Janet anasema hivi: “Wakati kidogo kisha baba yangu kufa, bwana yangu aliniambia kama alikuwa anapendana na mwanamuke mwengine. Muda mufupi kisha hapo, alikamata vitu vyake, na bila kunijulisha tena, akaniacha na watoto wetu wawili.” Janet alipata kazi, lakini mushahara wake ulikuwa mudogo na haungemuwezesha kuendelea kulipia nyumba yao. Na zaidi ya mahangaiko ya feza, Janet alikuwa na mahangaiko mengine. Anakumbuka hivi: “Nilihangaika sana kwa sababu ya madaraka mapya yenye nilipaswa kushugulikia peke yangu. Nilijisikia kuwa na kosa kwa sababu sikuweza kupatia watoto wangu mambo yote yenye walikuwa nayo lazima kama vile wazazi wengine wanafanya. Na hata leo, ninahangaika juu ya namna watu wengine wananiona mimi na watoto wangu. Wanajiuliza ikiwa nilifanya yangu yote ili kulinda ndoa yangu?”

Sala inamusaidia Janet kuzuia mahangaiko yake na kufanya urafiki pamoja na Mungu. “Wakati wa usiku ndio wakati mugumu zaidi, kwa sababu kila kitu kiko kimya na siwezi kuzuia mahangaiko yangu. Kusali na kusoma Biblia kunanisaidia nipate usingizi. Ninapenda sana andiko la Wafilipi 4:6, 7 lenye kusema hivi: ‘Musihangaike juu ya kitu chochote, bali [lakini] katika kila jambo kwa sala na dua pamoja na kutoa shukrani maombi yenu na yajulishwe Mungu; na amani ya Mungu yenye ubora unaozidi fikira zote itailinda mioyo yenu na nguvu zenu za akili.’ Siku nyingi, nimesali usiku muzima na nimejisikia kuwa amani kutoka kwa Yehova imenifariji.”

Maneno ya Yesu yenye kutia moyo ambayo alisema juu ya sala katika Mahubiri yake ya Mulimani yanatumika juu ya mahangaiko ya kila namna. Alisema hivi: ‘Baba yenu anajua ni vitu gani munahitaji hata kabla hamujamuomba.’ (Mathayo 6:8) Lakini ni lazima tumuombe. Sala ndiyo njia ya maana zaidi ya kutusaidia ‘tumukaribie Mungu.’ Na wakati tunamukaribia, ‘naye atatukaribia.’—Yakobo 4:8.

Sala inatufanya tujisikie muzuri kwa sababu tumeeleza mahangaiko yetu, lakini inatimiza pia mambo mengine. Yehova, ‘Musikiaji wa sala,’ anatenda pia kwa ajili ya wale wote wenye kumutafuta kwa imani. (Zaburi 65:2) Ndiyo sababu Yesu alifundisha wanafunzi wake ‘wasali sikuzote bila kukata tamaa.’ (Luka 18:1) Tunapaswa kuendelea kumuomba Mungu muongozo na musaada wake, tukiwa hakika kuwa atatusaidia. Hatupaswe kuwa na mashaka juu ya nia yake ao uwezo wake wa kutenda. ‘Kusali bila kuacha’ kwa njia hiyo kunaonyesha kuwa tuko na imani ya kweli.—1 Wathesalonike 5:17.

Lakini imani ni nini kabisa? Ili kuwa na imani inaomba kumujua Mungu kuwa mutu wa kweli. (Yohana 17:3) Kwanza, tunafanya hivyo kwa kujifunza mawazo ya Mungu yenye kuwa katika Biblia. Tunaelewa kuwa anamuona kila mumoja wetu na anataka kutusaidia. Lakini, imani ya kweli inamaanisha mambo mengi, haiko tu kujua jambo fulani juu ya Mungu. Inamaanisha pia kuwa na urafiki wenye heshima pamoja naye. Kama vile hatuwezi kufanya urafiki na mwanadamu kwa siku moja tu, vilevile inaomba wakati ili kufanya urafiki kama huo na Mungu. Imani yetu inaendelea ‘kuongezeka’ wakati tunajifunza mambo mengi juu yake, wakati ‘tunafanya mambo yanayomupendeza,’ na wakati tunaona kuwa anatusaidia. (2 Wakorintho 10:15; Yohana 8:29) Imani ya namna hiyo ndiyo ilisaidia Janet kupiganisha mahangaiko yake.

Janet anasema hivi: “Jambo lenye limesaidia kabisa kujenga imani yangu ni kuona namna Yehova ananisaidia kila mara. Mara nyingi tulipambana na ukosefu wa haki wenye tuliona kuwa hatuwezi kuvumilia. Nilisali sana na kila mara Yehova alitokeza njia ili kutusaidia, njia yenye mimi mwenyewe singewazia hata kidogo. Wakati ninamushukuru, ninakumbuka mambo mengi yenye amenifanyia. Kila mara anatusaidia kwa wakati wenye kufaa, mara nyingi wakati tuko na lazima kabisa ya musaada. Na amenipatia marafiki wa kweli ambao ni ndugu na dada Wakristo wa kweli. Kila wakati wanakuwa tayari kunisaidia na ni mifano mizuri kwa watoto wangu.” *

“Nimeelewa sababu gani Yehova anasema, katika andiko la Malaki 2:16, kama ‘anachukia talaka.’ Kwa bibi ao bwana mwenye hana kosa, talaka (kuvunjika kwa ndoa) ndilo jambo lenye kuvunja moyo sana. Kumepita miaka mingi tangu bwana yangu aliniacha, lakini wakati fulani ninaendelea kujisikia kuwa peke yangu na kujiona kuwa siko mutu wa maana. Wakati ninajisikia hivyo, ninajikaza kufanya jambo fulani ili kusaidia mutu mwengine, na kila mara hilo linanisaidia pia.” Kwa kufanya hivyo, Janet anatumikisha kanuni ya Biblia ya kuepuka kujitenga na wengine, na hilo linamusaidia apunguze mahangaiko yake. *—Methali 18:1.

Janet anasema hivi: “Jambo lenye linanitia moyo sana, ni kujua kuwa Mungu ni ‘Baba ya wavulana [watoto] wasio na baba na muamuzi wa wajane.’ Hatatuacha hata siku moja kama vile bwana yangu alituacha.” (Zaburi 68:5) Janet anajua kama Mungu hatujaribu na “mambo maovu [mabaya].” Lakini anapatia watu “wote kwa ukarimu” hekima na anatupatia “nguvu zinazopita zile za kawaida” ili kutusaidia tupiganishe mahangaiko yetu.—Yakobo 1:5, 13; 2 Wakorintho 4:7.

Lakini tunaweza kufanya nini ikiwa tuko na mahangaiko kwa sababu maisha yetu iko katika hatari?