DUANG katau wawine mangudạ dụdal᷊eng sěngkasio su daerah bisnis su Baguio City, Filipina. I sire nakasilo rak beroda, katewe tawe riměduhẹ̌. Helen, sěngkatau saudari dụdarisị su sěndihang rak beroda himěming si sire. Darua wawine ene něnurusẹ̌ dal᷊eng i rẹ̌dua, katewe i rẹ̌dua nakatahěndung hěming i Helen mahimumu.

Bọu ene, su tempong darua wawine ene napul᷊ẹ kụ simake oto, i rẹ̌dua nakasilo Banalang Kararatuang kụ su mukane piạ bohẹ gěguwạ jw.org. I sire nakatahěndung bohẹ ene mẹ̌sul᷊ung dingangu bohẹ nikasilong i rẹ̌dua su rak beroda. I sire limintụ bọu oto kụ nakoạ sarang Banalang Kararatuang. I sire němanda jadwal pěngangibadang kẹ̌koateng su Banalang Kararatuang ene.

Darua wawine ene diměnta su pěngangibadang tuhụe. Kụ i sai nikasilong i rẹ̌dua su tempong diměnta su Banalang Kararatuang? I Helen! I sire apidu nakatahěndung i Helen kai wawine seng himěming si sire. Helen naul᷊ị, ”Su tempong i sire ruměduhẹ̌ si siạ, iạ gugupẹ̌, ual᷊ingu iạ nẹ̌pikirẹ̌ iạ seng někoạ pẹ̌sasal᷊a.” Katewe wawine ene nẹ̌běke si Helen apa seng nariadi.

Darua wawine mangudạ ene nakapěndang mal᷊uasẹ̌ su pěngangibadang, i sire nakapěndang kere su wal᷊e. Su tempong i sire nakasilo anạu sěmbaụ němurěsi Banalang Kararatuang su apang nasue ibadane, i sire nẹ̌kiwal᷊o apa i sire botonge mẹ̌tul᷊ung. Sěngkatau bọu darua wawine ene seng tawe nẹ̌tanạ su Filipina, katewe sěngkatau wawine lai něnětạ diměnta su pěngangibadang kụ seng něnětạ něngěndung Alkitapẹ̌. Kěbị ene ual᷊ingu hěming!