Sé mak João Batista?

LOKE

Bíblia nia resposta

João Batista mak Maromak nia profeta ida. (Lucas 1:76) Nia moris iha tinan 2 AEC no mate iha tinan 32 EC. Maromak fó knaar ba nia atu prepara dalan ba Mesias, ka Kristu. João halo ida-neʼe hodi haklaken Maromak nia mensajen ba ema Judeu sira no ajuda sira atu fila fali ba Maromak.—Marcos 1:1-4; Lucas 1:13, 16, 17.

João ajuda ema neʼebé laran-moos atu rekoñese katak Jesus ema Nazaré mak Mesias neʼebé Maromak promete nanis ona. (Mateus 11:10) João anima ema atu arrepende sira-nia sala no hatudu ida-neʼe hodi hetan batizmu. (Lucas 3:3-6) Nia fó batizmu ba ema barak, tan neʼe ema bolu nia nuʼudar João Batista. Nia mós fó batizmu ba Jesus, neʼe mak batizmu neʼebé importante liu. a—Marcos 1:9.

Iha informasaun neʼe

Tanbasá João Batista mak úniku?

Bíblia fó-hatene nanis ona kona-ba ninia serbisu: João nia serbisu haklaken kumpre profesia kona-ba ema neʼebé lori Jeová nia lia-menon. (Malaquias 3:1; Mateus 3:1-3) Buat neʼebé nia halo fó prova katak nia mak ida neʼebé ajuda ema “sai povu neʼebé prontu ona ba Jeová”. Nia ajuda ema Judeu atu simu Jesus Kristu nuʼudar Maromak Jeová nia reprezentante.—Lucas 1:17.

Buat neʼebé nia halo iha ninia moris: Jesus dehan katak “seidauk iha ema ida iha rai neʼebé boot liu fali João Batista. Maski nuneʼe, ema neʼebé kiʼik liu iha Ukun lalehan nian mak boot liu fali nia.” (Mateus 11:11) João laʼós deʼit profeta, maibé nia mós ‘ema neʼebé lori Maromak nia lia-menon’, neʼebé promete nanis ona. Tan neʼe, João mak boot liu fali Maromak nia atan seluk neʼebé serbí antes nia. Jesus nia liafuan mós hatudu katak João la sai liurai iha Maromak nia Ukun iha lalehan. b João mate antes Kristu loke dalan ba ema atu moris hiʼas iha lalehan. (Ebreu 10:19, 20) Maibé, João sei moris hiʼas iha mundu nuʼudar povu neʼebé iha Maromak nia Ukun okos no iha esperansa atu moris ba nafatin iha Paraízu.—Salmo 37:29; Lucas 23:43.

Sé mak João Batista nia inan-aman?

João nia inan mak Isabel no ninia aman mak Zacarias. Zacarias mak amlulik Judeu. João moris mai tanba milagre, tanba Isabel labele koʼus no nia ho Zacarias “ferik-katuas ona”.—Lucas 1:5-7, 13.

Sé mak oho João Batista?

Liurai Herodes Antipas mak haruka ema tesi João nia ulun. Nia halo neʼe tanba ninia feen Herodias husu. Herodias odi João tanba João fó-hatene Liurai Herodes (neʼebé fó sai katak nia mak ema Judeu) katak tuir ema Judeu nia ukun-fuan, Herodes labele kaben ho Herodias.—Mateus 14:1-12; Marcos 6:16-19.

João Batista kompete malu ho Jesus ka lae?

Bíblia la apoia ideia katak João no Jesus kompete malu ka laran-moras ba malu. (João 3:25-30) Tuir loloos, João fó sai katak nia iha responsabilidade atu prepara dalan atu povu bele simu Mesias. João hatete: “Haʼu fó batizmu ba imi ho bee . . . atu nia bele hatudu sai ninia an ba Izraél.” Nia hatutan tan: “Nia mak Maromak nia Oan-Mane duni.” (João 1:26-34) João kontente tebes kuandu rona katak Jesus halaʼo serbisu haklaken ho susesu.

a Jesus “la halo sala ida”. (1 Pedro 2:21, 22) Tan neʼe, nia hetan batizmu laʼós atu arrepende an, maibé nia aprezenta ninia an atu halo Maromak nia hakarak, inklui mós fó ninia moris atu salva ita.—Ebreu 10:7-10.

b Haree informasaun “Sé mak sei bá lalehan?”