“Wakati wa Kupenda na Wakati wa Kuchukia”

“MUNGU ni upendo.” Katika nchi fulani watu huweka maneno hayo kwenye fremu na kuyaning’iniza kwenye ukuta ndani ya nyumba zao. Kwa kweli ni maneno mazuri yanayoonyesha jinsi Mungu alivyo—mfano bora zaidi wa upendo.

Hata hivyo, watu wengi hawajui kwamba maneno hayo yako katika Biblia. Mtume Yohana ndiye aliyeandika: “Yeye ambaye hapendi hajamjua Mungu, kwa sababu Mungu ni upendo.” (1 Yohana 4:8) Yohana aliandika hivi pia kuhusu upendo wa Mungu kuelekea ulimwengu wa wanadamu wanaoweza kuokolewa: “Kwa maana Mungu aliupenda ulimwengu sana hivi kwamba akamtoa Mwana wake mzaliwa-pekee, ili kila mtu anayemwamini asiangamizwe bali awe na uzima wa milele.”—Yohana 3:16.

Kwa sababu hiyo, watu fulani hufikiri kwamba Mungu hatilii maanani mambo tunayofanya. Maisha ya watu wengi yanadhihirisha wanaamini kwamba hata watende kwa njia gani, Mungu hatawahukumu kwa sababu ya matendo yao. Lakini je, ni kweli? Je, Mungu anawapenda watu wote, wazuri kwa waovu? Je, kuna wakati ambapo Mungu huchukia?

Upendo na Chuki ya Mungu

Mfalme Sulemani mwenye hekima alisema: “Kuna wakati uliowekwa wa kila kitu, hata kuna wakati wa kila jambo chini ya mbingu . . . wakati wa kupenda na wakati wa kuchukia.” (Mhubiri 3:1, 8) Kulingana na kanuni hiyo, ingawa Mungu ana upendo mwingi na fadhili, kuna wakati ambapo anaonyesha chuki.

Kwanza, neno “chuki” linamaanisha nini kama linavyotumiwa katika Biblia? Kitabu kimoja cha marejeo kinajibu: “Katika Maandiko neno ‘chuki’ lina maana mbalimbali. Huenda likamaanisha uadui, kumtakia mtu mabaya pamoja na kumwonea wivu mbaya. Chuki kama hiyo inaweza kuwa hisia kali inayomchochea mtu atake kumuumiza mtu anayemchukia.” Hii ndiyo aina ya chuki tunayojua zaidi, na matokeo yake yanaonekana ulimwenguni kote. Lakini kitabu hichohicho kinaendelea kusema: “‘Chuki’ inaweza pia kuwa hisia ya kutopendezwa kabisa bila kuwa na kusudi la kumuumiza mtu unayemchukia.”

Tutazungumzia maana hiyo ya pili. Chuki hiyo ni kutopendezwa kabisa, bali si wivu wenye chuki, uadui, au tamaa ya kusababisha madhara. Je, Mungu anaweza kuwa na chuki ya aina hiyo? Ona maneno yaliyoandikwa kwenye Methali 6:16-19: “Kuna vitu sita ambavyo Yehova huchukia; naam, vitu saba vinachukiza nafsi yake: macho ya majivuno, ulimi wa uwongo, na mikono inayomwaga damu isiyo na hatia, moyo unaotunga hila zenye kuumiza, miguu iliyo myepesi kukimbilia ubaya, shahidi wa uwongo anayesema uwongo, na yeyote anayetokeza magomvi kati ya ndugu.”

Kama tunavyoona, kuna matendo fulani ambayo Mungu anachukia. Lakini si lazima  amchukie mtu anayetenda mambo hayo. Anaona hali zinazomsukuma mtu atende kwa njia hiyo, kama vile, udhaifu wa kimwili, mazingira, malezi, na kutojua. (Mwanzo 8:21; Waroma 5:12) Mwandikaji wa Methali anaeleza jambo hilo kwa kutumia mfano mzuri: “Yeye ambaye Yehova anampenda, humkaripia, kama vile baba anavyomkaripia mwana anayemfurahia.” (Methali 3:12) Mzazi anaweza kuchukia tabia ya mtoto wake ya kutotii, lakini bado mzazi anampenda mtoto wake na anafanya yote anayoweza ili kumsaidia abadilishe tabia hiyo mbaya kwa kumtia nidhamu. Akichochewa na upendo, Yehova huchukua hatua kama hiyo ikiwa kuna matumaini ya kumwokoa mtu anayetenda dhambi.

Chuki Inayofaa

Namna gani ikiwa mtu anajua mapenzi ya Mungu lakini akatae kuyafanya? Mtu huyo hataonyeshwa upendo na Mungu, bali atakosa kibali chake. Akizoea kutenda kimakusudi mambo ambayo Yehova anachukia, Mungu atamchukia. Kwa mfano, Biblia inasema: “Yehova humchunguza mwadilifu na pia mwovu, na mtu yeyote anayependa jeuri nafsi Yake hakika inamchukia.” (Zaburi 11:5) Mtu kama huyo asiyetubu hawezi kusamehewa, kama vile mtume Paulo anavyosema waziwazi katika barua yake kwa Waebrania: “Tukizoea kutenda dhambi kimakusudi baada ya kupokea ujuzi sahihi juu ya kweli, hakuna tena dhabihu yoyote iliyobaki kwa ajili ya dhambi, lakini kuna tarajio hakika lenye kuogopesha la hukumu na kuna wivu unaowaka moto ambao utawateketeza wale wanaopinga.” (Waebrania 10:26, 27) Kwa nini Mungu mwenye upendo anachukua msimamo huo?

Mtu akizoea kutenda dhambi nzito kimakusudi, uovu unaweza kutia mizizi kabisa ndani yake hivi kwamba mtu huyo hawezi kuuacha. Anaweza kuwa mpotovu, mzoefu, asiyeweza kubadilika. Biblia inamlinganisha mtu huyo na chui ambaye hawezi kubadili madoa yake. (Yeremia 13:23) Kwa vile hawezi kutubu, mtu huyo anafanya ile ambayo Biblia inaiita “dhambi ya milele,” ambayo haina msamaha.—Marko 3:29.

Ndivyo ilivyokuwa kwa Adamu na Hawa na pia kwa Yuda Iskariote. Kwa kuwa Adamu na Hawa waliumbwa wakiwa wakamilifu na kwa vile amri ambayo Mungu aliwapa ilikuwa wazi na wote wawili waliielewa, bila shaka walitenda dhambi kwa kupenda na kimakusudi na hivyo hawangesamehewa. Baadaye Mungu alipozungumza nao hakuwapa nafasi ya kutubu. (Mwanzo 3:16-24) Ingawa Yuda hakuwa mkamilifu, alikuwa ameshirikiana kwa ukaribu na Mwana wa Mungu na bado akawa msaliti. Yesu mwenyewe alimwita “mwana wa maangamizi.” (Yohana 17:12) Pia, Biblia inaonyesha  kwamba Ibilisi amekuwa akitenda dhambi kimakusudi kwa muda mrefu na anangojea tu kuangamizwa. (1 Yohana 3:8; Ufunuo 12:12) Wote hao walifanya Mungu awachukie.

Hata hivyo, inapendeza kujua kwamba miongoni mwa watu ambao wametenda dhambi kuna wale ambao wanaweza kusamehewa. Yehova ni mwenye subira sana na hafurahii kuwaadhibu wale ambao wametenda dhambi kwa sababu ya kutojua. (Ezekieli 33:11) Anawapa nafasi ya kutubu ili wasamehewe. Tunasoma hivi: “Mtu mwovu aiache njia yake, na mtu mwenye madhara ayaache mawazo yake; naye arudi kwa Yehova, ambaye atamwonyesha rehema, na kwa Mungu wetu, kwa maana atasamehe kwa njia kubwa.”—Isaya 55:7.

Maoni Yenye Usawaziko Kuhusu Upendo na Chuki

Ni wazi kwamba kwa kumwiga Mungu, Wakristo wa kweli wanapaswa kujua “wakati wa kupenda” na “wakati wa kuchukia.” Mtu anapoongozwa na hisia anaweza kuwa na maoni yasiyo na usawaziko kuhusu upendo na rehema. Lakini maneno ya mwanafunzi Yuda yanaweza kutusaidia kuwa na maoni yenye usawaziko kuhusu kuonyesha rehema na kuchukia dhambi: “Endeleeni kuonyesha wengine rehema, mkifanya hivyo kwa kuogopa, huku mkilichukia hata vazi la ndani ambalo mwili umelitia doa.” (Yuda 22, 23) Kwa hiyo, tunapaswa kuchukia yaliyo mabaya lakini si kumchukia mtu anayefanya mabaya.

Wakristo wanaamriwa pia wawaonyeshe upendo adui zao kwa kuwatendea mema. Yesu alisema: “Endeleeni kuwapenda adui zenu na kusali kwa ajili ya wale wanaowatesa ninyi.” (Mathayo 5:44) Hiyo ndiyo sababu Mashahidi wa Yehova hawachoki kuwahubiria majirani zao habari njema za Ufalme wa Mungu tena na tena, hata ingawa baadhi yao hawasikilizi ujumbe huo. (Mathayo 24:14) Kwa kuwa maoni yao yanaongozwa na Biblia, Mashahidi wanaamini kwamba kila mtu anaweza kupokea upendo na rehema ya Yehova. Jitihada zao za kuwasaidia watu zisipothaminiwa au wanapopingwa au hata kuteswa, Mashahidi wanafuata shauri hili la mtume Paulo: “Endeleeni kuwabariki wale wanaowatesa; muwe mkibariki wala msiwe mkilaani . . . Msimlipe yeyote uovu kwa uovu.” (Waroma 12:14, 17) Wanajua kwamba Yehova ndiye atakayeamua wale atakaowapenda na wale atakaowachukia. Ndiye Mwamuzi wa mwisho katika mambo yanayohusu uhai na kifo.—Waebrania 10:30.

Ndiyo, “Mungu ni upendo.” Nasi tunapaswa kuthamini upendo wake na kujitahidi kutambua mapenzi yake kisha tuyafanye. Mashahidi wa Yehova katika eneo lenu watafurahi kukusaidia ujifunze kutoka katika Biblia yako mwenyewe mapenzi ya Mungu ni nini na jinsi unavyoweza kuyafanya katika maisha yako. Ukifanya hivyo, utaepuka chuki ya Mungu na kufurahia upendo wake.

[Blabu katika ukurasa wa 23]

“Kuna vitu sita ambavyo Yehova huchukia; naam, vitu saba vinachukiza nafsi yake: macho ya majivuno, ulimi wa uwongo, na mikono inayomwaga damu isiyo na hatia, moyo unaotunga hila zenye kuumiza, miguu iliyo myepesi kukimbilia ubaya, shahidi wa uwongo anayesema uwongo, na yeyote anayetokeza magomvi kati ya ndugu.”—METHALI 6:16-19

[Blabu katika ukurasa wa 24]

“Tukizoea kutenda dhambi kimakusudi baada ya kupokea ujuzi sahihi juu ya kweli, hakuna tena dhabihu yoyote iliyobaki kwa ajili ya dhambi, lakini kuna tarajio hakika lenye kuogopesha la hukumu.”—WAEBRANIA 10:26, 27

[Blabu katika ukurasa wa 25]

“Mtu mwovu aiache njia yake, na mtu mwenye madhara ayaache mawazo yake; naye arudi kwa Yehova, ambaye atamwonyesha rehema . . . Ata[m]samehe kwa njia kubwa.”—ISAYA 55:7

[Picha katika ukurasa wa 24]

Mzazi mwenye upendo anamtia nidhamu mtoto wake ili amsaidie

[Picha katika ukurasa wa 25]

Wafungwa wengi wamefaidika na upendo na rehema ya Mungu