“Iha haʼu-nia hela-fatin, ita ladún hasoru ema neʼebé tinan 25 ba kraik neʼebé seidauk fuma sigarru ka vape.”—Julia.

Iha informasaun neʼe

•  Ita presiza hatene saida?

•  Saida mak Ita bele halo?

•  Oinsá ho ganja?

•  Ita-nia kolega hanoin saida

 Ita presiza hatene saida?

•   Sigarru bele oho ita. Nikotina mak kímiku prinsipál iha sigarru, neʼe mak kímiku ida neʼebé iha venenu no halo ema sai toman no susar atu para. Tuir informasaun husi Centros de Controle e Prevenção de Doenças iha Estadus Unidus, hatete: “Uza tabaku mak razaun boot neʼebé halo ema iha mundu tomak mate sedu no hetan moras maibé loloos bele prevene.”

   “Haʼu-nia serbisu mak uza mákina USG hodi haree pasiente nia kondisaun no haʼu haree ona foto barak neʼebé hatudu oinsá fuma afeta ema nia isin. Haʼu hakfodak atu haree katak ema neʼebé uluk fumadór, iha raan maten barak iha sira-nia uat laran. Haʼu hafolin tebes haʼu-nia isin no neʼe halo haʼu lakohi koko atu fuma.”—Theresa.

   Ita hatene ka lae? Sigarru iha kímiku hamutuk maizumenus 7.000, no barak mak iha venenu. Tinan-tinan, ema millaun ba millaun mate tanba moras oioin neʼebé liga ho tabaku.

•   Ema neʼebé uza vape hatama buat kímiku oioin neʼebé iha venenu ba sira-nia isin-lolon. Matenek-naʼin sira hatete katak uza vape ka sigarru eletróniku bele estraga ema nia pulmaun no oho ema. Hanesan ho sigarru, produtu vape barak mak uza nikotina. Informasaun ida neʼebé esplika kona-ba sigarru eletróniku, hakerek nuneʼe: “Nikotina bele halo joven sira sai atan ba droga sira seluk no sei susar atu para.”

   “Iha produtu vape neʼebé iha sabór midar hanesan rebusadu ka ai-fuan neʼebé baibain labarik no joven sira gosta. Entaun, bainhira sira uza vape, neʼe halo sira hanoin katak neʼe la perigu.”—Miranda.

   Ita hatene ka lae? Suar neʼebé sai husi sigarru eletróniku mak laʼós bee deʼit, maibé inklui kímiku oioin neʼebé bele fó impaktu aat tebes ba ema nia saúde. No neʼe sei tama ba Ita-nia pulmaun.

 Saida mak Ita bele halo?

•   Hatene faktu sira. Labele fiar informasaun hotu neʼebé Ita rona, porezemplu, uza vape sei la estraga Ita-nia isin ka neʼe mak dalan diʼak atu hamenus estrese. Halo riset rasik, no foti desizaun neʼebé matenek bazeia ba faktu sira.

   Bíblia nia prinsípiu: “Ema neʼebé la iha esperiénsia tau fiar ba liafuan hotu, maibé ema neʼebé matenek hanoin didiʼak kona-ba ninia hakat ida-idak.”—Provérbios 14:15.

   “Ema famozu ka Ita-nia kolega sira neʼebé fuma no uza vape, karik haree kontente bainhira uza buat sira-neʼe. Maibé se Ita hanoin kona-ba impaktu aat oioin husi fuma no uza vape, Ita rekoñese katak neʼe laʼós buat neʼebé lori ksolok neʼebé loos ba ema nia moris.”—Evan.

   Hanoin toʼok: Joven sira neʼebé fuma ka uza vape kontente duni ka lae? Sira bele tahan hasoru situasaun neʼebé halo estrese? Ka, neʼe sei aumenta liután sira-nia problema?

•    Halo atividade sira neʼebé pozitivu atu hamenus estrese. Dalan diʼak atu hamenus estrese mak inklui atividade neʼebé pozitivu hanesan halo ezersísiu, lee, ka ransu hamutuk ho kolega sira neʼebé bele anima Ita. Tanba Ita okupadu ho atividade pozitivu oioin, Ita sei la sente katak Ita presiza fuma.

   Bíblia nia prinsípiu: “Hanoin resin mak halo ema sente laran-todan, maibé liafuan neʼebé diʼak mak halo ema sente laran-haksolok.”—Provérbios 12:25.

   “Ema hanoin katak fuma no uza vape mak hamenus estrese. Maibé loloos, buat sira-neʼe bele hamenus estrese ba tempu badak deʼit, no fó impaktu la diʼak iha Ita-nia moris tomak. Iha dalan diʼak liu atu tahan hasoru estrese.”—Angela.

   Hanoin toʼok: Saida deʼit mak Ita bele halo atu tahan hasoru estrese? Se Ita presiza ajuda, haree informasaun “Pergunta husi joven sira” ho títulu “Oinsá haʼu bele tahan hasoru laran-susar?”

•    Sai prontu atu hasoru tentasaun. Tentasaun bele mai husi Ita-nia kolega eskola ka husi atividade halimar nian. Filme, programa televizaun, no média sosiál dala barak hatudu katak ema sira neʼebé fuma no uza vape mak jeitu no kontente.

   Bíblia nia prinsípiu: “Ema maduru . . . uza beibeik sira-nia kbiit atu tetu didiʼak, hodi halo nuneʼe sira treinu ona sira-nia kbiit neʼe atu hatene saida mak loos no saida mak sala.”—Ebreu 5:14.

   “Bainhira haʼu sei eskola, haʼu-nia kolega sira respeitu haʼu-nia desizaun atu la fuma ka uza vape. Bainhira haʼu esplika ho klaru haʼu-nia desizaun, sira defende haʼu. Entaun, maski Ita-nia desizaun la hanesan ho kolega sira, koko fó-hatene deʼit sira. Neʼe bele proteje Ita.”—Anna.

   Hanoin toʼok: Ita konsege manán hasoru tentasaun husi kolega ka lae? Ita hanoin-hetan tempu neʼebé Ita konsege halo ida-neʼe? Se Ita sente presiza hadiʼa an kona-ba parte neʼe, favór haree ba “Rencana Tindakan” iha kapítulu 15 husi livru Pertanyaan Kaum Muda—Jawaban yang Praktis, Jilid 2.

•   Hili didiʼak Ita-nia kolega. Se Ita habelun ho ema neʼebé sente katak sira la presiza fuma sigarru no uza vape, fasil liu ba Ita atu manán hasoru tentasaun neʼe.

   Bíblia nia prinsípiu: “Ema neʼebé laʼo hamutuk ho ema matenek sei sai matenek, maibé ema neʼebé ransu ho ema beik sei hetan problema boot.”—Provérbios 13:20.

   “Se Ita habelun ho ema neʼebé kaer metin ba sira-nia prinsípiu moris no bele kontrola an no haree katak sira moris ho kontente, neʼe sei book Ita atu halo tuir sira.”—Calvin.

   Hanoin toʼok: Ita-nia kolega diʼak apoia Ita-nia desizaun atu halaʼo moris neʼebé moos no saudavel ka sira hanetik Ita atu halo nuneʼe?

 Oinsá ho ganja?

 Ema barak dehan katak ganja (marijuana) la perigu ida. Maibé neʼe bosok!

•   Joven sira neʼebé uza ganja iha risku atu sai atan ba ida-neʼe no susar atu para. Peskiza hatudu katak uza ganja bele estraga kakutak permanente, neʼe inklui hamenus ita-nia matenek.

•   Associação de Abuso de Substâncias e Serviços de Saúde Mental iha Estadus Unidus hatete: “Peskiza hatudu katak ema neʼebé uza ganja, dala barak la iha relasaun diʼak ho ema seluk, valór aat iha parte edukasaun, la hetan serbisu neʼebé diʼak, no moris la kontente.”

   “Uluk, haʼu hakarak koko atu fuma ganja, dala barak haʼu-nia razaun mak atu halakon estrese. Maibé bainhira haʼu hanoin kona-ba se haʼu sai atan ba ida-neʼe no susar atu para, osan neʼebé haʼu sei gasta ba ida-neʼe, no oinsá neʼe afeta haʼu-nia saúde, haʼu rekoñese katak fuma ganja sei halo haʼu estrese liután.”—Judah.