Yesus naul᷊ị tau Kristen harusẹ̌ ibaptisẹ̌. (Basa Matius 28:​19, 20.) Katewe, kai apa baptisan ene? Kụ apa harusẹ̌ koateng i kitẹ tadeạu botonge ibaptisẹ̌?

1. Kai apa baptisan ene?

Bawera ”baptisẹ̌” asal᷊e bọu werang Yunani mangal᷊ene ”niurung” su ral᷊ungu akẹ. Su tempong i Yesus nibaptisẹ̌, i sie niurung su Sal᷊ụ Yordan, bọu ene i sie ”siměbang bọu akẹ”. (Markus 1:​9, 10) Kerene lai tau Kristen tutune. Su tempong nibaptisẹ̌, kěbị badange suẹ̌kang, arau urungang, su ral᷊ungu akẹ.

2. Baptisan něnodẹ apa?

Su tempong nibaptisẹ̌, tau nibaptisẹ̌ něnodẹ i sie seng něgělị watangenge su Mawu Yehuwa. Kerea i sie něgělị watangenge si Yehuwa? Těntal᷊ang bědang tawe nibaptisẹ̌, i sie nẹ̌doa kụ naul᷊ị si Yehuwa i sie mapulu mẹ̌tahamawu si Yehuwa sarang karěngụe. I sie nẹ̌diandi kětạeng měněmbah si Yehuwa kụ kapulung Yehuwa makoạ kahumotongange su pěbawiahe. I sie němile gunang ”mẹ̌timbul᷊eng watangeng dingangu . . . turusẹ̌ tumol᷊e” těntiro lai kakanoạ i Yesus. (Matius 16:24) Ual᷊ingu něgělị watangenge si Yehuwa kụ nibaptisẹ̌, i sie botonge mědal᷊ahapị mapia dingangi Yehuwa lai dingangu taumata apang měnẹ̌němbah si Yehuwa.

3. Apa botonge koatengu tadeạu ibaptisẹ̌?

Těntal᷊ang bědang tawe nibaptisẹ̌, hal᷊ẹ̌ penting botonge koatengu ene kai měngěndung soal i Yehuwa dingangu mangimang si Sie. (Basa Ibrani 11:6.) Su tempong kasingkạu kakạtambane dingangu pangangimangu kakạtoghase, i kau sarung kuměndagẹ̌ si Yehuwa. Kụ, i kau sarung mapulu mẹ̌běke soal i Sie dingangu měbiahẹ̌ tuhụ atorang’E. (2 Timotius 4:2; 1 Yohanes 5:3) Su tempong taumata měbiahẹ̌ ’nihino su těngong Yehuwa, dingangu kahěngang-hěngang makal᷊uasẹ̌ si Sie’, tau ene sarung měmutusẹ̌ gunang měgělị pěbawiahe su Mawu kụ ibaptisẹ̌.​—Kolose 1:​9, 10. *

 BANGKA PAKARAL᷊UNG

4. I kitẹ botonge měngěndung bọu baptisan i Yesus

Basa Matius 3:​13-​17 gunang makasingkạ mal᷊awọ soal u baptisan i Yesus. Bọu ene bisarai manga kakiwal᷊o ini:

• Apa i Yesus nibaptisẹ̌ su tempong bědang kadodọ?

• Kerea i sie nibaptisẹ̌? Apa i sie nitědọkangu akẹ su těmbọe?

Su apang bọu nibaptisẹ̌, Yesus něnětạ někoạ hal᷊ẹ̌ seng nighělị u Mawu si sie. Basa Lukas 3:​21-​23 dingangu Yohanes 6:​38, bọu ene bisarai kakiwal᷊o ini:

• Su apang bọu nibaptisẹ̌, hal᷊ẹ̌ apa nakoạ kahumotongange su pěbawiahi Yesus?

5. Baptisan kai hal᷊ẹ̌ botonge koatengu

Měgělị watangeng si Yehuwa kụ ibaptisẹ̌, humotong aramanung kakělaěng tawe gampang. Katewe, i kau botonge měkoạ kemajuan sarang i kau mangimang i kau botonge měkoạ putusang penting ene. Gunang měmanda pirang katau apang seng někoạ ene, putarẹ̌ VIDEONE.

Basa Yohanes 17:3 dingangu Yakobus 1:​5, bọu ene bisarai kakiwal᷊o ini:

• Apa wotonge makatul᷊ung si kau tadeạu sadia ibaptisẹ̌?

1. I kitẹ měgělị watangeng si Yehuwa su tempong maul᷊ị si Sie i kitẹ mapulu mẹ̌tahamawu si Sie sarang karěngụe

2. Su tempong nibaptisẹ̌, i kitẹ něnodẹ su taumata wal᷊inẹ i kitẹ seng nẹ̌diandi něgělị pěbawiahi kitẹ su Mawu

 6. Su tempong nibaptisẹ̌, i kitẹ nakoạ bageang bọu kěluargang Yehuwa

Su tempong nibaptisẹ̌, i kitẹ nakoạ bageang bọu keluarga nasěmbaụ su patikụ dunia. Maning negeri dingangu latar belakang i kitẹ nẹ̌tatěntang, pangangimang i kitẹ mẹ̌sul᷊ung kụ i kitẹ lai měbẹ̌biahẹ̌ tuhụ atorang mẹ̌sul᷊ung. Basa Mazmur 25:14 dingangu 1 Petrus 2:​17, bọu ene bisarai kakiwal᷊o ini:

• Apa pengaruh baptisan su pẹ̌dal᷊ahapịu tau nibaptisẹ̌ dingangi Yehuwa lai dingangu taumata apang měnẹ̌němbah si Yehuwa?

 RINGKASAN

Yesus něněntiro tau Kristen harusẹ̌ ibaptisẹ̌. Gunang měkoạ cita-cita ene, tau mapulu ibaptisẹ̌ harusẹ̌ piạ pangangimang matoghasẹ̌ si Yehuwa, měbẹ̌biahẹ̌ tuhụ atorang’E, dingangu mẹ̌diandi měgělị watangenge si Yehuwa.

Apa seng nikaěndungangu?

• Kai apa baptisan ene, kụ kawe nụe ene penting?

• Baptisan něnodẹ apa?

• Apa harusẹ̌ koatengu taumata mạeng i sie mapulu měgělị watangenge si Yehuwa kụ ibaptisẹ̌?