Su tempong i Yesus dingangu manga rasulẹ̌ ene su sěmbaụ ruangan bageang rasị, i sie nẹ̌bera su manga rasule, ’Hěbi ini, i kamene sarung měněntang si siạ.’ Petrus nẹ̌bera, ’Maning i sire kěbị měněntang si kau, iạ tala.’ Katewe i Yesus nẹ̌bera, ’Těntal᷊ang manụ bědang tawe kimukụ, i kau sarung tělung sulẹ mengaku tawe kěnal᷊ẹ̌ si siạ.’

Su tempong manga prajuritẹ̌ nẹ̌bawa si Yesus sarang bal᷊eng i Kayafas, kal᷊awokange murite timal᷊ang. Katewe, darua muritẹ̌ timol᷊e komol᷊ang ene. Sěngkatau bọu i sire kai i Petrus. I sie simuẹ̌ sarang rělahu wal᷊eng i Kayafas kụ něndarang su těngong putung. Sěngkatau ělang wawine měmẹ̌manda gating i Petrus kụ nẹ̌bera, ’Iạ masingkạ i sai i kau! I kau hapị i Yesus!’

Petrus nẹ̌bera, ’Bal᷊inẹ! I kau nẹ̌sal᷊a!’ Bọu ene, i sie dimal᷊eng sarang gerbang. Katewe, piạ ělang wawine wal᷊inẹ nakasilo si sie kụ nẹ̌bera su taumata sene, ’Tau ini, hapị i Yesus!’ Petrus nẹ̌bera, ’Iạ běga i sai i Yesus!’ Sěngkatau esẹ nẹ̌bera, ’I kau tumatol᷊eng i Yesus! Bọu logatu, iạ masingkạ i kau tau Galilea, kere i Yesus.’ Katewe i Petrus nẹ̌salu, ’Iạ tawe kěnalẹ̌ si sie!’

Su tempo ene manụ kimukụ. Petrus nakasilo i Yesus němanda si sie. I sie nakatahěndung bawerang i Yesus, bọu ene i sie siměbang kụ simangị ual᷊ingu sěbạe nasusah naung.

Su tempo ene, manga anggota Sanhedrin nẹ̌komol᷊ẹ̌ gunang mengadili si Yesus su wal᷊eng i Kayafas. Sanhedrin ene kai pengadilan Yahudi kụ anggotane kai manga těmbonangu agama. I sire někoạ putusang gunang měmate si Yesus, hakị u ene i sire mědẹ̌deạ alasang gunang měkoạ ene. Katewe, i sire tawe nakaěbạ pẹ̌sasalang i Yesus sarang kadodọ. Samurine, i Kayafas langsung nẹ̌kiwal᷊o si Yesus, ’Apa i kau Ahusu Mawu?’ Yesus nẹ̌bera, ’Iya.’ Kayafas nẹ̌bera, ’I kitẹ seng tawe perlu bukti wal᷊inẹ. I sie něhinakang Mawu!’ I sire kěbị setuju i Yesus harusẹ̌ pateěng. I sire němeru si Yesus, něngědu, něnutu  matane, dingangu něměbahẹ̌ si sie apidu naulị, ’Mạeng i kau nabi, paul᷊ị si kami i sai něměbahẹ̌ si kau!’

Su tempong seng naěllo, i sire nẹ̌bawa si Yesus sarang ruangan Sanhedrin kụ saụ nẹ̌kiwal᷊o si sie, ’Apa i kau Ahusu Mawu?’ Yesus simimbahẹ̌, ’Kahěngang, kere niwerang i kamene.’ Tumuhụ si sire i Yesus nẹ̌sal᷊a ual᷊ingu seng něhinakang Mawu. Bọu ene, i sire nẹ̌bawa si sie sarang bal᷊eng i Pontius Pilatus, guběrnurẹ̌ u Roma. Apa nariadi tuhụe? Mahịe i kitẹ mẹ̌basa běke tuhụe.