PERGUNTA HUSI JOVEN SIRA
Tanbasá haʼu presiza halo orasaun?
Tuir relatóriu ida, porsentu 80 husi joven sira iha Amérika halo orasaun, maibé porsentu 50 husi sira mak halo orasaun loroloron. Karik sira balu hanoin: ‘Orasaun mak atu halo haʼu sente kmaan deʼit ka buat seluk tan?’
Orasaun katak sá?
Orasaun mak dalan atu koʼalia ba Kriadór kona-ba buat hotu. Neʼe mak priviléjiu furak tebes! Maski Jeová mak aas liu hotu, maibé “nia la dook husi ita ida-idak”. (Apóstolu 17:27) Tuir loloos, Bíblia konvida ita: “Hakbesik ba Maromak, no nia sei hakbesik ba imi.”—Tiago 4:8.
Oinsá mak Ita bele hakbesik ba Maromak?
Dalan ida mak liuhusi orasaun, neʼe mak dalan neʼebé Ita koʼalia ba Maromak.
Dalan seluk mak liuhusi estuda Bíblia, neʼe mak dalan neʼebé Maromak koʼalia ba Ita.
Estuda Bíblia no orasaun mak hanesan komunika ba malu ho Maromak, neʼe sei ajuda Ita atu iha relasaun neʼebé metin ho Maromak.
“Koʼalia ba Jeová neʼebé Aas Liu Hotu mak priviléjiu furak tebes neʼebé ema iha.”—Jeremy.
“Hodi fahe haʼu-nia sentimentu no hanoin ba Jeová, haʼu sente besik liután ba nia.”—Miranda.
Maromak rona ita-nia orasaun ka lae?
Maski karik Ita fiar ba Maromak no halo orasaun ba nia, maibé dala ruma susar atu fiar katak Maromak rona duni ba Ita-nia orasaun. Maski nuneʼe, Bíblia bolu Jeová nuʼudar “Maromak neʼebé rona ba orasaun”. (Salmo 65:2) Maromak mós konvida Ita atu ‘entrega Ita-nia laran-susar hotu ba nia’. Tanbasá? ‘Tanba nia hanoin Ita.’—1 Pedro 5:7.
Hanoin toʼok: Ita sempre buka tempu atu koʼalia ho Ita-nia belun diʼak ka lae? Ita mós bele halo hanesan neʼe ho Maromak. Koʼalia beibeik ho Maromak liuhusi orasaun, no uza ninia naran Jeová. (Salmo 86:5-7; 88:9) Loloos, Bíblia konvida Ita atu “halo orasaun beibeik”.—1 Tesalónika 5:17.
“Orasaun mak hanesan konversa ho haʼu-nia Aman lalehan, haʼu fakar sai haʼu-nia laran tomak ba nia.”—Moises.
“Haʼu koʼalia ba Jeová kona-ba haʼu-nia problema iha dalan neʼebé hanesan haʼu sei koʼalia ba haʼu-nia amá ka belun diʼak.”—Karen.
Ita bele halo orasaun kona-ba saida?
Bíblia hatete: “Iha situasaun hotu husu ajuda husi Maromak liuhusi orasaun no harohan no mós fó agradese.”—Filipe 4:6.
Neʼe katak Ita bele halo orasaun kona-ba Ita-nia problema ka lae? Bele! Tuir loloos, Bíblia hatete: “Entrega ó-nia laran-susar ba Jeová, no nia sei apoia ó.”—Salmo 55:22.
Iha Ita-nia orasaun ba Maromak, diʼak atu Ita la temi deʼit kona-ba Ita-nia problema. Feto joven naran Chantelle hatete: “Se haʼu sempre husu deʼit ajuda ba Jeová, haʼu ladún iha relasaun diʼak ho nia. Haʼu hatoʼo uluk haʼu-nia agradese no buat neʼebé haʼu hakarak fó agradese ba Maromak mak barak tebes.”
Hanoin toʼok: Ita hakarak hatoʼo agradese ba Maromak kona-ba saida? Ohin Ita bele fó obrigadu ba Jeová kona-ba buat tolu saida?
“Dala ruma, buat simples hanesan ai-funan furak ida bele book ita atu hatoʼo agradese ba Jeová liuhusi orasaun.”—Anita.
“Hanoin kleʼan kona-ba kriasaun ida neʼebé ita gosta tebes ka hanoin kona-ba versíkulu ida husi Bíblia neʼebé kona loos ita-nia laran, no tuirmai hatoʼo obrigadu ba Jeová kona-ba neʼe.”—Brian.
Karik Ita sei gosta
ITA-NIA KOLEGA HANOIN SAIDA
Razaun ba Ita-nia fiar—Moris tuir Maromak nia morál duké tuir Ita rasik nia hanoin
Joven sira esplika oinsá sira hasees an husi konsekuénsia aat neʼebé sira-nia kolega eskola hasoru.
HANORIN IMPORTANTE SIRA HUSI BÍBLIA
Maromak rona orasaun hotu ka lae?
Oinsá se ema ida halo orasaun tanba hanoin an deʼit? Oinsá se mane ida baku ninia feen iha uma, no loron tuirmai nia husu Maromak nia bensaun?
PERGUNTA KONA-BA BÍBLIA
Tanbasá halo orasaun? Maromak sei hatán haʼu-nia orasaun ka lae?
Ita presiza halo orasaun tuir Maromak nia hakarak se ita hakarak nia atu hatán ita-nia orasaun.
LIVRU HAKLAKEN
Maromak rona ita-nia orasaun ka lae?
Bíblia halo ita fiar katak Maromak rona ba ita-nia orasaun neʼebé ita halo tuir dalan neʼebé loos.
LIVRU HAKLAKEN
