Nasueng Paskah, Yesus dingangu manga murite nẹ̌bal᷊ị sarang Galilea kụ limiu Samaria. Maraning soa Sikhar, i Yesus nahumpạ su pahighing i Yakub. I sie něngirul᷊e ndaị sene, kụ manga murite nakoạ sarang soa něměli kaěng.

Bọu ene, piạ sěngkatau wawine diměnta gunang měngalạ akẹ. Yesus nẹ̌kiwal᷊o si sie, ’Botonge iạ mẹ̌dorong akẹ?’ Wawine ene simimbahẹ̌, ’Kawe i Tuang nẹ̌bisara si siạ? Iạ ini tau Samaria. Biasane tau Yahudi madiri mẹ̌bisara dingangu tau Samaria.’ Yesus naul᷊ị si sie, ’Mạeng i kau masingkạ i sai iạ, i kau sarung mẹ̌dorong inumang si siạ, kụ iạ sarung měgělị akẹ u pěbawiahẹ̌ si kau.’ Wawine ene nẹ̌kiwal᷊o, ’Kerea i Tuang měnimbạ akẹ ene? Si Tuang tawẹ apa tatimbạ.’ Yesus simimbahẹ̌, ’Taumata apang měnginung akẹ takụ gělịkang seng tawe saụ marou.’ I sie nẹ̌bera, ”Tuang, gělịko si siạ akẹ ene.”

Bọu ene Yesus něbera, ’Kuiko kawingu sarang ini.’ I sie simimbahẹ̌, ’Iạ tawẹ apa kawingku.’ Yesus nẹ̌bera, ’Kahěngang. I kau seng limang sul᷊ẹ nẹ̌kawing, kụ orasẹ̌ ini i kau mětẹ̌tanạ dingangu esẹ bal᷊inẹ kawingu.’ I sie něbera, ’I Tuang ini nabi. Tau Samaria mangimang taumata botonge měngibadah su Mawu su wul᷊udẹ̌ ini, katewe tau Yahudi nẹ̌bera taumata botonge měngibadah kětạeng su Yerusalem. Iạ mangimang, mạeng i Mesias duměnta i sie sarung měněntiro si kami carane měngibadah.’ Bọu ene i Yesus naul᷊ị, ’Iạ i Mesias.’ Buhudeng ene i Yesus naul᷊ị su taumata soal u hal᷊ẹ̌ ene.

 Wawine ene masahawụ-sahawụ napul᷊ẹ kụ naul᷊ị su tau Samaria, ’Su pěndangku iạ seng nẹ̌sombang dingangi Mesias. I sie masingkạ kěbị haghi soal u iạ. Mahịe i kitẹ matamai!’ I sire timol᷊e si sie sarang pahighi kụ dimaringihẹ̌ i Yesus něněntiro.

I sire němaringang si Yesus sarang soang i sire. I sie něněntiro sene karěngụe dua ěllo, kụ lawọ mangimang si sie. I sire naul᷊ị su wawine ene, ’Su apang bọu dimaringihẹ̌ su esẹ ene, i kami mangimang i sie měnanal᷊amatẹ̌ dunia ini.’