Imang Mawantugẹ̌ Eli piạ anạe duang katau, kụ mělẹ̌hal᷊ẹ̌ su tabernakel. Areng i sire Hofni dingangi Pinehas. I sire ini tawe matuhụ su hukung i Yehuwa, kụ i sire dal᷊akị měkoạ tau Israel. Su tempong tau Israel nẹ̌bawa sasěmbah si Yehuwa, Hofni dingangi Pinehas měngal᷊ạ gěsing binatang kapaelange gunang i sire hala. I Eli nakaringihẹ̌ apa nikoạ u manga anạe, katewe i sie tawe někoạ apa-apa. Apa i Yehuwa lai sarung měmala ene?

Maning i Samuel limembong mangudạ bọu i Hofni dingangi Pinehas, i sie bal᷊inẹ kere i sire. Yehuwa mal᷊uasẹ̌ si Samuel. Piạ su sěhěbi, su tempong mětẹ̌tikị, i Samuel nakaringihẹ̌ piạ u nẹ̌kui arenge. I sie nẹ̌bangung kụ natamai sarang i Eli, bọu ene nẹ̌bera, ’Piạ apa Tuang?’ Katewe i Eli simimbahẹ̌, ’Iạ tawe nẹ̌kui si kau. Dakọe saụ pẹ̌tikị.’ I Samuel saụ nẹ̌tikị. Katewe, hal᷊ẹ̌ ene saụ nariadi. Su tempong i Samuel nakaringihẹ̌ tingihẹ̌ mẹ̌sul᷊ung su katělung sul᷊ene, i Eli nakaěna ene kai tingihi Yehuwa. Eli naul᷊ị si Samuel mạeng i sie saụ makaringihẹ̌ tingihẹ̌ ene, i sie harusẹ̌ sumimbahẹ̌, ’Iya, Yehuwa. Ělang’U dụdaringihẹ̌.’

I Samuel saụ nẹ̌tikị. Bọu ene i sie nakaringihẹ̌, ’Samuel! Samuel!’ I sie simimbahẹ̌, ’Iya, Yehuwa. Ělang’U dụdaringihẹ̌.’ Yehuwa naul᷊ị,  ’Paul᷊ị si Eli Iạ sarung měhukung si sie dingangu kěluargane. I sie masingkạ manga anạe někoạ barang dal᷊akị su tabernakel, katewe i sie němala hal᷊ẹ̌ ene. ’Dịěllone mal᷊ukadẹ̌, i Samuel němuka tukadẹ̌ kere biasa kẹ̌koatenge ěllo-ěllo. I sie tawe wahani maul᷊ị si Eli apa niwerang i Yehuwa. Katewe i Eli nẹ̌kui si sie kụ nẹ̌kiwal᷊o, ’Anạku, Yehuwa naul᷊ị apa si kau? Běkẹe si siạ.’ Hakị u ene, i Samuel nẹ̌běke kěbị si Eli.

Samuel turusẹ̌ kakạguwạe, kụ i Yehuwa turusẹ̌ mětẹ̌tul᷊ung si sie. Tau Israel su kěbị negeri ene masingkạ i Yehuwa němile si Samuel nakoạ nabi dingangu hakim.