Primeiru Samuel 21:1-15
21 Liutiha tempu balu, David bá toʼo amlulik Ahimelec iha Nob.+ Ahimelec komesa nakdedar bainhira nia hasoru David, no hatete ba David: “Tanbasá mak ó mesak deʼit no la iha ema seluk hamutuk ho ó?”+
2 David hatán ba amlulik Ahimelec: “Liurai haruka haʼu atu halo buat ruma, maibé liurai mós dehan: ‘Keta fó sai ba ema seluk kona-ba knaar neʼebé haʼu haruka ó atu halo no kona-ba mandamentu neʼebé haʼu fó ona ba ó.’ Tan neʼe, haʼu halo planu ho haʼu-nia mane joven sira atu hasoru malu iha fatin ida.
3 Agora se Ita iha paun fuan lima, favór ida, fó mai haʼu, ka fó hahán naran deʼit neʼebé Ita iha.”
4 Maibé amlulik neʼe hatán ba David: “Haʼu la iha paun baibain, só iha deʼit paun santu,+ no mane joven sira bele han paun sira-neʼe se sira la halo relasaun seksuál ho feto.”*+
5 David hatán ba amlulik: “Ami la halo relasaun seksuál ho feto ida hanesan ho tempu uluk bainhira haʼu bá halo funu.+ Se mane joven sira-neʼe nia isin mak santu bainhira halaʼo knaar baibain, sá tan ohin, sira tenkesér santu liu!”
6 Entaun amlulik fó paun santu+ ba nia, tanba iha neʼebá la iha paun seluk só iha deʼit paun santu, neʼebé hasai ona husi Jeová nia oin hodi troka fali ho paun foun iha loron neʼebé hanesan.
7 Iha loron neʼebá, Saul nia atan ida mós iha neʼebá, sulan* hela iha Jeová nia oin. Ninia naran Doeg,+ ema Edom,+ nia mak xefe ba Saul nia bibi-atan sira.
8 Entaun David hatete ba Ahimelec: “Ita iha diman ka surik ka lae? Haʼu la lori haʼu-nia surik ka armas, tanba liurai nia serbisu neʼe mak urjente.”
9 Ho ida-neʼe, amlulik dehan: “Golias, ema Filístia, neʼebé ó oho iha Rai-Tetuk Elá,+ ninia surik+ mak iha neʼe, no surik neʼe falun hela ho hena iha efod*+ nia kotuk. Se ó hakarak, foti bá, tanba iha deʼit surik neʼe.” David hatán: “La iha surik ida mak hanesan ida-neʼe. Favór ida, fó neʼe mai haʼu.”
10 Iha loron neʼebá David hamriik no kontinua halai+ husi Saul. Ikusmai nia bá toʼo Liurai Aquis husi Gat.+
11 Aquis nia atan sira dehan ba Aquis: “Neʼe mak David, liurai husi rai neʼe, loos ka lae? Uluk ema simu nia ho knananuk no dansa, hodi dehan:‘Saul oho inimigu naʼin-rihun ida,
No David oho inimigu naʼin-rihun sanulu.’”+
12 David hanoin kona-ba liafuan neʼe, no nia sai taʼuk tebetebes+ ba Liurai Aquis husi Gat.
13 Entaun David halo ninia an hanesan ema bulak+ iha sira-nia oin no hatudu hahalok hanesan ema bulak bainhira nia iha sira-nia leet.* Nia riska portaun sira no husik ninia kabeen suli tun ba ninia hasarahun.
14 Ikusmai Aquis dehan ba ninia atan sira: “Imi haree ona katak mane neʼe bulak! Tanbasá mak imi lori nia mai haʼu?
15 Iha rai neʼe iha ema bulak barak ona, tanbasá mak imi lori tan bulak ida mai haʼu? Tanbasá mak mane hanesan neʼe tenke tama haʼu-nia uma?”
Nota-rodapé
^ Ka “la besik feto sira”.
^ Karik nia sulan tanba halo juramentu ruma, sai la moos, ka deskonfia hetan moras-lepra.
^ Orj., “iha sira-nia liman”.
