Jesus mate atu nuneʼe ema hotu bele hetan perdua ba sira-nia sala no simu moris rohan-laek. (Roma 6:23; Éfeso 1:7) Bainhira Jesus mate, nia hatudu katak ema bele laran-metin nafatin ba Maromak maski hasoru susar boot.​—Ebreu 4:15.

 Hanoin toʼok kona-ba oinsá ema ida nia mate bele kumpre buat barak.

1.   Jesus mate atu ita bele hetan “perdua ba ita-nia sala sira”.​—Koloso 1:14.

    Adão mak ema primeiru neʼebé Maromak kria. Adão mak perfeitu no sala-laek. Maibé nia hili atu kontra Maromak. Tanba Adão la halo tuir Maromak no halo sala, neʼe lori rezultadu aat ba ninia bei-oan hotu. Bíblia hatete: “Liuhusi ema ida deʼit neʼebé lakohi halo tuir, ema hotu sai sala-naʼin.”​—Roma 5:19.

    Jesus mós ema perfeitu, maibé nia nunka halo sala. Tan neʼe nia bele sai nuʼudar “sakrifísiu neʼebé hasaʼe ona ba ita-nia sala, atu nuneʼe ita bele hadame malu ho Maromak”. (1 João 2:2) Adão la halo tuir Maromak no ida-neʼe lori sala ba mundu, maibé Jesus nia mate hamoos ema nia sala, se sira hatudu fiar ba nia.

    Bainhira Adão halo sala, neʼe hanesan nia faʼan ninia jerasaun atu sai atan ba sala. Jesus mate ba ita no neʼe hanesan nia sosa fali ita. Rezultadu mak “se ema ida halo sala, ita iha ajuda-naʼin ida neʼebé hamutuk ho Aman, ajuda-naʼin neʼe mak Jesus Kristu neʼebé halo buat loos iha Maromak nia oin”.​—1 João 2:1.

2.   Jesus mate “atu nuneʼe ema hotu neʼebé hatudu fiar ba nia sei la lakon, maibé hetan moris rohan-laek”.​—João 3:16.

    Maski Maromak kria Adão atu moris ba nafatin, maibé tanba Adão halo sala, kastigu neʼebé nia hetan mak mate. “Sala tama iha mundu liuhusi [Adão], no mate tanba sala. Nuneʼe ema hotu mate tanba ema hotu halo ona sala.”​—Roma 5:12.

    Maibé Jesus nia mate hamoos ita-nia sala no mós loke dala ba ema neʼebé hatudu fiar ba nia, atu la mate. Bíblia hatete: “Hanesan sala no mate ukun nuʼudar liurai, nuneʼe mós Maromak nia laran-diʼak neʼebé boot sei ukun nuʼudar liurai ho hahalok loos, atu nuneʼe lori ema ba moris rohan-laek liuhusi ita-nia Naʼi Jesus Kristu.”​—Roma 5:21.

    Ohin loron, ema nia moris nafatin badak deʼit. Maski nuneʼe, Maromak promete katak nia sei fó moris ba nafatin ba ema laran-loos no mós fó moris-hiʼas ba ema neʼebé mate atu sira mós bele hetan benefísiu husi Jesus nia sakrifísiu.​—Salmo 37:29; 1 Korinto 15:22.

3.   Jesus “halo tuir toʼo mate” no ida-neʼe hatudu katak ema bele laran-metin nafatin ba Maromak maski hasoru susar.​—Filipe 2:8.

    Maski Adão iha isin no neon neʼebé perfeitu, maibé nia kontra Maromak tanba nia hanoin an deʼit no hakarak buat neʼebé laʼós ninian. (Génesis 2:16, 17; 3:6) Depois neʼe, Maromak nia inimigu boot, Satanás hatete katak ema ida sei la halo tuir Maromak se ninia moris iha perigu laran. (Job 2:4) Maski nuneʼe, Jesus nuʼudar ema perfeitu halo tuir Maromak no laran-metin ba Maromak maski nia hetan terus no mate. (Ebreu 7:26) Ida-neʼe hatudu katak ema ida bele laran-metin nafatin ba Maromak maski hasoru susar.

Pergunta sira kona-ba Jesus nia mate?

•   Tanbasá Jesus tenke hetan terus no mate atu bele salva ita husi mate? Tanbasá Maromak la halakon kedas sala no mate?

   Maromak nia ukun-fuan hatete katak “sala nia kolen mak mate”. (Roma 6:23) Maromak fó sai ho klaru ida-neʼe ba Adão. Maromak hatete ba Adão katak se Adão la halo tuir, ninia kastigu mak mate. (Génesis 3:3) Bainhira Adão halo sala, Maromak halo tuir ninia liafuan tanba “Maromak nunka bosok”. (Tito 1:2) Adão pasa sala no kolen ba sala, katak mate ba ninia bei-oan.

   Maski ema sala-naʼin merese atu simu kastigu-mate, maibé Maromak hatudu “laran-diʼak neʼebé boot”. (Éfeso 1:7) Hodi haruka Jesus mai mundu nuʼudar sakrifísiu atu sosa fali ita, Maromak hatudu katak nia sempre hatudu justisa no laran-sadiʼa.

•   Horibainhira mak Jesus mate?

   Jesus mate maizumenus iha “tuku 3 lokraik” iha loron Páskua ema Judeu nian. (Marcos 15:33-37) Iha kalendáriu modernu, neʼe mak loron-sesta 1 Abríl 33 EC.

•   Jesus mate iha neʼebé?

   Jesus hetan kastigu-mate iha “fatin ida naran Fatin Ulun-Ruin nian, iha lian Ebraiku hanaran Gólgota”. (João 19:17, 18) Iha Jesus nia tempu, fatin neʼe iha “sidade [Jeruzalein] nia portaun liʼur”. (Ebreu 13:12) Karik fatin neʼe iha foho leten tanba Bíblia hatete katak ema balu haree Jesus neʼebé hetan kastigu-mate “husi dook”. (Marcos 15:40) Maibé ohin loron, ita labele hatene ho loloos Gólgota mak iha neʼebé.

•   Jesus mate iha dalan oinsá?

   Maski ema barak fiar katak Jesus hetan kastigu-mate iha krús, maibé Bíblia hatete: “Nia rasik simu ita-nia sala iha nia isin iha ai-hun”. (1 Pedro 2:24, Liafuan diak ba imi, segundu edisaun) Ema neʼebé hakerek Bíblia uza liafuan Gregu rua atu refere ba dalan neʼebé Jesus hetan kastigu-mate. Liafuan sira-neʼe mak staurós no ksilon. Matenek-naʼin barak dehan katak liafuan sira-neʼe refere ba ai-riin neʼebé halo husi ai-kabelak ida deʼit.

•   Ita presiza hanoin-hetan Jesus nia mate iha dalan oinsá?

   Iha kalan neʼebé ema Judeu selebra Páskua tinan-tinan, Jesus hahú halo han-kalan simples hamutuk ho ninia dixípulu sira no Jesus haruka ninia dixípulu sira: “Kontinua halo ida-neʼe hodi hanoin haʼu.” (1 Korinto 11:24) Liutiha oras balu, Jesus simu kastigu-mate.

   Ema neʼebé hakerek Bíblia kompara Jesus ho bibi-oan neʼebé ema fó nuʼudar sakrifísiu iha Páskua. (1 Korinto 5:7) Selebrasaun Páskua fó-hanoin ema Izraél katak Maromak salva sira husi moris nuʼudar atan. Memoriál kona-ba Jesus Kristu nia mate fó-hanoin ema Kristaun katak Maromak salva sira husi sala no mate. Ema Izraél selebra Páskua tinan ida dala ida iha loron 14 Nisan tuir ema Izraél nia kalendáriu. Nuneʼe mós ema Kristaun ohin loron komemora Memoriál tinan ida dala ida.

   Tinan-tinan, iha loron neʼebé hanesan ho loron 14 Nisan, ema millaun ba millaun iha mundu toman komemora Jesus nia mate.