Yehuwa seng něhengkẹ manga hakim gunang makoạ těmbonangu bangsa Israel. Katewe i sire mapulu piạ datu. I sire naul᷊ị si Samuel, ’Bangsa wal᷊inẹ piạ datung i sire. I kami lai mapulu kere i sire.’ Samuel nẹ̌pěndang ene nẹ̌sal᷊a, hakị u ene i sie nẹ̌doa si Yehuwa. Yehuwa naul᷊ị si sie, ’I sire bal᷊inẹ madiri si kau, katewe i sire madiri si Siạ. Paul᷊ịko si sire, i sire botonge piạ datu, katewe datu ene sarung mẹ̌dorong lawọ hal᷊ẹ̌ bọu i sire.’ Maning kerene, i sire tawe nẹ̌pandung kụ tatapẹ̌ mapulu piạ datu.

Yehuwa naul᷊ị si Samuel, sěngkatau esẹ arenge i Saul sarung makoạ datung Israel humotong. Su tempong i Saul nakoạ sarang i Samuel su Rama, Samuel něhengkẹ si sie nakoạ datu kụ něněbohẹ̌ lana su těmbọe.

Bọu ene, i Samuel něngoro tau Israel pẹ̌tampung gunang měnodẹ datu wuhu si sire. Katewe i Saul tawe dịe. Apa i kau masingkạ su apa i sie? I sie nẹ̌kěmbuni su tal᷊oarang manga barang. Su tempong i sire nakaěbạ si Saul, i sire nẹ̌bawa si sie kụ něngoro si sie darisị su tal᷊oarang taumata. I Saul limembong marangẹ bọu kěbị taumata sene kụ sěbạe masadadạ. Samuel naul᷊ị, ’Ini taumata seng nipileng Yehuwa.’ Taumata sěbạe mal᷊uasẹ̌ nakasilo datung i sire.’

Humotong, Datu Saul dụdaringihẹ̌ si Samuel dingangu matuhụ si Yehuwa. Katewe samurine i sie seng tawe matuhụ. Contone, i Saul sěběnarẹ̌e tawe wotonge mẹ̌taho sasěmbah su mezbah. Samuel seng něngoro si Saul pěngampal᷊ẹ̌ si sie. Katewe ual᷊ingu i Samuel marěngụ diměnta, i Saul něnutung sasěmba ene. Ual᷊ingu ene, i Samuel naul᷊ị si sie, ’I kau seng tawe timuhụ si Yehuwa.’ Apa i Saul nẹ̌tobatẹ̌?

Bọu ene, su tempong i Saul nẹ̌pěrang limawang tau Amalek, Samuel naul᷊ị taumata dingangu binatang harusẹ̌ pate. Katewe i Saul tawe němate si Datu Agag. Yehuwa nẹ̌bera si Samuel, ’I Saul seng něněntang si Siạ, kụ i sie tawe dimaringihẹ̌ si Siạ.’ Samuel sěbạe  nasusah naung, kụ i sie naul᷊ị si Saul, ’Ual᷊ingu i kau tawe timuhụ si Yehuwa, i Sie sarung měmile datu wal᷊inẹ.’ Su tempong i Samuel seng mapul᷊ẹ, Saul němol᷊eng pondol᷊u pakeang i Samuel, kụ ene naghědẹ. Bọu ene Samuel naul᷊ị si Saul, ’Kere pakeang seng naghědẹ ini, Yehuwa sarung měngal᷊ạ kararatuang ini bọu i kau.’ Yehuwa sarung měgělị kararatuang ene su taumata masayang dingangu matuhụ si Sie.