1, 2. (a) Kerea pěndang i kitẹ mạeng pěbawiahi kitẹ sěngkělěndịu nẹ̌bal᷊ui? (Pěmanda gambarẹ̌ humotong su pěngangěndungang ini.) (b) Tumuhụ Mazmur 131, apa makakoạ si kitẹ tatapẹ̌ piạ pẹ̌darame su naung?

KARĚNGỤE 25 su taunge i Lloyd dingangi Alexandra něhal᷊ẹ̌ su Betel. Bọu ene, i sire nakaěbạ tugasẹ̌ nakoạ perintis. Humotong, i sire nasusah naung. Lloyd naul᷊ị, ”Mětanạ dingangu měhal᷊ẹ̌ su Betel ene kai pěbawiahẹ̌ku. Iạ botonge měnarimạ alasang pẹ̌bawal᷊ui ene, katewe bul᷊ange karěngụe iạ masau mẹ̌pěndang seng nirěmẹ.” Pěndang i Lloyd masau měbẹ̌bal᷊ui. Ěllo ini i sie botonge měnarimạ pěbawal᷊ui ene, katewe dịěllone nakapěndang susah naung.

² Pěbawiahi kitẹ botonge mẹ̌bal᷊ui dingangu cara tawe lẹ̌harapeng i kitẹ. Kụ ini makakoạ si kitẹ makapěndang guměnggang dingangu stres. (Amsal 12:25) Apa botonge  koateng i kitẹ tadeạu piạ pẹ̌darame su naung? (Basa Mazmur 131:1-3.) I kitẹ sarung měngěndung contoh bọu manga ělang i Yehuwa su tempong tamai dingangu orasẹ̌ ini. I sire ini botonge tatapẹ̌ piạ pẹ̌darame su naung su tempong pěbawiahi sire sěngkělěndịu nẹ̌bal᷊ui.

3. Kerea pěbawiahi Yusuf sěngkělěndịu nẹ̌bal᷊ui?

³ Mahi mẹ̌tarukira contoh i Yusuf. Yusuf kai anạ kẹ̌kapiang i Yakub. Ini nakakoạ manga tuhang i Yusuf iri si sie. Su tempong umuri Yusuf 17 su taunge, i sire nẹ̌bal᷊ụ si Yusuf gunang makoạ ělang. (Kejadian 37:2-4, 23-28) Karěngụe 13 su taunge i sie nasigěsạ su Misirẹ̌, humotong nakoạ ělang kụ bọu ene niselẹ̌. I Yusuf nahae sěbạe marau bọu i amang ikẹ̌kěndage. Sěběnarẹ̌e, situasi ini botonge makakoạ si sie mẹ̌pěndang tawẹ apa pělaharapẹ̌ dingangu mẹ̌pědu, katewe i sie tawe kerene. Apa nakatul᷊ung si sie?

4. (a) Apa nikoạ i Yusuf su tempong niselẹ̌? (b) Kerea i Yehuwa simimbahẹ̌ manga daroang i Yusuf?

⁴ Su tempong nasigěsạ su penjara, Yusuf masau mẹ̌tahěndung apa seng nikoạ i Yehuwa gunang mẹ̌tul᷊ung si sie. (Kejadian 39:21; Mazmur 105:17-19) I Yusuf bọu nakaěbạ manga ipi bọu Mawu soal u apa sarung mariadi si sie su ěllo mahi. Aramanung i sie lai mětẹ̌tiněna manga ipi ene, hakị u i sie mangimang i Yehuwa duměndingang si sie. (Kejadian 37:5-11) Ěndịu lai, i sie masau mědẹ̌doa si Yehuwa měbẹ̌běke lohongu naunge. (Mazmur 145:18) Yehuwa simimbahẹ̌ daroang i Yusuf kụ něgělị si sie pangangimang, tawẹ soale apa sarung mariadi i Yehuwa mang ”duměndingang si sie”.​—Kisah 7:9, 10. * (Pěmanda catatan kaki.)

5. Kerea ”pẹ̌darame bọu Mawu” botonge makatoghasẹ̌ si kitẹ gunang turusẹ̌ mẹ̌tahamawu si Yehuwa?

⁵ Tawẹ soale kerea kasigěsạe situasing i kitẹ, ”pẹ̌darame bọu Mawu” botonge ”makariagạ naung dingangu tiněna”, hakị u ene i kitẹ botonge makapěndang pẹ̌darame su naung. (Basa Filipi 4:6, 7.) Su tempong i kitẹ giměnggang dingangu stres, ”pẹ̌darame bọu Mawu” makatoghasẹ̌ si kitẹ gunang tatapẹ̌ mẹ̌tahamawu si Yehuwa kụ tawe měngědo. Mahịe i kitẹ měngěndung bọu anạu sěmbaụ apang seng nakahombang ene orasẹ̌ ini.

6, 7. Kerea i kitẹ botonge makapěndang pẹ̌darame ual᷊ingu nẹ̌doa si Yehuwa? Gělịko contone.

⁶ Su tempong i Ryan dingangi Juliette harusẹ̌ měngědo bọu perintis istimewa sementara, i sire nakadodọ naung. Ryan naul᷊ị, ”I kami apidu nẹ̌doa si Yehuwa. I kami masingkạ ini kai kesempatan gunang měnodẹ pangangimang si Yehuwa. Lawọ tau wuhu su sidang, hakị u ene i kami nẹ̌doa tadeạu i kami makoạ tatěnoěng su soal u pangangimang.”

⁷ Kerea i Yehuwa simimbahẹ̌ daroang i sire? Ryan naul᷊ị, ”Su apang bọu nẹ̌doa, pěndang dal᷊akị dingangu gěnggang su naung i kami nailang. Pẹ̌darame bọu Mawu makariagạ naung dingangu tiněnang i kami. I kami masingkạ, i kami  botonge turusẹ̌ paketang i Yehuwa mạeng měndiagạ sipatẹ̌ nẹ̌tatahino.”

8-10. (a) Kerea rohkẹ̌ masusi makatul᷊ung si kitẹ tumatěngo kaghaghěnggang? (b) Kerea Yehuwa sarung mẹ̌tul᷊ung si kitẹ mạeng i kitẹ mẹ̌taho pelayanan su tampạ kahumotongange?

⁸ Rohkẹ̌ masusi botonge makakoạ si kitẹ makapěndang pẹ̌darame. Rohkẹ̌ ini lai makatul᷊ung si kitẹ makaěbạ manga ayatẹ̌ Alkitapẹ̌, hakị u ene i kitẹ makasingkạ apa limembong penting su pěbawiahi kitẹ. (Basa Yohanes 14:26, 27.) Pẹ̌tiněna apa nariadi su sěngkawingang mělẹ̌hal᷊ẹ̌ su Betel maraning 25 su taunge, i Philip dingangi Mary. Su ral᷊ungu ěpạ u wul᷊ang, darua mamạ i rẹ̌dua dingangu anạu sěngkatau wal᷊inẹ lai nate. Bọu ene lai, i rẹ̌dua harusẹ̌ měngurusẹ̌ papạ i Mary seng tutạ.

⁹ Philip naul᷊ị, ”Sěnangku iạ seng sěbạe mapia, katewe samurine iạ nakasingkạ bědang piạ kurang su watangengku su tempong nẹ̌basa soal u Kolose 1:11 su artikel pěngangěndungang Měhabarẹ̌. Iạ seng nẹ̌kakědang su situasi masigěsạ, katewe iạ bědang tawe ’timatěngo kasasigěsạ ene dingangu kasasabarẹ̌ lai karal᷊uasẹ̌’. Iạ harusẹ̌ masabarẹ̌ dingangu mal᷊uasẹ̌. Iạ masingkạ karal᷊uasẹ̌ ene asal᷊e kai bọu pengaruh rohkẹ̌ masusi bal᷊inẹ bọu situasing pěbawiahẹ̌ku.”

¹⁰ Philip dingangi Mary nẹ̌taho pelayanan su tampạ kahumotongange. I Yehuwa něgělị lawọ al᷊amatẹ̌ si sire. Su apang seng siměbang bọu Betel, i rẹ̌dua nakaěbạ manga měngangěndung Alkitapẹ̌ mapaelẹ̌. Piạ u mapulu měngěndung pirang sul᷊ẹ su ral᷊ungu sěngkamisa. Mary naul᷊ị, ”I sire kai karal᷊uasi kami. I Yehuwa kere naul᷊ị pěbawiahi kami sarung mal᷊unsemahẹ̌.”

11, 12. (a) Apa nikoạ i Yusuf hakị u Yehuwa něngal᷊amatẹ̌ si sie? (b) Al᷊amatẹ̌ apa nighělị i Yehuwa si Yusuf?

¹¹ Su tempong pěbawiahi kitẹ sěngkělěndịu nẹ̌bal᷊ui, i kitẹ sěbạe guměnggang dingangu kětạeng měpẹ̌pikirẹ̌ masalang i kitẹ. Ene botonge mariadi si Yusuf, katewe i sie němile měkoạ apang kapaelange su ral᷊ungu situasi masigěsạ ene. Contone, i Yusuf něhal᷊ẹ̌ masěghadẹ̌ gunang Potifar. Su tempong su selẹ̌ i sie něhal᷊ẹ̌ masěghadẹ̌ měkoạ manga hal᷊ẹ̌ nighělị u těmbonangu selẹ̌.​—Kejadian 39:21-23.

¹² Su sěngkatempo, i Yusuf nakaěbạ tugasẹ̌ měngurusẹ̌ duang katau tahanan. Kangerẹ i sire něhal᷊ẹ̌ su istanang i Firaun.  Yusuf mapia měkoạ si sire. Ual᷊ingu ene, i sire nẹ̌běke si Yusuf manga ipi nakakoạ si sire giměnggang. (Kejadian 40:5-8) Yusuf běga apa nipẹ̌bisarang i sire ene sarung makawal᷊ui pěbawiahe. Dua taung tuhụe, i sie nipakawebasẹ̌ bọu selẹ̌ kụ nakoạ měngangawasa su Misirẹ̌. I sie nakoạ měngangawasa karuane bọu i Firaun.​—Kejadian 41:1, 14-16, 39-41.

13. Apa harusẹ̌ koateng i kitẹ tadeạu Yehuwa měngal᷊amatẹ̌ si kitẹ tawẹ soale kerea situasing i kitẹ?

¹³ Kere i Yusuf, i kitẹ aramanung tawe makaul᷊ing kěbị situasing i kitẹ. Katewe, mạeng i kitẹ masabarẹ̌ dingangu měkoạ kapaelange, i Yehuwa sarung měngal᷊amatẹ̌ si kitẹ. (Mazmur 37:5) Maning i kitẹ gụgěnggang dingangu běga měnsang měkoạ apa, i kitẹ tawe niwala ”tawẹ apa pělaharapẹ̌”. (2 Korintus 4:8, ctk.) Yehuwa sarung mẹ̌tul᷊ung si kitẹ mạeng i kitẹ mẹ̌taho pelayanan su tampạ kahumotongange.

14-16. Kerea i Filipus nẹ̌taho pelayanan su tampạ kahumotongange maning pěbawiahe nẹ̌bal᷊ui?

¹⁴ Filipus, měnganginjilẹ̌ su abad humotong kai tatěnoěng mapaelẹ̌. Maning nakahombang lawọ pẹ̌bawal᷊ui, i sie turusẹ̌ mẹ̌taho pelayanan su tampạ kahumotongange. Su sěngkatempo, i sie mal᷊uasẹ̌ někoạ tugasẹ̌ buhu su Yerusalem. (Kisah 6:1-6) Katewe, situasi nẹ̌bal᷊ui. Bọu i Stefanus nipate, tau Sahani su Yerusalem sěbạe nirarihang, kụ i sire timal᷊ang bọu Yerusalem. Ual᷊ingu i Filipus mapulu tatapẹ̌ sibukẹ̌ su hal᷊ẹ̌ měnginjilẹ̌, i sie nakoạ sarang soa Samaria. Su soa ene lawọ taumata bědang tawe nakaringihẹ̌ habarẹ̌ mapia.​—Matius 10:5; Kisah 8:1, 5.

¹⁵ Filipus sadia makoạ sarang haghing tampạ tuhụ laahạ u rohkẹ̌ masusi. Ual᷊ingu ene, Yehuwa botonge měpakẹ si sie gunang měnginjilẹ̌ su tampạ habarẹ̌ mapia bědang tawe nihabarẹ̌. Kal᷊awokange tau Yahudi tawe měngẹ̌ngarěga su tau Samaria dingangu měkẹ̌koạ barang dal᷊akị si sire. Katewe, i Filipus tatapẹ̌ mapulu měnginjilẹ̌ si sire. Kụ taumata Samaria mapulu měnarimạ habarẹ̌ mapia dingangu kaguwạu naung i sire.​—Kisah 8:6-8.

¹⁶ Bọu ene, rohkẹ̌ masusi něngahạ si Filipus měnginjilẹ̌ su soa Asdod dingangu Kaisarea. Su soa ene piạ lawọ taumata bal᷊inẹ Yahudi. (Kisah 8:39, 40) Bọu ene, pěbawiahi Filipus saụ nẹ̌bal᷊ui. I sie nẹ̌kawing kụ piạ manga anạe. Katewe, i sie tatapẹ̌ sibukẹ̌ měnginjilẹ̌, kụ  i Yehuwa turusẹ̌ měngẹ̌ngal᷊amatẹ̌ si sie dingangu keluargane.​—Kisah 21:8, 9.

17, 18. Apa gunane mạeng tatapẹ̌ mẹ̌taho pelayanan su tampạ kahumotongange su tempong piạ pẹ̌bawal᷊ui?

¹⁷ Lawọ pelayan sepenuh waktu naul᷊ị mạeng mẹ̌taho pelayanan su tampạ kahumotongange, i sire limembong mal᷊uasẹ̌ dingangu positif maning situasing i sire nẹ̌bal᷊ui. Contone, sěngkawingang su Afrika Selatan, i Osborne dingangi Polite. I sire siměbang bọu Betel. Humotong i sire nẹ̌pikirẹ̌ gampang makaěbạ hal᷊ẹ̌ dingangu tampạ pẹ̌tanakeng. Katewe i Osborne naul᷊ị, ”Situasine tawe kere lẹ̌harapeng i kami, i kami tawe nakaěbạ hal᷊ẹ̌.” I Polite naul᷊ị, ”Sěng tělu wul᷊ang i kami tawẹ apa hal᷊ẹ̌, kụ seng tawẹ apa roitẹ̌. Situasi ini sěbạe masigěsạ tatěngong i kami.”

¹⁸ Apa nakatul᷊ung si Osborne dingangi Polite timatěngo situasi ene? Osborne naul᷊ị, ”Sibukẹ̌ měnginjilẹ̌ dingangu anạu sěmbaụ su sidang nakatul᷊ung si kami tatapẹ̌ fokus dingangu positif.” Sul᷊ungu kětạeng kụkaiang su wal᷊e dingangu gụgěnggang, i sire tatapẹ̌ sibukẹ̌ su pelayanan. Ini nakakoạ si sire sěbạe mal᷊uasẹ̌! Kụ i Osborne naul᷊ị, ”I kami turusẹ̌ mědẹ̌deạ hal᷊ẹ̌, kụ samurine i kami mang nakaěbạ hal᷊ẹ̌.”

19-21. (a) Apa botonge makatul᷊ung si kitẹ měndiagạ pẹ̌darame su naung? (b) Apa gunane měnarimạ pẹ̌bawal᷊ui tawe lẹ̌harapeng i kitẹ?

¹⁹ Kere seng niěndungang i kitẹ, mạeng i kitẹ měkoạ kapaelange dingangu kahěngang-hěngang mangimang si Yehuwa, i kitẹ botonge makariagạ pẹ̌darame su naung i kitẹ tawẹ soale apa nariadi. (Basa Mikha 7:7.) Aramanung, měnarimạ pẹ̌bawal᷊ui botonge makatoghasẹ̌ pẹ̌dal᷊ahapị i kitẹ dingangi Yehuwa. I Polite nělahẹ su tempong nakaěbạ tugasẹ̌ buhu kụ siměbang bọu Betel, ene něněntiro si sie apa mangal᷊ene měngumbala  si Yehuwa su tempo masigěsạ. I sie naul᷊ị, ”Pẹ̌dal᷊ahapịku dingangi Yehuwa sauneng kakạtoghase.”

²⁰ I Mary, seng nisěbạ su bageang humotong pěngangěndungang ini, bědang mětẹ̌tangkiang si papạe apidu merintis. I sie naul᷊ị, ”Iạ něngěndung su tempong iạ gụgěnggang, iạ harusẹ̌ měngědo, mẹ̌doa, dingangu měngirul᷊e. Měnarakang kaghaghenggang si Yehuwa, ene kai hal᷊ẹ̌ penting seng nikaěndungangku. Ini sarung piạ gunane su ěllo mahi.”

²¹ Lloyd dingangi Alexandra nẹ̌bera pẹ̌bawal᷊ui su pěbawiahẹ̌ dingangu cara tawe nikatiněnang i sire, seng nakasal᷊ukạ pangangimang i sire. Katewe, i sire nakaěbạ gunane bọu situasi ini. Pangangimang i sire natoghasẹ̌, limembong mapia su tempong tumatěngo masalah, dingangu nakoạ taumata limembong mapia.

22. Mạeng i kitẹ měkoạ kapaelange, i kitẹ botonge mangimang apa?

²² Su dunia ini, pěbawiahi kitẹ botonge sěngkělěndịu nẹ̌bal᷊ui. Aramanung i kitẹ nakaěbạ tugasẹ̌ buhu bọu organisasi, arau sěngkělěndịu nasakị, arau lai harusẹ̌ mẹ̌tangkiang keluarga apang nasakị. Katewe, i kitẹ botonge mangimang Yehuwa mapadul᷊i kụ sarung mẹ̌tul᷊ung si kitẹ. (Ibrani 4:16; 1 Petrus 5:6, 7) Kụ su orasẹ̌ ini, pěkoạe apa kapaelange tuhụ keadaan i kitẹ. Pẹ̌doạe si Amang i kitẹ, i Yehuwa. Pěngumbalạe si Yehuwa dingangu kaguwạu naungu. Mạeng měkoạ ene, tawẹ soale apa sarung mariadi, i kitẹ tatapẹ̌ piạ pẹ̌darame su ral᷊ungu naung, kụ asal᷊e bọu i Yehuwa.