Tau Israel saụ nakoạ tawe satia si Yehuwa kụ něněmbah manga berhala. Su tempong tau Ammon nẹ̌pěrang dingangi sire, manga berhala ene tawe nakatul᷊ung si sire. Taunge tau Israel nasigěsạ. Samurine i sire naul᷊ị si Yehuwa, ’I kami seng nẹ̌dosa. Tul᷊ungko ambange i kami bọu sědụ.’ Tau Israel něminasa manga berhala ene kụ i sire saụ něněmbah si Yehuwa. Yehuwa madiri i sire turusẹ̌ masigěsạ.

Sěngkatau prajurit arenge Yefta nipile gunang makoạ těmbonangu tau Israel lumawang tau Ammon. Yefta naul᷊ị si Yehuwa, ’Mạeng i Kau mẹ̌tul᷊ung si kami makauntung su perang ini, iạ mẹ̌diandi, taumata kahumotongange suměbang bọu wal᷊eku gunang měněnsomahẹ̌ si siạ sarung takụ gělịkang si Kau.’  Yehuwa dimaringihẹ̌ daroang i Yefta kụ nẹ̌tul᷊ung si sie nakauntung.

Su tempong i Yefta napul᷊ẹ, taumata kahumotongange siměbang něněnsomahẹ̌ si sie ene kai anạe wawine, kụ kětạeng ene anạe. Anạe nẹ̌sal᷊ai kụ něnalang rebana. I Yefta nakatahěndung diandine kụ naul᷊ị, ’Aduh, anạku! I kau nakakoạ naungku nasusah. Papạ seng nẹ̌diandi si Yehuwa, kụ gunang měkoạ diandi ene, Papạ harusẹ̌ měmala i kau měhal᷊ẹ̌ su tabernakel su Syilo.’ Katewe anạe nẹ̌bera, ’Papạ, mạeng i Papạ seng nẹ̌diandi si Yehuwa, Papạ harusẹ̌ měkoạ ene. Katewe, iạ mẹ̌dorong tadeạu iạ makoạ sarang bul᷊udẹ̌ kal᷊imona karěngụe dua wul᷊ang dingangu manga hapịku wawine. Bọu ene, iạ makoạ sarang Syilo.’ Anạ i Yefta masatia něhal᷊ẹ̌ su tabernakel su kanandụu wiahe. Sabang taung, manga hapịe mětẹ̌tiwo si sie su Syilo.