Iạ nalahirẹ̌ taung 1983. Su tempong bědang kadodọ, iạ masehatẹ̌. Katewe, su tempong umurẹ̌ku mapul᷊o taung, badangku něnětạ gụgiadẹ̌. Ěndịu dua taung bọu ene, su tempong iạ nẹ̌bangung mal᷊ukadẹ̌, iạ seng tawe makakanoạ badangku. Tawẹ soale kerea iạ mẹ̌tawakal᷊i měhengkẹ laedẹ̌ku, ene tawe mahengkẹ. Něnětạ bọu tempo ene, iạ seng tawe makaral᷊eng. Sakịku lai nakakoạ si siạ něngědo timuwọ. Hakị u ene, sarang orasẹ̌ ini, badangku tatapẹ̌ kadodọ kere manga rariọ.

Pira wul᷊ang su apang iạ něnětạ nasakị dingangu tawe makasěbang bọu wal᷊e, piạ duang katau Sahiding Yehuwa diměnta su wal᷊eku. Biasane, mạeng piạ sake, iạ měkẹ̌kěmbuni. Katewe, su ěllo ene, iạ dimaringihẹ̌ su tempong sěngkatau wawine Sahiding Yehuwa ene nẹ̌bisara si siạ. Su tempong i kami nẹ̌bawěke soal u Firdaus, iạ nakatahěndung apa nikaringihẹ̌ku su tempong umurẹ̌ku lima taung. Su tempo ene, sěngkatau utusan injil arenge Jethro, kụ mětẹ̌tanạ su Suriname, dụděnta su kampong i kami sěngsul᷊ẹ sěmbul᷊ang gunang měněntiro Alkitapẹ̌ si papạku. Jethro sěbạe mapia si siạ. Hakị u ene, iạ sěbạe puluang mědal᷊ahapị dingange. Bọu ene lai, i omaku dingangi opaku, měbẹ̌bawa si siạ sarang pěngangibadang kẹ̌koateng su kampong i kami. Hakị u ene, su tempong i Florence, sěngkatau bọu darua Sahiding Yehuwa ene, nẹ̌kiwal᷊o apa iạ mapulu měngěndung limembong mal᷊awọ, iạ simimbahẹ̌ iya.

Florence saụ nẹ̌bal᷊ị dingangu kawinge, i Justus, kụ i rẹ̌dua něnětạ něněntiro Alkitapẹ̌ si siạ. Su tempong nakasingkạ iạ běga mẹ̌basa, i rẹ̌dua nẹ̌tul᷊ung si siạ něngěndung nẹ̌basa. Kakạrěngụe, iạ nakakoạ nẹ̌basa. Piạ su sahěllo, i rẹ̌dua naul᷊ị si siạ i rẹ̌dua nakaěbạ tugasẹ̌ gunang melayani su Suriname. Su tempo ene tawẹ apa Sahiding Yehuwa su Orealla kụ botonge měněntiro Alkitapẹ̌ si siạ. Katewe, untung Yehuwa turusẹ̌ mětẹ̌tahěndung si siạ.

Tawe nararěna bọu ene, sěngkatau perintis arenge Floyd nahumpạ su Orealla. I sie nẹ̌sombang dingangku su tempong i sie něnginjilẹ̌ bọu wal᷊e sarang bal᷊e. Su tempong i sie nẹ̌bisara si siạ soal u měngěndung Alkitapẹ̌, iạ himěming. I sie nẹ̌kiwal᷊o, ”Kawe i kau himěming?” Iạ naul᷊ị si sie iạ seng bọu něngěndung Alkitapẹ̌ něpakẹ brosur Apa yang Allah Tuntut dari Kita? kụ iạ lai seng něnětạ něngěndung něpakẹ bukẹ̌ Pengetahuan yang Membimbing kepada Kehidupan Abadi. * Iạ naul᷊ị si sie kawe nụe iạ seng tawe něngěndung Alkitapẹ̌. Bọu ene, i Floyd něněntiro Alkitapẹ̌ si siạ sarang iạ nasueng ěndunge bukẹ̌ Pengetahuan. Katewe bọu ene, i sie lai nakaěbạ tugasẹ̌ su tampạ bal᷊inẹ. Něnětạ tempo ene, tawẹ apa taumata něněntiro Alkitapẹ̌ si siạ.

 Katewe, su taung 2004, i Granville dingangi Joshua, darua perintis istimewa, nakaěbạ tugasẹ̌ su Orealla. I rẹ̌dua něnginjilẹ̌ bọu wal᷊e sarang bal᷊e kụ nẹ̌sombang dingangku. Su tempong i rẹ̌dua nẹ̌kiwal᷊o apa iạ mapulu měngěndung Alkitapẹ̌, iạ himěming. Iạ nẹ̌dorong si rẹ̌dua gunang měněntiro Alkitapẹ̌ si siạ měpakẹ bukẹ̌ Pengetahuan kụ měngěndung bọu humotong. Iạ mapulu makasingkạ apa i rẹ̌dua sarung měněntiro hal᷊ẹ̌ mẹ̌sul᷊ung si siạ kere Sahidi apang něněntiro Alkitapẹ̌ si siạ kal᷊imona. I Granville naul᷊ị si siạ piạ pěngangibadang sarung koateng su kampong i kami. Maning iạ seng maraning mapul᷊o taung tawe siměbang bọu wal᷊e, iạ mapulu duměnta. Hakị u ene, i Granville naotong si siạ, kụ nẹ̌taho si siạ su kursi roda, kụ i sie něnuhudẹ̌ ene sarang Banalang Kararatuang.

Bọu ene, i Granville němahangsang si siạ gunang tumol᷊e Sekolah Pelayanan Teokratis. I sie nẹ̌bera, ”I kau memang tawe makaral᷊eng, katewe i kau botonge mẹ̌bisara. Sěngsul᷊ẹ tempo i kau sarung měnasẹ̌. Ene sarung mariadi.” Bawerane ene nakasěmangatẹ̌ si siạ.

Iạ něnětạ něnginjilẹ̌ dingangi Granville. Katewe, lawọ dal᷊eng su Orealla tawe matene kụ tawe nẹ̌cocokẹ̌ gunang kursi roda. Hakị u ene, iạ nẹ̌dorong si Granville gunang mẹ̌taho si siạ su roda kụ měnuhudẹ̌ roda ene. Ene nakakoạ si kandua botonge makoạ sarang haghing tampạ. Su wul᷊ang April 2005, iạ nibaptisẹ̌. Kụ tawe nararěna bọu ene, saudara-saudara nělatih si siạ gunang měngurusẹ̌ lektur dingangu tata suara su Banalang Kararatuang.

Bọu ene, piạ barang nakasusah naung nariadi. Su taung 2007, i papạku nate ual᷊ingu nanawo bọu sakaeng. Su tempo ene, kěluargang i kami himěkosẹ̌. I Granville nẹ̌doa dingangi kami kụ nẹ̌basa ayatẹ̌ makahiborẹ̌ bọu Alkitapẹ̌ gunang i kami. Dua taung bọu ene, i kami saụ himěkosẹ̌ nakaringihẹ̌ i Granville nate ual᷊ingu sakaeng nisakene nawul᷊usẹ̌.

Sidang i kami nasusah naung ual᷊ingu papateng i Granville. Kụ su tempo ene seng tawẹ apa penatua su sidang i kami dingangu kětạeng piạ sěngkatau hamba pelayanan. Iạ sěbạe nasusah naung ual᷊ingu hapịku i Granville nate. I sie seng nẹ̌tul᷊ung si siạ su hal᷊ẹ̌ rohani dingangu jasmani. Nal᷊iu bọu papateng i Granville, iạ nakaěbạ tugasẹ̌ su pěngangibadang gunang mẹ̌basa Měhabarẹ̌. Iạ nẹ̌basa darua paragraf humotong, katewe bọu ene iạ něnětạ simangị kụ iạ tawe něngědo simangị, hakị u iạ harusẹ̌ lumintụ bọu panggung.

Iạ saụ něnětạ limembong mal᷊uasẹ̌ su tempong anạu sěmbaụ bọu sidang wal᷊inẹ diměnta gunang mẹ̌tul᷊ung si kami su Orealla. Bọu ene lai, kantor cabang něgělị tugasẹ̌ su sěngkatau saudara perintis istimewa, arenge Kojo, gunang mẹ̌tul᷊ung sidang i kami. Kụ, iạ limembong mal᷊uasẹ̌ lai su tempong i mamạku dingangu tuariku esẹ něnětạ něngěndung Alkitapẹ̌ kụ nibaptisẹ̌. Bọu ene, su wul᷊ang Maret 2015, iạ nakoạ hamba pelayanan. Iạ nighělịkangu tugasẹ̌ gunang mẹ̌bawa nasẹ̌ku kahumotongange. Su ěllo ene, iạ himěming dingangu nitědọkangu ěllo mata su tempong nẹ̌tahěndung apa niwerang i Granville si siạ pira taung kal᷊imona. I sie nẹ̌bera, ”Sěngsul᷊ẹ tempo i kau sarung měnasẹ̌. Ene sarung mariadi.”

Su JW Broadcasting^®, iạ nakasilo anạu sěmbaụ apang piạ situasi mẹ̌sul᷊ung dingangku. Maning badang i sire piạ kurange, i sire botonge nakakoạ lawọ hal᷊ẹ̌ kụ i sire lai mal᷊uasẹ̌. Iạ lai bědang botonge makakoạ piram baụ hal᷊ẹ̌. Ual᷊ingu iạ mapulu měgělị katatoghasẹ̌ku si Yehuwa, ene nakawahangsang si siạ gunang makoạ perintis biasa. Kụ su wul᷊ang September 2019, piạ habarẹ̌ makal᷊uasẹ̌ nitarimạku. Su wul᷊ang ene, iạ nakoạ penatua, kụ su tempo ene, piạ 40 penyiar su sidang i kami.

Iạ makitarimakasẹ ual᷊ingu piạ anạu sěmbaụ něněntiro Alkitapẹ̌ si siạ dingangu nẹ̌tul᷊ung si siạ su tempong měnginjilẹ̌. Kụ kahumotongange, iạ sěbạe makitarimakasẹ si Yehuwa ual᷊ingu i Sie turusẹ̌ mětẹ̌tahěndung si siạ.