KAWE NỤE PENTING: Měnginjilẹ̌ měpakẹ telepon ene kai sěmbaụ cara penting gunang ”měgělị kesaksian soal u habarẹ̌ mapia”. (Kis 20:24) * Ene makatul᷊ung si kitẹ měnginjilẹ̌ si sire apang tawe kapẹ̌sombangeng i kitẹ.

KEREA CARANE:

• Pěkoạ persiapan. Pilẹe topik nẹ̌tatahino. Bọu ene, bohẹ apa mapulu ul᷊ịkangu. I kau lai botonge měnadia pesan manibụ nělahẹ timonang i kau něnelpon. Ene botonge paketangu mạeng simimbahẹ̌ si kau ene kai mesin penjawab telepon. Su tempong měnětạ měnginjilẹ̌, mapaelẹ̌ mạeng i kau kumaiang su těngong meda, kụ sene i kau seng něnadia catatan soal u apa sarung ul᷊ịkangu dingangu bahan sarung lahẹkangu, kere perangkat elektronik něnodẹ JW Library^® arau jw.org^®

• Abe tegang. Pẹ̌bisarạe kere wiasa. Hěmingke dingangu pẹ̌bisarạe kere i kau nẹ̌bisara langsung su těngone. Abe marěmasẹ̌ tumanịu marěngụ. Mapaelẹ̌ lai mạeng i kau měmaringang anạu sěmbaụ wal᷊inẹ. Mạeng taghuangu wal᷊e mẹ̌kiwal᷊o, saụko sěbạ kakiwal᷊o ene pakaihạ tadeạu hapịu botonge makatul᷊ung si kau mědeạ sasimbahe

• Pěkoạ dasarẹ̌ gunang saụ mẹ̌tiwo. Mạeng tau ene mapulu dumaringihẹ̌, i kau botonge měněntang kakiwal᷊o gunang simbaheng su tempong i kau měnelpon tuhụe. Pẹ̌kiwal᷊ọe si sie apa wotonge i kau měnonda langsung publikasi arau měndoho ene bọu e-mail arau měpakẹ jasa pengiriman. Arau pẹ̌kiwal᷊ọe apa wotonge i kau měndoho video arau artikel si sie bọu pesan arau e-mail