Besik família hotu iha regra, karik regra kona-ba tama uma tuku hira, oras hira mak Ita gasta atu uza teknolojia, no hahalok neʼebé Ita hatudu ba ema seluk.

 Oinsá se Ita kontra ona regra ida? Ita labele troka buat neʼebé akontese ona, maibé Ita bele halo buat ruma hodi situasaun la sai aat liután. Informasaun neʼe bele ajuda Ita.

•  Buat neʼebé Ita labele halo

•  Saida mak Ita presiza halo?

•  Ita-nia kolega hanoin saida

•   Se Ita-nia inan-aman la hatene katak Ita kontra sira-nia regra, karik Ita hanoin atu subar deʼit sala neʼebé Ita halo.

•   Se Ita-nia inan-aman hatene katak Ita kontra sira-nia regra, karik Ita hanoin atu buka razaun oioin ka duun fali ema seluk.

 Opsaun sira-neʼe mak la diʼak. Tanbasá? Tanba se Ita subar buat neʼebé akontese ka fó razaun oioin kona-ba buat neʼebé Ita halo, neʼe hatudu katak Ita seidauk maduru. Ita-nia inan-aman mós sei hanoin hanesan neʼe.

 “Bosok laʼós solusaun neʼebé diʼak. Ikusmai, ita-nia inan-aman sei hatene buat neʼebé akontese, no sira sei fó dixiplina neʼebé makaʼas liu fali kompara ho dixiplina neʼebé sira fó se ita fó-hatene uluk ba sira.”—Diana.

•   Rekoñese Ita-nia sala. Bíblia hatete: “Ema neʼebé subar ninia sala sira sei la hetan susesu.” (Provérbios 28:13) Ita-nia inan-aman komprende katak Ita la perfeitu. Maibé sira hakarak Ita atu koʼalia nakloke bainhira Ita halo sala ruma.

   “Fasil liu ba ita-nia inan-aman atu hatudu laran-sadiʼa no fó perdua ba ita, se ita fó sai ita-nia sala. Bainhira ita koʼalia nakloke ba ita-nia inan-aman, sira sei fiar liután ita.”—Olivia.

•   Husu deskulpa. Bíblia hatete: “Imi hotu tenke haraik an ba malu.” (1 Pedro 5:5) Ita presiza duni hahalok haraik an atu bele hatete “Deskulpa” no la buka razaun oioin.

   “Bainhira ema kontinua buka razaun oioin, sira-nia konxiénsia sei ladún fó-sala ba sira kuandu sira halo sala ruma. Ikusmai, sira-nia laran la sente sala bainhira sira halo buat ruma neʼebé sala.”—Heather.

•   Simu konsekuénsia. Bíblia hatete: “Rona ba dixiplina.” (Provérbios 8:33) Labele muramura, maibé simu dixiplina neʼebé Ita-nia inan-aman fó.

   “Se ita muramura liután kona-ba dixiplina neʼebé ita hetan, ita-nia situasaun sei sai aat liután. Aprende atu simu konsekuénsia, no keta fokus demais ba dixiplina neʼebé ita hetan.”—Jason.

•   Hakaʼas an atu Ita-nia inan-aman bele tau fiar fali ba Ita. Bíblia hatete: “Hasai tiha hahalok tuan, katak imi-nia moris uluk nian.” (Éfeso 4:22) Nafatin halo desizaun neʼebé diʼak atu nuneʼe Ita-nia inan-aman bele tau fiar fali ba Ita.

   “Se ita halo beibeik desizaun neʼebé diʼak no hatudu ba ita-nia inan-aman katak ita sei la repete tan sala neʼebé hanesan, ikusmai sira sei tau fiar fali ba ita.”—Karen.

 SUJESTAUN: Halo liu fali buat neʼebé sira husu Ita atu halo hodi nuneʼe Ita hatudu katak sira bele tau fiar ba Ita. Porezemplu, se Ita sai ba fatin ruma, telefone Ita-nia inan-aman bainhira Ita iha dalan ona atu fila ba uma, maski Ita la fila tarde. Neʼe sei ajuda sira atu komprende katak Ita hakarak sira atu tau fiar fali ba Ita.