Primeiru Samuel 27:1-12
-
Ema Filístia fó sidade Ziklag ba David (1-12)
27 Maibé David hanoin iha ninia laran: “Loron ida haʼu sei mate iha Saul nia liman. Diʼak liu haʼu halai+ ba ema Filístia nia rai. Karik Saul sei la buka tan haʼu iha área Izraél tomak,+ no haʼu sei livre husi ninia liman.”
2 Nuneʼe David hamriik hamutuk ho ninia ema naʼin-600+ no bá hasoru Maok nia oan-mane Aquis,+ liurai husi Gat.
3 David no ninia ema sira hela ho Aquis iha Gat, hamutuk ho sira-nia umakain ida-idak. David mós lori ninia feen naʼin-rua, Ahinoam+ husi Jezreel no Abigail+ ema Karmel, neʼebé sai David nia feen bainhira Nabal mate ona.
4 Bainhira Saul rona katak David halai ona ba Gat, nia para no la buka tan David.+
5 Tuirmai David hatete ba Aquis: “Se Ita kontente ho haʼu, fó fatin ba haʼu iha sidade kiʼik sira ida, atu nuneʼe haʼu bele hela. Tanbasá mak Ita-nia atan tenke hela ho Ita iha liurai nia sidade?”
6 Entaun iha loron neʼe Aquis fó Ziklag+ ba nia. Tan neʼe mak toʼo agora Ziklag sai liurai Judá nian.
7 Tempu neʼebé David hela iha rai-Filístia hamutuk tinan ida fulan haat.+
8 Dala barak David ho ninia ema sira bá ataka ema Gesur,+ ema Girzi no ema Amalec,+ tanba ema sira-neʼe hela iha rai neʼebé hahú husi Telam toʼo Sur+ no tun toʼo rai-Ejitu.
9 Bainhira David ataka rai sira-neʼe, nia la husik mane ka feto ida moris,+ maibé nia foti sira-nia bibi, karau, kuda-burru, kuda-kamelu no roupa sira, depois neʼe, nia fila fali ba Aquis.
10 Bainhira Aquis husu: “Ohin imi ataka ema iha neʼebé?” David hatán: “Ami ataka ema iha parte súl* husi Judá”+ ka dala ruma nia hatán: “Ami ataka ema iha parte súl husi Jerameel”+ ka nia dehan: “Ami ataka ema iha parte súl husi ema Keneu nia rai.”+
11 David oho mane no feto hotu hodi la lori ema ida ba Gat, tanba nia dehan: “Karik sira sei konta aat kona-ba ita no hatete: ‘Neʼe mak buat neʼebé David halo.’” David halo nuneʼe durante tempu neʼebé nia hela iha rai-Filístia.
12 Entaun Aquis fiar David no hanoin: ‘David sai ona buat neʼebé dois iha ninia povu Izraél nia leet, tan neʼe nia sei sai haʼu-nia atan ba nafatin.’
Nota-rodapé
^ Ka “área Negeb”.
