Dala ruma, Jeová nia atan balu sai duvida no hanoin katak moris tuir Bíblia nia standard mak saugati deʼit. (Salmo 73:2, 3) Karik sira mós komesa halo buat neʼebé kontra Maromak nia ukun-fuan no tuirmai koko subar sira-nia hahalok aat neʼe.

 Informasaun neʼe sei ajuda sira neʼebé halaʼo daudaun moris ho oin rua maibé hakarak atu para halo ida-neʼe.

Iha informasaun neʼe

•  Saida mak moris ho oin rua?

•  Hodi halaʼo moris ho oin rua, neʼe halo haʼu sai ema neʼebé la diʼak?

•  Oinsá mak haʼu bele para atu moris ho oin rua?

•  Ita-nia kolega hanoin saida

 Moris ho oin rua katak bainhira Ita hamutuk kolega neʼebé la serbí Jeová, Ita halo buat neʼebé Ita hatene neʼe mak sala; maibé bainhira Ita hamutuk maluk fiar-naʼin sira, Ita finje katak Ita hakarak serbí Jeová. Neʼe hanesan Ita iha moris rua, no Ita uza hela topeng.

 “Bainhira Ita halaʼo moris ho oin rua, ita subar buat ruma husi kolega neʼebé la serbí Jeová no mós husi irmaun-irmán. Entaun la iha ema ida mak hatene Ita mak ema oinsá loos. Kuandu moris ho oin rua, Ita la onestu ba ema hotu.”—Erin.

 Ita hatene ka lae? Moris ho oin rua mós inklui halo buat ruma neʼebé Ita hatene Jeová la gosta bainhira Ita mesak.

 “Bainhira haʼu tinan 14, haʼu komesa haree ba foto no vídeo foʼer sira iha internét. Bainhira iha ema seluk nia oin, haʼu hatudu katak haʼu odi pornografia, maibé iha haʼu-nia laran haʼu hatene katak haʼu la odi pornografia.”—Nolan.

 Bíblia nia prinsípiu: “La iha ema ida mak bele sai atan ba patraun naʼin-rua, tanba nia sei odi ida no hadomi ida seluk, ka nia sei apoia ida no hakribi ida seluk.”—Mateus 6:24.

 Laʼós ema hotu neʼebé moris ho oin rua mak ema neʼebé la diʼak. Ema balu deside atu lakohi duni moris tuir Bíblia nia standard. Maibé Ita mós hanesan neʼe ka lae? Ka iha razaun ruma neʼebé halo Ita moris ho oin rua, porezemplu:

•   Ita la kontente kuandu kolega haree Ita la hanesan ho sira.

•   Ita sente iha hanoin neʼebé hanesan ho kolega eskola duké sira neʼebé iha kongregasaun.

•   Ita sente Ita-nia kbiit la toʼo atu moris tuir Maromak nia mandamentu hotu.

 “Haʼu hanoin joven balu neʼebé halaʼo moris ho oin rua sente kontente liu hamutuk ho ema neʼebé la serbí Jeová, tanba sira hakarak ema simu sira maski neʼe katak sira halo buat neʼebé la tuir ema Kristaun nia morál.”—David.

 Tuir loloos, buat sira-neʼe laʼós razaun loos atu halaʼo moris ho oin rua. Maibé, neʼe ajuda ita komprende katak ema neʼebé diʼak mós bele monu ba lasu neʼe. Se neʼe akontese ba Ita, saida mak Ita bele halo?

1.  1. Hanoin kona-ba Ita-nia moris agora daudaun. Husu Ita-nia an: ‘Haʼu hakarak duni sai ema hanesan neʼe ka lae? Se haʼu kontinua halaʼo moris hanesan neʼe, konsekuénsia mak saida?’

    Bíblia nia prinsípiu: “Ema neʼebé matenek haree perigu . . . , maibé ema neʼebé la iha esperiénsia la hasees an no hetan susar.”—Provérbios 27:12.

2.  2. Presiza onestu. Koʼalia kona-ba Ita-nia situasaun ba Ita-nia inan-aman ka belun maduru ida neʼebé respeitu Jeová nia ukun-fuan. Se Ita husu ajuda ba sira, neʼe sei halo sira kontente. No sira sei orgullu ho Ita tanba Ita hakarak halo buat neʼebé loos!

    “Susar tebes ba haʼu atu fó-hatene ema seluk kona-ba haʼu-nia hahalok, maibé bainhira fó sai tiha, haʼu sente kmaan tebes.”—Nolan.

    Bíblia nia prinsípiu: “Ema neʼebé subar ninia sala sira sei la hetan susesu, maibé ema neʼebé fó sai no husik tiha ninia sala sei hetan laran-sadiʼa.”—Provérbios 28:13.

3.  3. Simu konsekuénsia. Hanoin-hetan, se Ita subar buat ruma husi Ita-nia inan-aman no husi ema iha kongregasaun durante neʼe, neʼe halo sira lakon fiar ba Ita. Rezultadu mak Ita-nia inan-aman no mós katuas sira iha kongregasaun karik la fó lisensa ba Ita atu halo knaar ruma. Simu konsekuénsia no deside metin atu “hatudu laran-moos iha buat hotu” komesa husi agora ba oin.—Ebreu 13:18.

    Bíblia nia prinsípiu: “Rona ba konsellu no simu dixiplina, atu nuneʼe ó bele sai matenek iha aban-bainrua.”—Provérbios 19:20.

4.  4. Hametin Ita-nia fiar katak Jeová hadomi Ita. Tanba Jeová hadomi ita, nia hatene buat hotu neʼebé ita halo. Entaun, se Ita halaʼo moris ho oin rua, nia hatene ida-neʼe no sente laran-triste. Maibé ‘tanba nia hanoin Ita’, nia hakarak atu ajuda Ita hadiʼa Ita-nia dalan moris.—1 Pedro 5:7.

    Bíblia nia prinsípiu: “Jeová nia matan hateke didiʼak ba mundu tomak atu hatudu ninia kbiit hodi salva ninia atan sira neʼebé laran-metin ba nia.”—2 Krónikas 16:9.