Primeiru Samuel 29:1-11
-
Ema Filístia la konfia David (1-11)
29 Ema Filístia+ halibur sira-nia tropa hotu iha Afek, no tropa Izraél sira hela besik bee-matan iha Jezreel.+
2 Ema Filístia nia naʼi-ulun sira laʼo ho sira-nia tropa grupu atus ba atus no grupu rihun ba rihun. David no ninia ema sira laʼo iha kotuk hamutuk ho Aquis.+
3 Maibé ema Filístia nia ulun-naʼin sira dehan: “Tanbasá mak ema Ebreu sira iha neʼe?” Aquis hatán ba ema Filístia nia ulun-naʼin sira: “Neʼe mak David, neʼebé uluk atan ba Liurai Saul husi Izraél, no nia hamutuk ho haʼu tinan ida liu ona.+ Haʼu la hetan sala ida iha nia husi tempu neʼebé nia halai mai haʼu toʼo ohin loron.”
4 Maibé ema Filístia nia ulun-naʼin sira sai hirus ba nia, no dehan: “Haruka mane neʼe fila.+ Husik nia fila fali ba fatin neʼebé ó haruka nia atu hela. Keta husik nia bá ho ita hodi halo funu, atu nuneʼe nia sei la kontra fali ita durante funu neʼe.+ Tanba dalan diʼak liu atu nia halo ninia naʼi simu fali nia mak hodi oho ita-nia ema sira, loos ka lae?
5 Neʼe mak David neʼebé uluk ema simu ho knananuk no dansa, hodi dehan:
‘Saul oho inimigu naʼin-rihun ida,No David oho inimigu naʼin-rihun sanulu.’”+
6 Entaun Aquis+ bolu David no dehan: “Haʼu jura hodi Jeová, Maromak neʼebé moris, katak ó mak ema laran-loos, no haʼu kontente atu ó bá funu hamutuk ho haʼu-nia tropa sira,+ tanba haʼu la hetan sala ida iha ó husi tempu neʼebé ó halai mai haʼu toʼo ohin loron.+ Maibé naʼi-ulun sira seluk la fiar ó.+
7 Entaun fila fali bá ho dame, no keta halo buat ida neʼebé bele halo ema Filístia nia naʼi-ulun sira sai hirus.”
8 Maibé David hatete ba Aquis: “Tanbasá? Haʼu halo ona saida? Sala saida mak Ita hetan iha Ita-nia atan neʼe husi tempu neʼebé haʼu halai mai Ita toʼo ohin loron? Tanbasá mak haʼu labele bá hamutuk ho Ita hodi halo funu hasoru haʼu-nia naʼi liurai nia inimigu sira?”
9 Aquis hatán ba David: “Tuir haʼu-nia hanoin, ó mak ema diʼak tebes hanesan Maromak nia anju ida.+ Maibé ema Filístia nia ulun-naʼin sira dehan ona: ‘Keta husik nia bá ho ita hodi halo funu.’
10 Aban dadeer, ó no ó-nia naʼi nia atan sira neʼebé mai hamutuk ho ó, hadeer sedu bá no sai sedu bainhira rai naroman ona.”
11 Nuneʼe David no ninia ema sira hadeer sedu iha dadeer hodi fila fali ba rai-Filístia, no ema Filístia saʼe ba Jezreel.+
