Musa—Mwanaume Aliyeonyesha Unyenyekevu
UNYENYEKEVU NI NINI? Unyenyekevu ni kutokuwa na majivuno ao kiburi. Mutu munyenyekevu hawaone watu wengine kuwa chini yake. Mwanadamu yeyote asiye mukamilifu ambaye ni munyenyekevu anapaswa pia kuwa mwenye kiasi, ni kusema, mutu anayetambua mipaka yake.
![[Picha katika ukurasa wa 5]](https://assetsnffrgf-a.akamaihd.net/assets/m/2013085/univ/wpub/2013085_univ_cnt_1_xs.jpg)
MUSA ALIONYESHA UNYENYEKEVU NAMNA GANI? Mamlaka hayakumufanya Musa awe mwenye kiburi. Mara nyingi, wakati mutu anapewa mamlaka kidogo tu, bila kukawia anaonyesha wazi ikiwa yeye ni munyenyekevu ao mwenye kiburi. Robert Ingersoll, aliyekuwa muandikaji kati ya mwaka wa 1801 na 1900 alisema hivi: “Watu wengi wanaweza kuvumilia shida. Lakini ikiwa unataka kumujua mutu kabisa, mupatie mamlaka.” Kwa habari hiyo, Musa alionyesha mufano muzuri sana wa unyenyekevu. Namna gani?
Musa alipewa mamlaka kubwa, kwa sababu Yehova alimupatia daraka la kuongoza Waisraeli. Hata hivyo, mamlaka hayo hayakumufanya Musa awe mwenye kiburi hata kidogo. Kwa mufano, fikiria namna alivyotambua mipaka yake alipotatua tatizo ngumu juu ya haki ya kuriti. (Hesabu 27:1-11) Hilo lilikuwa tatizo ngumu, kwa sababu uamuzi huo ungetumiwa kuwa sheria kwa vizazi vingine ambavyo vingefuata.
Musa angefanya nini? Je, angefikiri kama alikuwa na uwezo wa kuchukua uamuzi juu ya jambo hilo, kwa sababu yeye ndiye alikuwa kiongozi wa Israeli? Je, angetegemea uwezo wake mwenyewe, miaka yake ya uzoefu, ao kujua kwake vizuri namna Yehova anavyofikiri?
Labda mutu mwenye kiburi angefanya uamuzi huo. Lakini Musa hakufanya hivyo. Biblia inatuambia hivi: “Musa akaiweka kesi yao mbele za Yehova.” (Hesabu 27:5) Fikiria hili! Hata kisha kuongoza taifa la Israeli kwa miaka 40, Musa hakujitegemea, lakini aliendelea kumutegemea Yehova. Hilo linatuonyesha wazi kama Musa alikuwa munyenyekevu.
Musa hakufikiri kwamba ni yeye tu ndiye aliyepaswa kuwa na mamlaka. Alifurahi wakati Yehova aliwaruhusu Waisraeli wengine watende kama manabii. (Hesabu 11:24-29) Wakati baba-mukwe wake alimushauria achague watu wengine ambao wangemusaidia kufanya kazi fulani, Musa alitumia kwa unyenyekevu shauri hilo. (Kutoka 18:13-24) Na mwishoni mwa maisha yake, ijapokuwa alikuwa angali na nguvu za kimwili, alimuomba Yehova achague mutu mwengine ambaye angeongoza taifa la Israeli mahali pake. Wakati Yehova alimuchagua Yoshua, Musa alimuunga mukono kwa moyo wote mwanaume huyo kijana, na akawatia watu moyo wafuate uongozi wa Yoshua ambaye angewaingiza katika Inchi ya Ahadi. (Hesabu 27:15-18; Kumbukumbu la Torati 31:3-6; 34:7) Bila shaka, Musa aliona kuwaongoza Waisraeli katika ibada ya Yehova kuwa pendeleo. Lakini hakutumia mamlaka yake ili kuwaonea wengine.
TUNAWEZA KUJIFUNZA NINI JUU YA UNYENYEKEVU WA MUSA? Hatutake hata kidogo kuruhusu uwezo, mamlaka, ao vipawa vyetu vitufanye kuwa wenye kiburi. Tukumbuke hili: Ili Yehova atutumie, unyenyekevu wetu ni wa maana zaidi kuliko vipawa vyetu. (1 Samweli 15:17) Ikiwa sisi ni wanyenyekevu kwelikweli, tutajikaza kufuata shauri hili la Biblia lenye hekima: ‘Umutegemee Yehova kwa moyo wako wote wala usitegemee uelewaji wako mwenyewe.’—Methali 3:5, 6.
Mufano wa Musa unatufundisha pia kwamba hatupaswi kuona cheo chetu ao mamlaka yetu kuwa jambo la maana sana.
Je, tunafaidika kwa kuiga mufano wa Musa wa unyenyekevu? Bila shaka! Tunapokomalisha unyenyekevu wa kweli, tunafanya maisha ya watu wanaotuzunguka yawe mazuri zaidi, na hivyo tunawafanya watu hao watupende. Na jambo la maana hata zaidi, tunafanya Yehova Mungu, ambaye anaonyesha sifa hiyo nzuri, atupende. (Zaburi 18:35) ‘Mungu anawapinga wenye [kiburi], lakini anawapa wanyenyekevu fazili zisizostahiliwa.’ (1 Petro 5:5) Hiyo ni sababu nzuri kabisa inayotufanya tuige unyenyekevu wa Musa, sivyo?
