ya kuwa mwenye kukaribiwa kwa urahisi na kutokuwa na ubaguzi, kutatufanya tumupende sana. Hilo litatuchochea kuiga sifa zingine za Yehova, kuzionyesha katika uhusiano wetu na ndugu na dada zetu na wale tunaohubiria.