குடும்பத்தில் மரியாதை காட்டுவது ஏன் முக்கியம்?

• த செவன் பிரின்சிபில் ஃபார் மேக்கிங் எ மேரேஜ் வர்க் என்ற புத்தகம் (கல்யாண வாழ்க்கை சம்பந்தமான புத்தகம்) இப்படிச் சொல்கிறது: ‘கணவனும் மனைவியும் ஒருவருக்கொருவர் மரியாதை காட்டும்போது, பெரிய விஷயங்களில் மட்டுமல்ல, தினமும் அவர்கள் செய்யும் சின்னச் சின்ன விஷயங்களில்கூட, அவர்கள் துணையை அவர்களுக்கு ரொம்ப பிடிக்கும் என்று காட்டுகிறார்கள்.’

• மற்றவர்களுக்கு மரியாதை கொடுக்க தெரிந்த பிள்ளைகளுக்கு தங்கள் மேல் மதிப்பு அதிகமாகும், அப்பா அம்மாவோடு அவர்கள் பாசமாக இருப்பார்கள். பிள்ளைகளுக்குப் பெரிதாக மனநல பிரச்சினைகளும் வராது என்று ஆராய்ச்சிகள் காட்டுகின்றன.

 நீங்கள் என்ன செய்யலாம்

குடும்பமாக சேர்ந்து திட்டம் போடுங்கள். முதலில், மரியாதை காட்டுவதற்கு என்னவெல்லாம் செய்ய வேண்டும் என்று கணவன் மனைவியாக முடிவு செய்யுங்கள். இரண்டாவதாக, மரியாதையை காட்ட குடும்பத்தில் இருக்கிறவர்கள் எல்லாரும் என்ன செய்ய வேண்டும், என்ன செய்யக்கூடாது என்று நீங்கள் எதிர்பார்க்கிறீர்கள் என்பதை எழுதி வையுங்கள். மூன்றாவதாக, நீங்கள் போட்ட திட்டத்தைப் பற்றி குடும்பமாக எல்லாரும் உட்கார்ந்து பேசுங்கள். அப்படிச் செய்தால்தான், மரியாதை காட்டுவதற்கு நீங்கள் ஒவ்வொருவரும் என்ன செய்ய வேண்டும் என்று உங்களுக்கு தெரிந்திருக்கும்.

செய்து காட்டுங்கள். குடும்பத்தில் யாராவது எதையாவது தப்பாக செய்துவிட்டால் நீங்கள் கிண்டல் செய்கிறீர்களா? அவர்களுடைய கருத்துகளை சொல்லும்போது மட்டம் தட்டுகிறீர்களா? அவர்கள் உங்களிடம் பேசும்போது கண்டுக்காமல் இருக்கிறீர்களா அல்லது நீங்கள் குறுக்க குறுக்க பேசுகிறீர்களா? மரியாதை காட்டுவதில் நீங்கள் முதல் ஆளாக இருங்கள்.

டிப்ஸ்: நிறைய பேர் சொல்வதுபோல் ‘மரியாதை தானாக வராது நீங்கள்தான் சம்பாதிக்க வேண்டும்’ என்று உங்கள் கணவன்/மனைவியிடமோ பிள்ளையிடமோ சொல்லாமல், ‘மரியாதை காட்டுவது என் பொறுப்பு’ என்று நடந்துகொள்ளுங்கள்.

ஒத்துப்போக முடியவில்லை என்றாலும் மரியாதையாக பேசுங்கள். உங்களுடைய கருத்தை சொல்லும்போது, ‘நீ என்றைக்காவது இப்படி செய்திருக்கிறாயா?’, ‘நீ எப்பவுமே இப்படித்தான்’ என்றெல்லாம் சொல்லாதீர்கள். அப்படி சொல்வது அவர்களை குத்திக் காட்டுவதுபோல் இருக்கும். அது அவர்கள் மனதை காயப்படுத்தும். அதுமட்டுமல்ல, சின்னச் சின்ன பிரச்சினைகள்கூட பூகம்பமாக வெடிக்கும்.