Yusuf nalahirẹ̌ su tempong i papạe seng maghurang. Hakị u ene, Yusuf nakoạ anạ kesayangan i Yakub. Tumuhụ si kau, kerea pěndangu manga tuhang i Yusuf? I sire iri dingangu nawěnsing si Yusuf. Su tempong Yusuf nakaěbạ ipi tawe wiasa, i sie nẹ̌běke si sire. Su ipine ene, i sire sarung kumakurung su těngone. I sire sauneng nawěnsing si Yusuf!

Piạ su sahěllo, manga kakạ i Yusuf měnděndiagạ domba maraning soa Syikhem. Yakub něngoro si Yusuf pěmanda apa nikoạ i sire. Su tempong nakasilo si Yusuf bọu marau, i sire naul᷊ị, ’E ramahi tahaipi. Bọete i kitẹ měmate si sie!’ I sire němol᷊eng si sie kụ nirěmẹ sarang pahighi. Katewe Yehuda, sěngkatau kakạe, naul᷊ị, ’Abe pate i sie! Bọete bal᷊ụkang i kitẹ i sie tadeạu makoạ ělang.’ Hakị u ene, i sire nẹ̌bal᷊ụ si Yusuf su tau Midian apang makoạ sarang Misirẹ̌ kụ arěgane 20 keping perak.

Bọu ene, i sire nělaehẹ̌ lakụ i Yusuf su dahang kambing kụ nịdaroho si papạ i sire, apidu timanata, ’Kěnang parikěsa, ini lakụ anạ i papạ arau bal᷊inẹ’. Hakị u ene, Yakub nẹ̌pikirẹ̌ i Yusuf nipateng binatang buas. I sie sěbạe nasusah naung, kụ tawẹ apa taumata botonge makahiborẹ̌ si sie.

Su Misirẹ̌, Yusuf niwal᷊ụ su pejabat penting arenge Potifar gunang makoạ ělang. Katewe i Yehuwa turusẹ̌ mětẹ̌tul᷊ung si Yusuf. Potifar nakasilo i Yusuf mapaelẹ̌ měhal᷊ẹ̌ dingangu botonge kapěngimangeng. Hakị u ene i Potifar něngoro si Yusuf pěngurusẹ̌ kěbị arětạe.

 Kawing i Potifar nakasilo i Yusuf masadadạ dingangu matoghasẹ̌. Ěllo-ěllo i sie měmẹ̌maringang si Yusuf mẹ̌tikị dingange. Apa nikoạ i Yusuf? I sie madiri kụ naul᷊ị, ’Tala! Iạ tawe wotonge měkoạ ene. I tuangku mangimang si sia, kụ i kau kai kawinge. Mạeng iạ mẹ̌tikị dingangu, iạ nẹ̌dosa su těngong Mawu!’

Piạ su sahěllo, kawing i Potifar němaksa si Yusuf mẹ̌tikị dingange. I sie němol᷊eng lakụ i Yusuf, katewe i Yusuf timal᷊ang. Su tempong i Potifar napul᷊ẹ, i sie nẹ̌konti su kawinge. I sie naul᷊ị Yusuf mapulu měměrkosa si sie. I Potifar sěbạe nẹ̌pědu kụ něngoro i Yusuf pakitaho su penjara. Katewe Yehuwa tawe niwul᷊e si Yusuf.