Nal᷊iu bọu Lěba Maihạ, manga anạ i Noakẹ̌ dingangu kawing i sire nakaěbạ lawọ anạ. Kěluargang i sire nakoạ gěguwạ kụ nakeke su haghing tampạ, kere seng niorong i Yehuwa.

Katewe piram baụ keluarga tawe timuhụ si Yehuwa. I sire nẹ̌bera, ’Mahịe i kitẹ měkoạ sěmbau soa kụ mẹ̌tanạ ndaị sene. I kitẹ sarung měkoạ menara dangẹe sarang langị. I kitẹ sarung makoạ terkenal.’

 Yehuwa madiri i sire měkoạ ene, kụ i Sie mapulu mẹ̌sěding si sire. Apa i kau masingkạ apa nikoạ u Mawu? I Sie někoạ bawerang i sire nẹ̌tatěntang. Ual᷊ingu tawe nakaěna apa niwerang hapịe, i sire něngědo něhal᷊ẹ̌. Soa nikoạ i sire nisěbạ Babelẹ̌, mangal᷊ene ”Kekacauan”. Hakị u ene, taumata něnětạ něngal᷊ing kụ nẹ̌tanạ su patikụ dunia. Katewe i sire turusẹ̌ měkẹ̌koạ barang dal᷊akị su tampạ buhu. Apa bědang piạ taumata masayang si Yehuwa? I kitẹ měngěndung ene su pasalẹ̌ tuhụe.