“Haʼu husik dame ba imi. Haʼu fó haʼu-nia dame ba imi. Dame neʼebé haʼu fó ba imi la hanesan ho dame neʼebé mundu fó. Keta husik imi-nia laran sente susar no keta husik imi-nia laran sente taʼuk.”—João 14:27, Tradusaun Mundu Foun.

 “Dame haʼu husik ba imi, Haʼu nia dame Haʼu fo ba imi; laʼos hanesan mundu fo mak Haʼu fo ba imi. Keta laran susar ba; keta taʼuk ba.”—João 14:27, Liafuan diak ba imi segunda edisaun.

 Ho liafuan sira-neʼe, Jesus ho laran-diʼak hametin apóstolu sira katak sira la presiza hanoin barak demais kuandu hasoru problema. Ho Maromak nia ajuda, sira bele sente dame iha laran hanesan Jesus.

 Dame hanesan saida mak Jesus husik, ka fó ba ninia apóstolu sira? Jesus fó sira ninia dame, neʼe mak dame neʼebé nia rasik sente. Neʼe la dehan katak la hetan terus ka susar. (João 15:20; 16:33) Maski ema trata Jesus iha dalan neʼebé la justu toʼo fó kastigu-mate, maibé Jesus sente dame iha ninia neon no laran. (Lucas 23:27, 28, 32-34; 1 Pedro 2:23) Nia kalma nafatin tanba nia hatene katak ninia Aman Jeová a simu nia no hadomi nia.—Mateus 3:16, 17.

 Jesus fó dame ba apóstolu sira hodi hametin sira katak Jesus no ninia Aman hadomi no simu sira. (João 14:23; 15:9, 10; Roma 5:1) Dame neʼe bazeia ba sira-nia fiar ba Jesus nuʼudar Maromak nia Oan, no neʼe ajuda sira atu la sente taʼuk ka laran-susar. (João 14:2) Maski Jesus sei la hamutuk tan ho sira iha rai, maibé nia promete katak Maromak nia espíritu santu sei ajuda sira atu iha konfiansa no dame iha laran. (João 14:25-27) Jesus nia dixípulu sira bele sai aten-brani atu hasoru susar, tanba hatene katak Jeová simu sira no apoia sira.—Ebreu 13:6.

 Bainhira Jesus iha rai, ema iha toman atu kumprimenta malu hodi espera katak dame hela ho sira. (Mateus 10:12, 13) Maibé, Jesus la dehan deʼit atu dame hela ho sira, maibé nia fó dame ba sira. Liután neʼe, dame neʼebé Jesus fó la hanesan ho dame neʼebé mundu b neʼe oferese. Mundu bele oferese dame balu liuhusi relasaun diʼak ho ema seluk, rikusoin, naran-boot, ka pozisaun. Maibé Jesus fó dame neʼebé la depende ba ema ida-idak nia situasaun. Neʼe mak dame iha laran neʼebé dura ba nafatin.

 Jesus koʼalia liafuan sira-neʼe ba ninia apóstolu sira neʼebé laran-metin iha kalan antes nia mate. Iha kalan neʼe, Jesus dehan katak lakleur tan nia sei bá fatin neʼebé apóstolu sira labele tuir. (João 13:33, 36) Liafuan neʼe halo apóstolu sira triste tebes. (João 16:6) Tan neʼe Jesus hametin sira hodi esplika tanbasá sira la presiza hanoin barak kona-ba buat neʼebé sei akontese bainhira Jesus la hamutuk tan ho sira.

 Jesus nia liafuan neʼe anima ema Kristaun ohin loron. Ita mós bele hetan dame. (2 Tesalónika 3:16) Kuandu ita sai Jesus nia dixípulu, ita komprende katak Jesus no ninia Aman Jeová hadomi no simu ita. (Koloso 3:15; 1 João 4:16) Rezultadu mak ita la presiza hanoin barak demais. Tanbasá? Tanba Maromak mak iha ita-nia sorin.—Salmo 118:6; Filipe 4:6, 7; 2 Pedro 1:2.

 Haree vídeo badak neʼe hodi komprende kona-ba livru João.