Iha tempu uluk, ema Izraél simu mandamentu atu fó porsentu sanulu a husi sira-nia saláriu ba tinan ida nian nuʼudar kontribuisaun atu apoia adorasaun loos. Maromak haruka ema Izraél: “Tinan-tinan imi tenke fó porsentu sanulu husi buat hotu neʼebé imi hetan husi imi-nia toʼos.”—Deuteronómio 14:22.

 Mandamentu kona-ba fó porsentu sanulu mak parte husi Moisés nia Ukun-Fuan neʼebé Maromak fó ba ema Izraél antigu. Ema Kristaun la presiza halo tuir tan Moisés nia Ukun-Fuan, tan neʼe sira la presiza fó porsentu sanulu. (Koloso 2:13, 14) Maibé, ema Kristaun ida-idak bele fó kontribuisaun “tuir buat neʼebé nia deside ona iha laran, laʼós ho laran-todan ka obriga an, tanba Maromak hadomi ema neʼebé fó ho laran haksolok”.—2 Korinto 9:7.

•  Porsentu sanulu neʼebé temi iha Bíblia, iha “Testamentu Tuan”

•  Porsentu sanulu neʼebé temi iha Bíblia, iha “Testamentu Foun”

 Porsentu sanulu temi dala balu iha Bíblia, iha parte neʼebé ema barak bolu nuʼudar Testamentu Tuan. Dala barak neʼe liga ho Moisés nia Ukun-Fuan neʼebé Maromak fó ba ema Izraél liuhusi Moisés. Maibé, dala balu fó sai kona-ba ema neʼebé fó porsentu sanulu antes tempu neʼebé Moisés simu Ukun-Fuan.

Antes iha Moisés nia Ukun-Fuan

 Iha Bíblia, ema primeiru neʼebé fó porsentu sanulu mak Abram (Abraão). (Génesis 14:18-20; Ebreu 7:4) Abram fó porsentu sanulu dala ida deʼit nuʼudar prezente ba liurai Salém neʼebé mós serbí nuʼudar amlulik. La iha evidénsia seluk iha Bíblia neʼebé hatudu katak Abraão no ninia oan sira fó tan porsentu sanulu.

 Ema segundu neʼebé Bíblia temi katak fó porsentu sanulu mak Abraão nia bei-oan naran Jacob. Jacob promete katak se Maromak haraik bensaun ba nia, nia sei fó ba Maromak “porsentu sanulu husi buat hotu” neʼebé nia simu husi Maromak. (Génesis 28:20-22) Tuir matenek-naʼin balu kona-ba Bíblia, Jacob fó animál sakrifísiu nian nuʼudar porsentu sanulu. Maski Jacob halo promete neʼe no kumpre ida-neʼe, maibé nia la halo neʼe sai nuʼudar ukun-fuan iha ninia umakain.

Tuir Moisés nia Ukun-Fuan

 Maromak haruka ema Izraél antigu atu fó porsentu sanulu hodi apoia sira-nia atividade relijiaun nian.

•   Porsentu sanulu atu sustenta ema sira neʼebé uza tempu-tomak atu halo serbisu ba Maromak, hanesan ema Levi, inklui amlulik sira, tanba sira la iha rai atu halo toʼos. (Números 18:20, 21) Ema Levi neʼebé laʼós amlulik simu porsentu sanulu husi povu no tuirmai fó fali ba amlulik sira buat neʼebé diʼak liu husi “kontribuisaun porsentu sanulu” neʼebé sira simu ona.—Números 18:26-29.

•   Bíblia hatudu katak karik iha porsentu sanulu neʼebé ema presiza fó kada tinan rua, no neʼe atu apoia ema Levi no mós ema seluk. (Deuteronómio 14:22, 23) Família sira iha Izraél aproveita arranju neʼe hodi uza ba festa espesiál sira. No iha tinan balu, porsentu sanulu neʼe fahe ba ema kiak atu bele sustenta sira-nia moris.—Deuteronómio 14:28, 29; 26:12.

 Oinsá sura porsentu sanulu? Ema Izraél tenke rai ketak porsentu sanulu tinan-tinan husi buat neʼebé sira koʼa iha sira-nia toʼos. (Levítico 27:30) Se sira deside atu selu porsentu sanulu ho osan, sira tenke selu folin hodi fó porsentu sanulu-resin-rua. (Levítico 27:31) Sira mós hetan mandamentu atu fó “porsentu sanulu husi karau no bibi sira”.—Levítico 27:32.

 Atu deside animál ida-neʼebé mak ema Izraél tenke fó nuʼudar porsentu sanulu, sira presiza hili animál ida husi animál sanulu neʼebé sai husi sira-nia animál luhan. Ukun-Fuan hatete katak sira labele ezamina ka troka animál neʼebé sira hili tiha ona, no mós sira labele troka fali animál neʼe ho osan. (Levítico 27:32, 33) Maibé, kona-ba porsentu sanulu neʼebé sei uza iha festa espesiál tinan-tinan nian, sira bele troka neʼe ho osan. Arranju neʼe halo fasil ba ema Izraél neʼebé tenke laʼo dook atu tuir festa sira.—Deuteronómio 14:25, 26.

 Bainhira mak ema Izraél fó porsentu sanulu? Ema Izraél fó porsentu sanulu tinan-tinan. (Deuteronómio 14:22) Maibé, kada tinan hitu sira la presiza fó porsentu sanulu. Tinan neʼe mak tinan Sábadu, ka tinan deskansa nian, no ema Izraél labele halo toʼos. (Levítico 25:4, 5) Tanba situasaun espesiál neʼe, ema sei la halibur porsentu sanulu durante tempu koʼa nian. Kada tinan tolu no tinan neen husi tinan hitu Sábadu nian, ema Izraél fahe porsentu sanulu seluk ba ema kiak sira no ema Levi.—Deuteronómio 14:28, 29.

 Kuandu la selu porsentu sanulu, sira presiza selu multa ka lae? Moisés nia Ukun-Fuan la temi kona-ba selu multa bainhira la fó porsentu sanulu. Ema Izraél fó porsentu sanulu tanba sira hatene ida-neʼe mak buat diʼak atu halo, laʼós tanba iha kastigu ruma. Ema Izraél tenke fó sai iha Jeová nia oin katak sira fó ona porsentu sanulu no husu Maromak atu haraik bensaun ba sira tanba sira halo nuneʼe. (Deuteronómio 26:12-15) Maromak dehan katak se ema la fó porsentu sanulu, neʼe hanesan sira naʼok husi Maromak.—Malaquias 3:8, 9.

 Arranju kona-ba porsentu sanulu mak todan ka lae? Lae. Maromak promete ba nasaun Izraél katak se sira fó porsentu sanulu, nia sei fakar tun bensaun ba sira no sira sei la falta buat ruma. (Malaquias 3:10) Maibé bainhira sira dada an atu fó porsentu sanulu, nasaun neʼe sei hetan susar. Sira lakon Maromak nia bensaun. No tanba amlulik no ema Levi sira presiza halo serbisu seluk atu bele kontinua moris, sira la fokus tan atu ajuda nasaun Izraél atu halaʼo adorasaun ba Maromak.—Neemias 13:10; Malaquias 3:7.

 Durante Jesus moris iha rai, ema neʼebé adora Maromak presiza fó porsentu sanulu. Maibé depois Jesus mate, arranju neʼe la iha tan.

Iha Jesus nia tempu

 Parte husi Bíblia neʼebé ema barak hanaran Testamentu Foun hatudu katak ema Izraél kontinua fó porsentu sanulu bainhira Jesus iha mundu. Jesus komprende katak ema nafatin tenke fó porsentu sanulu, maski nuneʼe nia la kontente ho ulun-naʼin relijiaun sira neʼebé badinas loos atu selu porsentu sanulu maibé “la halo tuir buat neʼebé importante iha Ukun-Fuan, hanesan justisa, laran-sadiʼa no laran-metin”.—Mateus 23:23.

Depois Jesus mate

 Depois Jesus mate, ema la presiza tan fó porsentu sanulu. Jesus nia sakrifísiu halo Moisés nia Ukun-Fuan la vale ona, inklui mandamentu kona-ba “foti porsentu sanulu”.—Ebreu 7:5, 18; Éfeso 2:13-15; Koloso 2:13, 14.