Primeiru Krónikas 17:1-27
17 Bainhira David hela metin ona iha ninia palásiu, nia dehan ba profeta Natan:+ “Haʼu hela daudaun iha uma neʼebé halo husi ai-sedru+ maibé Jeová nia Arka Aliansa nian iha tenda laran.”+
2 Natan hatán ba David: “Halo tuir buat hotu neʼebé iha Ita-nia laran, tanba Maromak loos hamutuk ho Ita.”
3 Iha kalan neʼe duni mak Maromak dehan ba Natan:
4 “Bá hatete ba haʼu-nia atan David: ‘Jeová dehan nuneʼe: “Laʼós ó mak sei harii uma ida ba haʼu atu hela.+
5 Haʼu la hela iha uma ida husi loron neʼebé haʼu lori povu Izraél sai husi rai-Ejitu toʼo ohin loron, maibé haʼu kontinua hela iha tenda laran* no muda husi fatin ida ba fatin seluk.+
6 Durante tempu hotu neʼebé haʼu laʼo hamutuk ho ema Izraél, haʼu nunka koʼalia liafuan ida ba Izraél nia juís sira neʼebé haʼu hili ona atu tau matan ba haʼu-nia povu, hodi dehan: ‘Tanbasá mak imi la harii uma ida husi ai-sedru ba haʼu?’”’
7 “Agora hatete ba haʼu-nia atan David: ‘Jeová neʼebé ukun tropa lalehan nian dehan nuneʼe: “Haʼu mak foti ó husi rai-luan, husi serbisu atu hein bibi, hodi sai ulun-naʼin ba haʼu-nia povu Izraél.+
8 Haʼu sei hamutuk ho ó iha fatin naran deʼit neʼebé ó bá,+ no haʼu sei halakon ó-nia inimigu hotu iha ó-nia oin.+ Haʼu sei halo ó sai naran-boot hanesan ema naran-boot sira iha mundu.+
9 Haʼu sei hili fatin ida ba haʼu-nia povu Izraél no tau sira iha neʼebá. Sira sei hela iha neʼebá no ema sei la book tan sira. Ema aat sei la hanehan* tan sira hanesan sira halo iha tempu uluk,+
10 husi loron neʼebé haʼu hili juís sira atu tau matan ba haʼu-nia povu Izraél.+ Haʼu mós sei manán ó-nia inimigu hotu.+ Liután neʼe, haʼu hatete ba ó: ‘Jeová sei harii umakain* ida ba ó.’
11 “‘“Bainhira ó mate no ema hakoi ó hamutuk ho ó-nia beiʼala sira, haʼu sei foti ó-nia jerasaun ida, katak ó-nia oan-mane ida,+ no haʼu sei hametin ninia pozisaun nuʼudar liurai.+
12 Nia mak sei harii uma ida ba haʼu,+ no haʼu sei hametin ninia kadunan ba nafatin.+
13 Haʼu sei sai ninia aman, no nia sei sai haʼu-nia oan-mane.+ Haʼu sei la hasai haʼu-nia domin neʼebé laran-metin husi nia+ hanesan haʼu hasai domin neʼe husi ema ida antes ó.+
14 Haʼu sei halo nia hamriik metin iha haʼu-nia uma no nia sei sai nuʼudar liurai ba nafatin,+ no ninia kadunan sei hela ba nafatin.”’”+
15 Natan fó sai liafuan hotu no vizaun tomak neʼe ba David.
16 Entaun, Liurai David bá no tuur iha Jeová nia oin, hodi dehan: “Oh Maromak Jeová, haʼu neʼe sé? No haʼu-nia umakain mak hanesan saida hodi Ita halo buat hotu neʼe ba haʼu toʼo agora?+
17 Oh Maromak, maski Ita halo ona buat barak loos ba haʼu, maibé Ita mós koʼalia tan kona-ba Ita-nia atan nia umakain iha futuru.+ Oh Maromak Jeová, Ita haree haʼu hanesan ema importante ida.*
18 Ita hatene didiʼak ona kona-ba Ita-nia atan neʼe,+ nuneʼe saida tan mak Ita-nia atan David sei dehan ba Ita kona-ba glória neʼebé haʼu simu?
19 Oh Jeová, Ita halo ona hahalok boot sira-neʼe hotu hodi hatudu sai Ita-nia kbiit boot tanba hanoin Ita-nia atan neʼe no tanba Ita-nia laran rasik mak book Ita.*+
20 Oh Jeová, la iha Maromak seluk mak hanesan ho Ita,+ no la iha Maromak seluk, só Ita deʼit.+ Buat hotu neʼebé ami rona ona mak fó prova katak neʼe loos duni.
21 No la iha nasaun seluk iha mundu tomak mak hanesan Ita-nia povu Izraél.+ Uluk Maromak loos salva* sira nuʼudar ninia povu.+ Ita halo Ita-nia naran sai boot hodi halo hahalok kmanek no buat boot oioin.+ Ita duni sai nasaun sira husi Ita-nia povu nia oin,+ povu neʼebé Ita sosa fali husi rai-Ejitu.
22 Ita halo ona Ita-nia povu Izraél nuʼudar Ita-nia povu ba nafatin,+ no Ita, oh Jeová, sai sira-nia Maromak.+
23 Agora, oh Jeová, haʼu harohan katak promesa neʼebé Ita halo ona kona-ba Ita-nia atan neʼe no kona-ba ninia umakain sei sai loos duni ba nafatin, no halo tuir bá buat neʼebé Ita promete ona.+
24 Haʼu hein katak Ita-nia naran sei iha* ba nafatin no simu hahiʼi+ ba nafatin, atu nuneʼe povu sira bele dehan: ‘Jeová neʼebé ukun tropa lalehan nian, Izraél nia Maromak, mak Maromak ba Izraél’, no haʼu hein katak Ita-nia atan David nia umakain sei metin ba nafatin iha Ita-nia oin.+
25 Oh haʼu-nia Maromak, Ita hatudu sai ona ba Ita-nia atan kona-ba Ita-nia hakarak atu harii umakain* ida ba nia. Tan neʼe mak Ita-nia atan neʼe ho fiar an halo orasaun neʼe ba Ita.
26 Agora, oh Jeová, Ita mak Maromak neʼebé loos, Ita promete ona buat diʼak sira-neʼe kona-ba Ita-nia atan.
27 Entaun haʼu hein katak Ita sei sente kontente atu haraik bensaun ba Ita-nia atan neʼe nia umakain, no neʼe sei kontinua ba nafatin iha Ita-nia oin. Oh Jeová, Ita haraik ona bensaun, no umakain neʼe sei hetan bensaun ba nafatin.”
Nota-rodapé
^ Orj., “husi tenda ba tenda”.
^ Orj., “la halo kole”.
^ Ka “umakain liurai nian”.
^ Ka “ema neʼebé iha pozisaun aas”.
^ Ka “tanba neʼe tuir Ita-nia hakarak”.
^ Ka “sosa fali”.
^ Ka “Ita sei hametin Ita-nia naran”.
^ Ka “umakain liurai nian”.
