1. Kawe nụe i kitẹ mangimang i kitẹ seng měbẹ̌biahẹ̌ su ”ěllo pěngěngsuenge”?

APA i kau nalahirẹ̌ nal᷊iu wọu taung 1914? Mạeng iya, i kau měbẹ̌biahẹ̌ su ”ěllo pěngěngsuenge” bọu dunia ini. (2 Tim. 3:1) I kitẹ kěbị seng nakaringihẹ̌ soal u manga hal᷊ẹ̌ seng nitěbal᷊i Yesus soal u zaman i kitẹ. Ene kai manga hal᷊ẹ̌ kere sekẹ, karal᷊unusẹ̌, linuhẹ̌, sahindạ, karal᷊akisẹ̌ kakạtambane, dingangu manga ělang i Yehuwa dẹ̌darihang. (Mat. 24:3, 7-9, 12; Luk. 21:10-12) I kitẹ lai seng nakasilo kakanoạ u taumata orasẹ̌ ini mẹ̌sul᷊ung kere nitěbal᷊i Rasul Paulus. (Pěmanda kotak ” Kakanoạu Taumata Orasẹ̌ Ini.”) I kitẹ ělang i Yehuwa mangimang orasẹ̌ ini i kitẹ měbẹ̌biahẹ̌ su ”ěllo pěngěngsuenge”.​—Mi. 4:1.

2. Sasimbahu manga kakiwal᷊o apa harusẹ̌ deạkeng i kitẹ?

² Ual᷊ingu seng mal᷊awọ tempo nal᷊iu dongkeng taung 1914, orasẹ̌ ini i kitẹ seng su pěngěngsuengu ”ěllo pěngěngsuenge”. Ual᷊ingu pěngěngsuengu dunia ini seng marani, i kitẹ harusẹ̌ makasingkạ sasimbahu piram baụ kakiwal᷊o penting ini: Manga hal᷊ẹ̌ apa sarung mariadi su pěngěngsuengu ”ěllo pěngěngsuenge”? Kụ, kạpěngampal᷊e manga hal᷊ẹ̌ ene, Yehuwa mapulu i kitẹ měkoạ apa?

3. Tumuhụ těbal᷊ẹ̌ su 1 Tesalonika 5:1-3, manga wangsa sarung měmohang apa?

³ Basa 1 Tesalonika 5:1-3. Paulus nẹ̌sěbạ soal u ”ěllong Yehuwa”. Su ayatẹ̌ ini, ěllong Yehuwa ene kai sěmbaụ tempo kụ nitětạ su tempong ”Babelẹ̌ Gěguwạ” arau kěbị agama palsu niwinasa kụ pondol᷊e ute su Armagedon. (Why. 16:14, 16; 17:5) Maraning ’ěllo’ ene měnětạ, manga wangsa sarung  měmohang ”Dame dingangu aman!” Manga těmbonangu dunia pẹ̌sěngsul᷊ẹ lai měpẹ̌pakẹ manga bawera kerene su tempong mẹ̌bisara soal u pẹ̌darame su tal᷊oarang manga wangsa. * Katewe, bohang ”dame dingangu aman” niul᷊ị u Alkitapẹ̌ ene nẹ̌tatěntang. Kawe nụe? Ual᷊ingu su tempong hal᷊ẹ̌ ene niwohang, taumata sarung mẹ̌pikirẹ̌ manga těmbonangu dunia seng nakakoạ dunia ini nakoạ tampạ aman. Katewe, sěběnarẹ̌e kawawinasa ene sěngkělěndịu duměnta.​—Mat. 24:21.

4. (a) Apa lai bědang harusẹ̌ kasingkateng i kitẹ soal u bohang ”dame dingangu aman”? (b) Apa seng nikasingkạ i kitẹ soal u bohang ene?

⁴ I kitẹ masingkạ piram baụ hal᷊ẹ̌ soal u bohang ”dame dingangu aman”. Katewe, piạ lai hal᷊ẹ̌ bal᷊inẹ bědang tawe nikasingkạ i kitẹ. I kitẹ běga apa makakoạ manga těmbonang měmohang hal᷊ẹ̌ ene, arau kerea carane i sire měmohang ene. I kitẹ lai běga apa kětạeng piạ sěmbaụ bohang arau piạ piram baụ bohang. Tawẹ soale apa sarung mariadi, i kitẹ tawe kaakal᷊eng. I kitẹ masingkạ manga těmbonangu dunia tawe makarěntang pẹ̌darame su dunia. Katewe, Alkitapẹ̌ seng naul᷊ị soal u bohang ene. Ene kai tatiala ”ěllong Yehuwa” seng měnětạ!

5. Kerea 1 Tesalonika 5:4-6 makatul᷊ung si kitẹ sadia gunang ”ěllong Yehuwa”?

⁵ Basa 1 Tesalonika 5:4-6. Paulus něgělị sasasa soal u apa harusẹ̌ koateng i kitẹ tadeạu sadia gunang ”ěllong Yehuwa”. ”Abe sarang i kitẹ mẹ̌tikị kere taumata wal᷊inẹ.” I kitẹ harusẹ̌ ”tatapẹ̌ kěla” dingangu maingatẹ̌. Contone, i kitẹ harusẹ̌ maingatẹ̌ tadeạu tatapẹ̌ netral dingangu tawe tumol᷊e politikẹ̌. Mạeng tawe netral, i kitẹ sarung makoạ ”bageang bọu dunia”. (Yoh. 15:19) I kitẹ masingkạ kětạeng Kararatuangu Mawu botonge makarěntang pẹ̌darame su dunia.

6. I kitẹ mapulu mẹ̌tul᷊ung taumata wal᷊inẹ měngěndung apa, kụ kawe nụe?

⁶ I kitẹ bal᷊inẹ kětạeng tatapẹ̌ kěla, katewe i kitẹ lai mapulu mẹ̌tul᷊ung taumata wal᷊inẹ měngěndung těbal᷊ẹ̌ soal u apa sarung mariadi su dunia. I kitẹ harusẹ̌ měkoạ ene orasẹ̌ ini, ual᷊ingu su tempong kasasusah masaria měnětạ, i sire seng terlambat mạeng buhudeng měnětạ mẹ̌tahamawu si Yehuwa. Hakị u ene, hal᷊ẹ̌ měnginjilẹ̌ sěbạe penting orasẹ̌ ini! *

7. Yehuwa mapulu i kitẹ měkoạ apa orasẹ̌ ini?

⁷ Maraning ”ěllong Yehuwa” měnětạ, bědang piạ tempo kadodọ mal᷊ěmbe, kụ Yehuwa mapulu i kitẹ tatapẹ̌ sibukẹ̌ měnginjilẹ̌. I kitẹ harusẹ̌ měmarikěsa apa i kitẹ ”sěntiniạ masibukẹ̌ měkoạ lawọ hal᷊ẹ̌ gunang Tuang”. (1 Kor. 15:58) Yesus něněbal᷊ẹ̌ i kitẹ sarung měkoạ ene. Su tempong nẹ̌bisara soal u manga hal᷊ẹ̌ sarung mariadi su ěllo pěngěngsuenge, i sie lai  naul᷊ị, ”Bọu ene lai, habarẹ̌ mapia harusẹ̌ ihabarẹ̌ kal᷊imona su kěbị bangsa.” (Mrk. 13:4, 8, 10; Mat. 24:14) Pẹ̌tiněna hal᷊ẹ̌ ini: Sabang i kau měnginjilẹ̌, i kau seng něngganapẹ̌ těbal᷊ẹ̌ ene!

8. Kerea hal᷊ẹ̌ měnginjilẹ̌ turusẹ̌ maju?

⁸ Kerea hal᷊ẹ̌ měnginjilẹ̌ turusẹ̌ maju? Sabang taung limembong lawọ taumata nakaringihẹ̌ habaru Kararatuang. Contone, pẹ̌tiněna soal u kerea penyiar kakạtambane su patikụ dunia su kanandụu ěllo pěngěngsuenge. Su taung 1914, kětạeng piạ 5.155 penyiar su 43 negeri. Orasẹ̌ ini, seng piạ ěndịu 8,5 juta penyiar su 240 negeri! Maning kerene, hal᷊ẹ̌ i kitẹ bědang tawe nasue. I kitẹ harusẹ̌ turusẹ̌ měhabarẹ̌ kětạeng Kararatuangu Mawu makailang masalang kěbị taumata.​—Mz. 145:11-13.

9. Kawe nụe i kitẹ harusẹ̌ turusẹ̌ měhabarẹ̌ habaru Kararatuang?

⁹ Hal᷊ẹ̌ měnginjilẹ̌ sarung turusẹ̌ koateng i kitẹ sarang i Yehuwa maul᷊ị ene seng nasue. Pira kal᷊awọe tempo nal᷊ěmbe su taumata gunang makasingkạ soal u Mawu Yehuwa dingangi Yesus Kristus? (Yoh. 17:3) I kitẹ běga. Katewe, i kitẹ masingkạ těntal᷊ang kasasusah masaria bědang tawe něnětạ, kěbị taumata apang ”piạ kapulu nihino gunang makaěbạ pěbawiahẹ̌ kěkalẹ̌” bědang botonge měnarimạ habarẹ̌ mapia. (Kis. 13:48) Kerea i kitẹ botonge mẹ̌tul᷊ung si sire těntal᷊ang bědang piạ tempo?

10. Apa nighělị i Yehuwa si kitẹ gunang mẹ̌tul᷊ung měněntiro katěngadẹ̌ su taumata?

¹⁰ Bọu organisasi-Ne, Yehuwa seng něgělị kěbị hal᷊ẹ̌ makatul᷊ung si kitẹ měněntiro katěngadẹ̌. Contone, sabang misa, i kitẹ nakaěbạ pělatihan su pěngangibadang tengah pekan. Pěngangibadang ini makatul᷊ung si kitẹ makasingkạ apa harusẹ̌ habareng i kitẹ su tempong měnginjilẹ̌ dingangu saụ mẹ̌tiwo. Kụ, i kitẹ lai nitěntiro carane měngahạ pěngangěndungang Alkitapẹ̌. Organisasing Yehuwa lai něnadia Alat Bantu Pengajaran. Kěbị publikasi su Alat Bantu Pengajaran makatul᷊ung si kitẹ gunang . . .

• měnětạ mẹ̌bawěke,

• makakoạ taumata mapulu dumaringihẹ̌,

• makakoạ taumata mapulu měngěndung limembong mal᷊awọ,

• měněntiro katěngadẹ̌ su tempong měngahạ pěngangěndungang Alkitapẹ̌, dingangu

•   měgausẹ̌ taumata měmanda situs web i kitẹ lai duměnta su Banalang Kararatuang.

Tantu, Alat Bantu Pengajaran ini tawẹ apa gunane mạeng tawe paketang. * Contone, mạeng seng bọu nẹ̌bawěke dingangu taumata mapulu dumaringihẹ̌, i kitẹ botonge měgělị risalah arau majalah si sie. I sie sarung mẹ̌basa ene sarang i kitẹ saụ mẹ̌tiwo si sie. Kěbị ělang i Yehuwa piạ tanggung jawab gunang měhabarẹ̌ habaru Kararatuang sabang wul᷊ang.

11. Kawe nụe Pěngangěndungang Alkitapẹ̌ Online nikoạ?

¹¹ Pěngangěndungang Alkitapẹ̌ Online su jw.org^® kai cara wal᷊inẹ nipakẹ i Yehuwa gunang mẹ̌tul᷊ung taumata měngěndung katěngadẹ̌. Kawe nụe pěngangěndungang ene nikoạ? Sabang wul᷊ang, lawọ taumata su patikụ dunia nědeạ pěngangěndungang Alkitapẹ̌ su Internet. Pěngangěndungang su situs web i kitẹ makatul᷊ung si sire měnětạ měngěndung katěngadu Hengetangu Mawu. Bọu ene lai, taumata nipẹ̌sombangeng i kitẹ su tempong něnginjilẹ̌ aramanung tawe langsung mapulu měngěndung Alkitapẹ̌ dingangi kitẹ. Mạeng kerene, i kitẹ botonge měnodẹ Pěngangěndungang Alkitapẹ̌ Online su situs web i kitẹ arau měndingọ link si sire. *

12. Manga hal᷊ẹ̌ apa sarung ěndungangu taumata bọu Pěngangěndungang Alkitapẹ̌ Online?

¹² Pěngangěndungang Alkitapẹ̌ Online nělahẹ manga topik ini: ”Alkitab dan Pengarangnya”, ”Tokoh-Tokoh Utama dalam Alkitab”, dingangu ”Harapan yang Dijanjikan dalam Alkitab.” Su tempong taumata měngěndung manga topik ini, i sire sarung měngěndung soal u . . .

• Alkitapẹ̌ piạ gunane si sire

• i sai Yehuwa, Yesus, dingangu manga malaekatẹ̌

• timonang Mawu něndiadi taumata, dingangu

• kawe nụe piạ kasasigěsạ dingangu karal᷊akisẹ̌

Manga pěngangěndungang ini lai mělahẹ kerea Yehuwa sarung . . .

• mapakailang kasasigěsạ dingangu papate,

• mapakawiahẹ̌ taumata nate, lai

• měngganti pěměrentang taumata dingangu Kararatuangu Mawu.

13. Apa Pěngangěndungang Alkitapẹ̌ Online něngganti pěngangěndungang Alkitapẹ̌ lẹ̌ahạkengu sěngkatau Sahiding Yehuwa? Lahẹko.

¹³ Pěngangěndungang Alkitapẹ̌ Online tawe měngganti pěngangěndungang Alkitapẹ̌ lẹ̌ahạkengu sěngkatau Sahiding Yehuwa. Yesus seng něgělị si kitẹ hak istimewa gunang měkoạ muritẹ̌. I kitẹ mělẹ̌harapẹ̌ taumata apang mapulu dumaringihẹ̌ sarung měmuka pěngangěndungang online, měngarěga apa niěndungang, dingangu mapulu měngěndung mal᷊awọ. Mạeng měkoạ ene, i sire aramanung sarung mapulu měnarimạ pěngangěndungang Alkitapẹ̌. Sabang masue sěmbaụ bageang pěngangěndungang online, i sire gẹ̌gausang gunang mẹ̌dorong sěngkatau Sahiding Yehuwa měngahạ pěngangěndungang Alkitapẹ̌ dingangi sire. Sabang ěllo, nal᷊iu wọu 230 taumata nẹ̌dorong měngěndung Alkitapẹ̌ su patikụ dunia! Měngěndung Alkitapẹ̌ dingangu sěngkatau měngangahạ ene sěbạe penting!

14. Tumuhụ apa niparentang i Yesus su Matius 28:19, 20, apa harusẹ̌ koateng i kitẹ, kụ kawe nụe?

¹⁴ Basa Matius 28:19, 20. Su tempong měněntiro Alkitapẹ̌, i kitẹ mẹ̌tawakal᷊i  ’měkoạ taumata mariadi muritẹ̌’ dingangu ’měněntiro si sire měkoạ kěbị apa seng niparentang [i Yesus]’. I kitẹ harusẹ̌ mẹ̌tul᷊ung taumata makaěna sěbạe penting si sire měmile mẹ̌tahamawu si Yehuwa. Ini mangal᷊ene i kitẹ harusẹ̌ mẹ̌tawakal᷊i měmahangsang taumata měkoạ apa seng niěndungang i sire, mẹ̌diandi měgělị pěbawiahi sire si Yehuwa, dingangu baptisang. Mạeng měkoạ manga hal᷊ẹ̌ ene i sire botonge masal᷊amatẹ̌ bọu ěllong Yehuwa.​—1 Ptr. 3:21.

15. I kitẹ madiri měngěngsue tempo gunang apa, kụ kawe nụe?

¹⁵ Kere nisěbạ su bageang humotong, tempo seng mahal᷊i. Ual᷊ingu ene, i kitẹ madiri měngěngsue tempo gunang měněntiro Alkitapẹ̌ su taumata apang tawe něnodẹ i sire mapulu makoạ ělang i Yehuwa. (1 Kor. 9:26) Ini hal᷊ẹ̌ sěbạe penting koateng orasẹ̌ ini! Bědang piạ lawọ taumata harusẹ̌ habarengu habaru Kararatuang těntal᷊ang bědang piạ tempo.

16. Tumuhụ Wahyu 18:2, 4, 5, 8, i kitẹ kěbị harusẹ̌ měkoạ apa? (Pěmanda catatan kaki.)

¹⁶ Basa Wahyu 18:2, 4, 5, 8. Manga ayatẹ̌ ini nělahẹ apa ikẹ̌kapulung Yehuwa bọu manga ělang’E. Kěbị tau Kristen harusẹ̌ mapakal᷊ahẹ i sire sěbạe nẹ̌tatěntang dingangu Babelẹ̌ Gěguwạ. Těntal᷊ang bědang tawe něngěndung katěngadẹ̌, měngangěndung Alkitapẹ̌ ěndịu bědang nakoạ anggota agama palsu. I sie aramanung tụtol᷊e ibadah arau kegiatan wal᷊inẹ bọu agama ene. Arau i sie aramanung měgẹ̌gělị sumbangan gunang agama ene. Mạeng i sie mapulu makoạ penyiar bedang tawe nibaptisẹ̌, i sie harusẹ̌ měměsụ kěbị hubungan dingangu agama palsu. I sie harusẹ̌ měmohẹ surat pengunduran diri arau kahěngang-hěngang měměsụ hubungan dingangu gaheda arau organisasi agamane kangerẹ. *

17. Tau Kristen harusẹ̌ mẹ̌těngkarau bọu hal᷊ẹ̌ kerea, kụ kawe nụe?

¹⁷ Tau Kristen tutune harusẹ̌ měmarikěsa hal᷊ẹ̌e tawẹ apa sěmpụe dingangu Babelẹ̌ Gěguwạ. (2 Kor. 6:14-17) Contone, i kitẹ tantu madiri makoạ mělahal᷊ẹ̌ su gaheda. Bọu ene lai, mạeng měhal᷊ě gunang taumata wal᷊inẹ, i kitẹ madiri měkoạ tumanịu mal᷊awọ hal᷊ẹ̌ su bangunan pẹ̌paketang gunang ibadah bọu agama palsu. Mạeng piạ usaha hala, i kitẹ tawe mẹ̌tawakal᷊i makaěbạ proyek arau měnarimạ hal᷊ẹ̌ piạ sěmpụe dingangu Babelẹ̌ Gěguwạ. Kawe nụe i kitẹ harusẹ̌ těgasẹ̌ soal u hal᷊ẹ̌ ini? Ual᷊ingu i kitẹ madiri měngal᷊ạ bageang  bọu kakanoạ arau dosang agama palsu. Su těngong Mawu manga agama ene kai mal᷊amuhụ.​—Yes. 52:11. *

18. Kerea sěngkatau saudara timol᷊e prinsip Alkitapẹ̌ soal u měmile hal᷊ẹ̌?

¹⁸ Piạ sěngkatau penatua basẹ̌ u kalu kụ piạ usahane hala. Pira taung tamai, sěngkatau kontraktor nakitul᷊ung si sie gunang měkoạ hal᷊ẹ̌ su gaheda, su soa tampạ pẹ̌tatanakengu saudara ene. Kontraktor ene masingkạ saudara ene tawe měnẹ̌narimạ hal᷊ẹ̌ gunang gaheda. Katewe su tempo ene, kontraktor ene seng běga měngsang makitul᷊ung si sai. Maning kerene, saudara ene tatapẹ̌ timol᷊e prinsip Alkitapẹ̌ kụ tawe něnarimạ hal᷊ẹ̌ ene. Misa tuhụe, su koran su soa ene piạ foto basẹ̌ bal᷊inẹ němasẹ̌ salipẹ̌ su gaheda ene. Manga saudara ene něnarimạ hal᷊ẹ̌ ene, tantu fotone sarung masuẹ̌ su koran ene. Mạeng ene nariadi, arengu saudara ene dingangu anạu sěmbaụ sarung mawuhụ! Kụ pẹ̌tiněna lai kasasusang naung i Yehuwa makasilo hal᷊ẹ̌ ene.

19-20. (a) Apa seng nikaěndungang i kitẹ? (b) Apa lai sarung ěndungang i kitẹ?

¹⁹ Tumuhụ těbal᷊u Alkitapẹ̌, peristiwa gěguwạ seng mal᷊ighạ mariadi su dunia ute manga wangsa sarung měmohang ”dame dingangu aman”. Ual᷊ingu seng nitěntirong i Yehuwa, i kitẹ nakaěndung manga wangsa tawe kahěngang-hěngang makarěntang pẹ̌darame. Apa harusẹ̌ koateng i kitẹ těntal᷊ang bohang ene bědang tawe niwohang dingangu kawawinasa bědang tawe diměnta? Yehuwa mapulu i kitẹ tatapẹ̌ sibukẹ̌ měhabarẹ̌ habaru Kararatuang dingangu měkoạ lawọ muritẹ̌. I kitẹ lai mapulu mẹ̌těngkarau bọu kěbị agama palsu. Ene mangal᷊ene i kitẹ madiri makoạ anggota agama palsu arau měkoạ hal᷊ẹ̌ piạ sěmpụe dingangu Babelẹ̌ Gěguwạ.

²⁰ Piạ lai piram baụ peristiwa sarung mariadi su pěngěngsuengu ”ěllo pěngěngsuenge”. Apa manga peristiwa ene? Kụ, apa lai dẹ̌dorongang i Yehuwa gunang koateng i kitẹ? Kerea i kitẹ botonge mẹ̌sasadia tumatěngo manga hal᷊ẹ̌ sarung mariadi ene? Manga kakiwal᷊o ini sarung simbaheng su pěngangěndungang tuhụe.