Bíblia la temi liafuan pornografia, cybersex, ka buat seluk hanesan neʼe. Maski nuneʼe, Bíblia fó sai Maromak nia hanoin kona-ba buat neʼebé tenta ema atu halo relasaun seksuál ho ema neʼebé laʼós ninia kaben, no mós buat neʼebé halo ema iha hanoin sala kona-ba relasaun seksuál. Haree toʼok eskritura sira tuirmai:

•   “Hamate hakarak isin nian neʼebé book imi atu halo sala seksuál, hahalok la moos, hakarak seksuál neʼebé labele kontrola.” (Koloso 3:5) Pornografia la ajuda ema atu hamate hakarak neʼebé sala, maibé haburas ida-neʼe. Neʼe halo ema sai la moos tuir Maromak nia haree.

•   “Ema neʼebé hateke beibeik ba feto ida toʼo kaan nia, ema neʼe halo ona sala seksuál ho feto neʼe iha ninia laran.” (Mateus 5:28) Dezeñu neʼebé hatudu hahalok seksuál neʼebé la morál bele book ema atu iha hanoin foʼer toʼo ikusmai halo sala oioin.

•   “Iha imi-nia leet keta temi hahalok sala seksuál, hahalok oioin neʼebé la moos, ka hahalok kaan-teen.” (Éfeso 5:3) Ita labele koʼalia halimar kona-ba buat seksuál neʼebé la morál, sá tan atu haree ka lee kona-ba buat sira-neʼe.

•   “Ema bele haree ho momoos hahalok sira neʼebé husi isin, neʼe mak sala seksuál, hahalok la moos, . . . no buat sira seluk neʼebé hanesan neʼe. Haʼu fó avizu nanis ba imi kona-ba buat sira-neʼe, hanesan haʼu fó avizu ona ba imi, katak sira neʼebé halo beibeik buat sira-neʼe sei la simu Maromak nia Ukun nuʼudar liman-rohan.” (Galásia 5:19-21) Maromak haree ema neʼebé haree pornografia ka halo cybersex, phone sex, ka sexting nuʼudar ema neʼebé la moos iha dalan morál. Se ita halo beibeik buat sira-neʼe, Maromak sei la simu ita.