Su Misirẹ̌, kěluargang i Yakub nisěbạ tau Israel. Su apang i Yakub dingangi Yusuf nate, Firaun buhu něnětạ nẹ̌parenta. Firaun matakụ tau Israel makoạ limembong matoghasẹ̌ bọu tau Misirẹ̌. Hakị u ene, i sie někoạ tau Israel nakoạ ělang. I sire nipaksa pěkoạ tela dingangu pěhal᷊ẹ̌ su baelẹ̌. Maning kerene, tau Israel turusẹ̌ natamba. Firaun madiri ene, kụ i sie něngoro kěbị anạ esẹ u tau Israel apang buhudeng nalahirẹ̌ pakịpate. Tau Israel tantu sěbạe natakụ!

Sěngkatau wawine Israel arenge Yokhebed piạ anạe esẹ masadadạ. Tadeạu anạ ene tawe pateng, Yokhebed nẹ̌taho si sie su karanjang, kụ karanjang ene niwunine su tal᷊oarang manga sasuang su Sal᷊ụ Nil. I Miriam, kakạu dariọ ene, dụdarisị maraning tampạ ene gunang měndiagạ si sie.

Bọu ene, anạ i Firaun wawine nakoạ sarang sal᷊ụ ene gunang měndenọ, kụ i sie nakasilo karanjang ene. Su tempong nakasilo dariọ su ral᷊ungu karanjang ene kimiạ, i sie timal᷊ěntụ. Bọu ene, Miriam nẹ̌kiwal᷊o si sie, ’Apa iạ mẹ̌kuịe  sěngkatau wawine tadeạu anạ ini botonge měnusu si sie?’ Su tempong anạ i Firaun naul᷊ị iya, Miriam nẹ̌kui si mamạe, i Yokhebed. Anạ i Firaun naul᷊ị si Yokhebed, ’Bawạe anạ ini kụ pěnusuko i sie. Iạ sarung měmaehẹ̌ si kau.’

Su tempong anạ ene seng gěguwạ, Yokhebed nẹ̌bawa si sie sarang anạ i Firaun. Anạ i Firaun něgělị areng su anạ ene Musa, kụ i Musa nakoạ kere anạe hala. I Musa nihiking kere sěngkatau pangeran kụ i sie botonge makaěbạ kěbị apa ikẹ̌kapulune. Katewe, i Musa tawe niwul᷊e si Yehuwa. I sie masingkạ i sie kai tau Israel, bal᷊inẹ tau Misirẹ̌. Kụ i sie němile měkoạ kapulung Yehuwa.

Su tempong umure 40 su taunge, i Musa mapulu mẹ̌tul᷊ung tau Israel. Su tempong nakasilo tau Misirẹ̌ něměbahẹ̌ tau Israel, Musa něngoka tau Misirẹ̌ ene sarang nate. Musa němuni mayate su ěne. Su tempong Firaun nakasingkạ, i sie mapulu měmate si Musa. Katewe, i Musa timal᷊ang sarang Midian. Sene, Yehuwa něndiagạ si sie.