Iha informasaun neʼe

•  Aman nia knaar mak saida?

•  Oinsá mak aman nia knaar úniku?

•  Aman no oan-feto

•  Matadalan ba aman sira

•   Antes Ita-nia oan moris. Hahalok neʼebé Ita hatudu agora nuʼudar laʼen, neʼe mós hatudu Ita sei sai aman hanesan saida iha futuru. Livru Do Fathers Matter? hatete:

   “Se mane ida ajuda ninia feen neʼebé isin-rua atu sosa sasán, lori nia ba konsulta, no haree oan neʼebé kiʼik liuhusi ultrasón ka rona oan neʼe nia fuan book an, ema hanesan neʼe mak sei ajuda ninia pár no bebé kuandu moris.”

   “Haʼu lakohi haʼu-nia feen sente mesamesak durante nia isin-rua, entaun haʼu ajuda nia ho buat hotu neʼebé haʼu bele. Ami mós prepara bebé nia kuartu hamutuk. Neʼe mak tempu espesiál ba ami naʼin-rua bainhira ami prepara ba bebé neʼebé atu moris.”—James.

   Bíblia nia prinsípiu: “Keta buka diʼak deʼit ba imi-nia an rasik, maibé buka mós ema seluk nia diʼak.”—Filipe 2:4.

•   Depois Ita-nia oan moris ona. Ita bele haburas relasaun besik ho Ita-nia oan hodi halimar ka koʼus nia. Ajuda tau matan ba bebé. Se Ita envolve an atu haboot Ita-nia oan, neʼe sei fó impaktu diʼak tebes ba nia nuʼudar nia sai boot. Relasaun neʼebé Ita haburas hatudu katak Ita hafolin tebes Ita-nia oan.

   “Koko atu iha hanoin hanesan ho Ita-nia oan. Halimar hamutuk. Keta sériu demais. Hanoin-hetan, oan sei forma ninia ideia kona-ba domin liuhusi Ita neʼebé nuʼudar inan-aman.”—Richard.

   Bíblia nia prinsípiu: “Oan sira mak liman-rohan husi Jeová; oan sira neʼebé moris mai mak prezente ida.”—Salmo 127:3.

•   Nuʼudar Ita-nia oan sai boot. Peskiza ida hatudu katak labarik sira neʼebé besik liu ba sira-nia aman sei sai matenek iha eskola, ladún iha problema ho emosaun, no iha posibilidade boot atu la uza droga no la envolve an iha krime. Tan neʼe, uza Ita-nia tempu atu haburas relasaun diʼak ho Ita-nia oan.

   “Haʼu-nia oan-mane fó-hatene haʼu katak buat neʼebé nia saudades tebes depois nia hela ketak mak tempu neʼebé ami koʼalia ba malu durante viajen ka kuandu ami han-kalan. Diskusaun balu neʼebé importante mosu derrepente deʼit iha tempu neʼebé haʼu la espera. Buat sira-neʼe akontese tanba ami gasta tempu barak hamutuk.”—Dennis.

   Bíblia nia prinsípiu: “Kontinua haree didiʼak oinsá imi halaʼo imi-nia moris, atu imi la moris nuʼudar ema beik maibé nuʼudar ema matenek. Uza didiʼak imi-nia tempu.”—Éfeso 5:15, 16.

 Husi uluk kedas, ema haree aman nuʼudar ida neʼebé tau matan ba família nia presiza fíziku nian no proteje família, no inan mak ida neʼebé tau matan ba família nia presiza emosaun nian. (Deuteronómio 1:31; Isaias 49:15) Maibé dala ruma inan bele halo fali knaar neʼebé baibain aman mak halo, no aman mós bele halo knaar neʼebé baibain inan mak halo. Maski nuneʼe, peskiza sira fó sai katak inan no aman ida-idak kontribui ba moris família nian iha dalan neʼebé úniku. a

 Matenek-naʼin kona-ba família, naran Judith Wallerstein esplika ninia esperiénsia rasik. Nia hakerek: “Kuandu haʼu-nia oan-feto neʼebé tinan 12 karreta xoke, nia hakarak ninia apá bá hamutuk ho nia iha ambulánsia tanba nia fiar katak ninia apá bele proteje nia iha situasaun neʼe. Depois toʼo tiha iha ospitál, nia hakarak haʼu atu tuur iha ninia sorin loron tomak atu fó kmaan ba nia.” b

 “Aman bele ajuda família atu sente seguru no proteje família iha dalan neʼebé inan labele halo. Iha tempu hanesan, inan bele ajuda ninia oan sira atu sente domin nuʼudar nia rona ba sira no komprende. Inan-aman bele serbisu hamutuk nuʼudar ekipa ida.”—Daniel.

 Bíblia nia prinsípiu: “Haʼu-nia oan, rona ba ó-nia aman nia dixiplina, no keta fila kotuk ba ó-nia inan nia hanorin.”—Provérbios 1:8.

 Nuʼudar aman, Ita hakarak hanorin Ita-nia oan-feto oinsá nia merese simu respeitu husi mane. Nia bele aprende lisaun neʼe liuhusi dalan rua tuirmai:

•   Hodi haree oinsá Ita trata ninia inan. Kuandu Ita hatudu domin no respeitu ba Ita-nia feen, Ita-nia oan-feto sei haree katak hahalok sira-neʼe importante kuandu nia hili mane neʼebé nia atu kaben iha futuru.—1 Pedro 3:7.

•   Hodi haree oinsá Ita trata nia. Kuandu Ita hatudu respeitu ba Ita-nia oan-feto, Ita hanorin nia atu hafolin ninia an. Nia aprende katak mane seluk mós presiza trata nia iha dalan hanesan neʼe.

   Maibé se aman ida trata aat ninia oan-feto, neʼe sei halo nia sente la iha folin no neʼe bele book nia atu buka domin husi mane seluk, neʼebé karik iha intensaun la diʼak.

   “Kuandu aman ida hatudu domin no fó apoiu ba ninia oan-feto, neʼe bele ajuda oan-feto neʼe atu la laran-monu ba mane neʼebé la iha hahalok diʼak atu sai laʼen.”—Wayne.