Su apang bọu nisahani, i Yesus něnětạ něhabarẹ̌: ’Kararatuangu Mawu seng marani.’ Manga murite timol᷊e si sie sarang Galilea dingangu Yudea. Su tempong i Yesus nẹ̌bal᷊ị sarang kamponge Nazaret, i sie nakoạ sarang sinagoga arau tampạ pěngangibadang, bọu ene němuka gulungan Yesaya. I sie nẹ̌basa, ’Yehuwa něgělị si siạ rohkẹ̌ masusi tadeạu iạ botonge měhabarẹ̌ habarẹ̌ mapia.’ Apa mangal᷊ene bawera ene? Maning taumata mapulu i Yesus měkoạ mukjizat, katewe alasang kahumotongange i Yesus nighělịkangu rohkẹ̌ masusi ute gunang mẹ̌bawa habarẹ̌ mapia. Bọu ene, i sie naul᷊ị su taumata sene, ’Těbal᷊ẹ̌ su ayatẹ̌ ini, seng naghanapẹ̌ sahěllo ini.’

Bọu ene, Yesus nakoạ sarang Laudẹ̌ Galilea. Sene, i sie nẹ̌sombang dingangu ěpạu katau tahasomạ kụ sarung makoạ murite. I sire ene kai i Petrus, Andreas, Yakobus, dingangi Yohanes. I sie němaringang si sire, ’Tol᷊ẹe si siạ, kụ iạ sarung měkoạ si kamene makoạ měnanomạ taumata.’ I sire apidu něněntang hal᷊ẹ̌ i sire kụ timol᷊e si sie. I sire nakoạ sarang patikụ Galilea gunang měhabarẹ̌ Kararatuangu Mawu. I sire něhabarẹ̌ ene su tampạ pěngangibadang, pasarẹ̌, dingangu ral᷊eng. Maning saranga i sire rumal᷊eng, lawọ taumata tụtol᷊e si sire. Běke soal i Yesus nikaringihẹ̌ sarang lawọ tampạ, sarang lai su Siria.

Bọu ene, Yesus něgělị kawasa su pirang katau tumatol᷊ene gunang měnokol᷊ẹ̌ rohkẹ̌ dal᷊akị dingangu mapakapia taumata masakị. Pirang katau lai timol᷊e si sie nakoạ sarang manga soa dingangu kampong gunang měhabarẹ̌ habarẹ̌ mapia. Pirang katau wawine kere i Maria Magdalena, Yohana, dingangi Susana, něngurusẹ̌ kebutuhan i Yesus dingangu tumatol᷊ene.

Su apang bọu něněntiro manga murite, Yesus něngoro si sire pěhabarẹ̌ habarẹ̌ mapia. I sire nakoạ sarang Galilea, kụ lawọ taumata nakoạ muriti Yesus dingangu nisahani. Taumata apang mapulu makoạ murite sěbạe mal᷊awọ, hakị u ene i Yesus napẹ̌sul᷊ung i sire dingangu sasuang kụ seng sadia tipong. I sie nẹ̌bera, ’Pẹ̌doạe tadeạu Yehuwa měndolohẹ̌ limembong mal᷊awọ mělahal᷊ẹ̌ gunang měnipo.’  Bọu ene, i sie němile 70 murite kụ něngoro si sire tahạ duang katau gunang mẹ̌habarẹ̌ habarẹ̌ mapia su Yudea. I sire něněntiro su haghing taumata soal u Kararatuang. Su tempong nẹ̌bal᷊ị, i sire masěmangatẹ̌ nẹ̌běke si Yesus soal u apa seng nikoạ i sire. Habarẹ̌ mapia sarung turusẹ̌ habareng, kụ Setang tawe makaědo hal᷊ẹ̌ ene.

Yesus mapulu manga murite turusẹ̌ měkoạ hal᷊ẹ̌ penting ene maning i sie seng nẹ̌bal᷊ị sarang sorga. Hakị u ene, i sie nẹ̌bera si sire, ’Pěhabarẹ̌ habarẹ̌ mapia ini sarang patikụ dunia. Těntiroi taumata soal u Hengetangu Mawu, kụ sahaniko i sire.’