PĚNGANGĚNDUNGANG 01

Kerea Alkitapẹ̌ Makatul᷊ung si Kau?

MAINKAN

I kitẹ kěbị piạ kakiwal᷊o soal u pěbawiahẹ̌, kasasigěsạ, papate, dingangu soal u tempo mahi. I kitẹ lai měpẹ̌pikirẹ̌ soal u hal᷊ẹ̌ ěllo-ěllo, kere carane mědeạ doitẹ̌ arau kerea tadeạu pěbawiahu keluarga maral᷊uasẹ̌. Lawọ taumata seng nakasingkạ Alkitapẹ̌ tawe kětạeng nakatul᷊ung si sire nakaěbạ sasimbahẹ̌ penting soal u pěbawiahẹ̌, katewe lai něgělị si sire sasasa gunang pěbawiahẹ̌ ěllo-ěllo. Tumuhụ si kau, apa Alkitapẹ̌ makatul᷊ung si kau dingangu makatul᷊ung taumata apang nikěnalẹ̌u?

1. Alkitapẹ̌ simimbahẹ̌ manga kakiwal᷊o kerea?

Alkitapẹ̌ simimbahẹ̌ manga kakiwal᷊o penting ini: Kerea tětạu pěbawiahẹ̌? Apa timonang pěbawiahẹ̌? Kawe nụe taumata tawẹ sal᷊ane nasigěsạ? Apa nariadi su taumata nate? Mạeng kěbị taumata mapulu měbiahẹ̌ mararame, kawe nụe piạ lawọ perang? Su tempo mahi, kerea keadaan dunia? Alkitapẹ̌ němahangsang si kitẹ gunang mědeạ sasimbahu manga kakiwal᷊o ene, kụ jutane taumata seng nakaěbạ sasimbahe.

2. Kerea Alkitapẹ̌ makatul᷊ung si kitẹ su pěbawiahẹ̌ ěllo-ěllo?

Alkitapẹ̌ něgělị si kitẹ sasasa mapaelẹ̌. Contone, Alkitapẹ̌ něněntiro kerea tadeạu keluarga kahěngang-hěngang mal᷊uasẹ̌. Alkitapẹ̌ lai něněntiro apa harusẹ̌ koateng mạeng i kitẹ stres dingangu kerea tadeạu i kitẹ mal᷊uasẹ̌ měhal᷊ẹ̌. Su tempong i kitẹ měngěndung bukẹ̌ ini sěngkasio, i kau sarung makasingkạ apa niul᷊ịu Alkitapẹ̌ soal u manga topik ene dingangu lawọ topik wal᷊inẹ. I kau aramanung sarung makasingkạ ”kěbị lohong Binohẹ Susi [kěbị apang kạbawohẹ su Alkitapẹ̌] . . . piạ gunane”.—2 Timotius 3:16.

Bukẹ̌ ini tawe něngganti Alkitapẹ̌. Katewe, bukẹ̌ ini měmahangsang si kau gunang měmarikěsa hala Alkitapẹ̌. Hakị u ene, basạe manga ayatẹ̌ kạbawohẹ su manga pěngangěndungang ini kụ bandingkan ene dingangu apa seng niěndungangu.

BANGKA PAKARAL᷊UNG

Pẹ̌tiněna kerea Alkitapẹ̌ seng nakatul᷊ung taumata, kerea i kau botonge mal᷊uasẹ̌ mẹ̌basa Alkitapẹ̌, dingangu kawe nụe mapaelẹ̌ mědeạ tul᷊umang tadeạu makaěna lohong Alkitapẹ̌.

3. Alkitapẹ̌ botonge makaahạ si kitẹ

Alkitapẹ̌ mẹ̌sul᷊ungu senterẹ̌. I kitẹ botonge měpakẹ Alkitapẹ̌ gunang měnodẹ kerea carane měkoạ putusang mapaelẹ̌ dingangu gunang mẹ̌tul᷊ung si kitẹ makasingkạ apa sarung mariadi su tempo mahi.

Basa Mazmur 119:105, bọu ene bisarai manga kakiwal᷊o ini:

Kerea pěndangu měmamohẹ mazmurẹ̌ ini soal u Alkitapẹ̌?
Kerea pěndangu soal u Alkitapẹ̌?

4. Alkitapẹ̌ botonge makasimbahẹ̌ manga kakiwal᷊ong i kitẹ

Sěngkatau wawine nakasingkạ Alkitapẹ̌ nakasimbahẹ̌ manga kakiwal᷊o seng taunge tẹ̌tiněnange. Putarẹ̌ VIDEONE, bọu ene bisarai manga kakiwal᷊o ini.

VIDEO: Abe Sarang Kailangengu Pělaharapẹ̌! (1:48)

Su video ene, manga kakiwal᷊o apa tẹ̌tiněnangu wawine ene?
Kerea pěngangěndungang Alkitapẹ̌ nakatul᷊ung si sie?

Alkitapẹ̌ němahangsang si kitẹ gunang turusẹ̌ mẹ̌kiwal᷊o. Basa Matius 7:7, bọu ene bisarai kakiwal᷊o ini:

Manga kakiwal᷊o apa tẹ̌tiněnangu kụ aramanung sasimbahe piạ su Alkitapẹ̌?

5. I kau botonge mal᷊uasẹ̌ mẹ̌basa Alkitapẹ̌

Lawọ taumata mal᷊uasẹ̌ mẹ̌basa Alkitapẹ̌ kụ nakaěbạ gunane bọu Alkitapẹ̌. Putarẹ̌ VIDEONE, bọu ene bisarai manga kakiwal᷊o ini.

VIDEO: Mẹ̌basa Alkitapẹ̌ (2:05)

Su video ene, apa mangangudạ puluang mẹ̌basa?
Maning i sire malasẹ̌ mẹ̌basa, kawe nụe i sire puluang mẹ̌basa Alkitapẹ̌?

Těntirong Alkitapẹ̌ botonge makahiborẹ̌ dingangu makaghělị pělaharapẹ̌ si kitẹ. Alkitapẹ̌ hala naul᷊ị ene. Basa Roma 15:4, bọu ene bisarai kakiwal᷊o ini:

Apa i kau mapulu makasingkạ kerea Alkitapẹ̌ botonge makahiborẹ̌ dingangu makaghělị pělaharapẹ̌ si kitẹ?

6. Taumata wal᷊inẹ botonge makatul᷊ung si kitẹ makaěna lohong Alkitapẹ̌

Lawọ taumata apang nẹ̌basa Alkitapẹ̌ nakaěbạ gunane ual᷊ingu nẹ̌bisara ene dingangu taumata wal᷊inẹ. Basa Kisah 8:26-31, bọu ene bisarai kakiwal᷊o ini:

Kerea i kitẹ botonge makaěna lohong Alkitapẹ̌?—Pěmanda ayatẹ̌ 30 dingangu 31.

Tau Etiopia membutuhkan tul᷊umang gunang makaěna lohong Binohẹ Susi. Lawọ taumata orasẹ̌ ini lai nakaěbạ gunane ual᷊ingu nẹ̌bisara soal u Alkitapẹ̌ dingangu taumata wal᷊inẹ

PIẠ U NAUL᷊Ị: ”Měngěndung Alkitapẹ̌ ene kětạeng makasue tempo.”