Primeiru Samuel 24:1-22
24 Bainhira Saul la duni tuir tan ema Filístia no nia fila fali ona, ema dehan ba nia: “Agora David iha rai-fuik En-Gedi.”+
2 Entaun Saul lori tropa naʼin-3.000 neʼebé diʼak liu husi Izraél tomak no sira bá buka David ho ninia ema sira iha fatuk-leet sira neʼebé bibi-timur fuik sira hela bá.
3 Saul toʼo iha bibi-malae nia luhan sira neʼebé halo husi fatuk, neʼebé iha dalan ninin. Iha neʼebá nia tama ba fatuk-kuak ida atu soe bee boot.* David no ninia ema sira tuur hela iha fatuk-kuak neʼe nia kotuk liu.+
4 David nia ema sira dehan ba nia: “Neʼe mak loron neʼebé Jeová hatete ba ó: ‘Haʼu entrega ó-nia inimigu ba ó-nia liman,+ no ó bele halo ba nia tuir buat neʼebé ó hanoin mak diʼak.’” Entaun David laʼo neineik ba Saul no tesi Saul nia roupa ninin.*
5 Maibé depois neʼe, David nia laran* fó-sala ba nia+ tanba nia tesi ona Saul nia roupa ninin.
6 Nia hatete ba ninia ema sira: “Haʼu labele duni halo aat ba haʼu-nia naʼi tanba nia mak ema neʼebé Jeová hili* ona. Jeová sei la simu duni se haʼu foti liman hasoru ema neʼebé Jeová hili.”*+
7 Entaun David hanetik* ninia ema sira ho liafuan sira-neʼe, no nia la husik sira ataka Saul. Kona-ba Saul, nia sai husi fatuk-kuak neʼe no kontinua laʼo.
8 Tuirmai David hamriik no sai husi fatuk-kuak neʼe. Nia bolu Saul, hodi dehan: “Haʼu-nia naʼi liurai!”+ Bainhira Saul hateke ba kotuk, David hakneʼak no hakruʼuk ho oin ba rai.
9 David hatete ba Saul: “Tanbasá mak Ita-Boot rona ba ema nia liafuan neʼebé dehan: ‘David buka atu halo aat ba Ita-Boot’?+
10 Agora Ita haree ho matan rasik oinsá Jeová entrega Ita ba haʼu-nia liman iha fatuk-kuak neʼe. Maski ema ida dehan atu oho Ita,+ maibé haʼu hanoin fali Ita, hodi dehan: ‘Haʼu sei nunka foti liman hasoru haʼu-nia naʼi, tanba nia mak ema neʼebé Jeová hili* ona.’+
11 Haree bá, haʼu-nia aman, Ita-nia roupa nia ninin iha haʼu-nia liman, tanba bainhira haʼu tesi Ita-nia roupa ninin, haʼu la oho Ita. Agora Ita bele haree no hatene katak haʼu la iha planu atu halo aat ba Ita ka kontra Ita, no haʼu la halo sala hasoru Ita,+ maibé Ita buka atu oho haʼu.+
12 Haʼu harohan katak Jeová sei tesi-lia ba Ita no haʼu,+ no Jeová sei selu fali ba Ita tanba buat neʼebé Ita halo ba haʼu,+ maibé haʼu rasik sei la foti liman hasoru Ita.+
13 Hanesan lia-dadolin uluk nian neʼebé dehan: ‘Husi ema aat mak hahalok aat sei mosu’, maibé haʼu-nia liman sei la kona Ita.
14 Liurai Izraél sai mai atu duni tuir haʼu ka? Haʼu neʼe sé? Haʼu hanesan asu neʼebé mate ona. Haʼu hanesan asu-kutun ida deʼit.+
15 Jeová sei sai juís atu tesi-lia ba Ita no haʼu. Nia sei haree no defende haʼu-nia kazu+ no tesi-lia ba haʼu no salva haʼu husi Ita-nia liman.”
16 Bainhira David foin koʼalia hotu liafuan sira-neʼe ba Saul, Saul hatete: “Haʼu-nia oan David, neʼe mak ó-nia lian ka?”+ No Saul komesa tanis makaʼas.
17 Nia hatete ba David: “Ó-nia hahalok mak loos liu haʼu-nian, tanba ó hatudu hahalok diʼak mai haʼu maibé haʼu selu fali buat aat ba ó.+
18 Sin, ohin ó fó-hatene ona mai haʼu buat diʼak neʼebé ó halo hodi la oho haʼu bainhira Jeová entrega ona haʼu ba ó-nia liman.+
19 Tanba la iha ema ida neʼebé hetan nia inimigu no husik nia bá ho dame, loos ka lae? Jeová sei fó kolen ba ó+ tanba ohin ó halo buat diʼak ba haʼu.
20 Agora haʼu hatene katak ó sei ukun duni nuʼudar liurai,+ no ukun Izraél nian sei metin nafatin iha ó-nia liman.
21 Agora favór ida, jura ba haʼu hodi Jeová nia naran+ katak ó sei la halakon haʼu-nia jerasaun sira neʼebé tuir haʼu no la halakon haʼu-nia naran husi haʼu-nia aman nia umakain.”+
22 Ho ida-neʼe, David jura ba Saul, tuirmai Saul fila ba ninia uma.+ Maibé David no ninia ema sira laʼo ba sira-nia fatin seguru.+
Nota-rodapé
^ Orj., “taka ninia ain”.
^ Ka “roupa neʼebé la iha liman”.
^ Ka “konxiénsia”.
^ Orj., “fui mina”. Haree “Fui mina” iha Glosáriu.
^ Orj., “fui mina”. Haree “Fui mina” iha Glosáriu.
^ Ka karik “halo namkari”.
^ Orj., “fui mina”. Haree “Fui mina” iha Glosáriu.
