Primeiru Samuel 31:1-13
-
Saul no ninia oan-mane naʼin-tolu mate (1-13)
31 Iha tempu neʼebá ema Filístia halo funu hasoru ema Izraél.+ Ema Izraél sira halai husi ema Filístia nia oin, no ema Izraél barak mate iha Foho Gilboa.+
2 Ema Filístia duni tuir no besik atu toman Saul ho ninia oan-mane sira. Ikusmai ema Filístia oho Saul nia oan-mane sira,+ Jonatan,+ Abinadab no Malkisua.
3 Funu sai boot liután hasoru Saul, no tropa Filístia sira neʼebé hana rama hetan nia, no sira hana nia toʼo nia kanek todan.+
4 Tuirmai Saul dehan ba ninia atan neʼebé lori ninia armas: “Losu ó-nia surik no sona borus haʼu, atu nuneʼe mane sira neʼebé la hetan sirkunsizaun*+ labele mai no sona borus haʼu no halo aat ba haʼu.” Maibé ninia atan neʼe lakohi, tanba nia taʼuk tebes. Entaun Saul losu surik no hamonu nia an ba surik neʼe nia leten.+
5 Bainhira atan neʼe haree katak Saul mate ona,+ nia mós hamonu nia an ba ninia surik no mate hamutuk ho Saul.
6 Ho ida-neʼe, Saul no ninia oan-mane naʼin-tolu, ninia atan neʼebé lori ninia armas, no mós ninia atan hotu mate iha loron neʼebá.+
7 Bainhira povu Izraél neʼebé iha rai-tetuk no iha área Jordaun haree tropa Izraél hotu halai ona no Saul no ninia oan-mane sira mate ona, sira komesa husik hela sira-nia sidade no halai.+ Depois neʼe, ema Filístia mai hela fali iha sidade sira-neʼe.
8 Loron tuirmai, bainhira ema Filístia mai atu foti ema mate sira-nia sasán, sira haree Saul no ninia oan-mane naʼin-tolu mate ona iha Foho Gilboa.+
9 Nuneʼe sira tesi Saul nia ulun no hasai ninia roupa funu nian* no sira habelar lia-menon+ iha templu sira ba sira-nia estátua*+ no ba povu sira iha ema Filístia nia rai tomak.
10 Tuirmai sira tau Saul nia roupa funu nian iha estátua Astoret nia templu no tara ninia mate-isin iha sidade Bet-San+ nia moru.
11 Bainhira ema neʼebé hela iha Jabes-Gilead+ rona kona-ba buat neʼebé ema Filístia halo ona ba Saul,
12 funu-naʼin hotu hamriik no laʼo durante kalan tomak no foti Saul nia mate-isin no mós ninia oan-mane sira-nia mate-isin husi Bet-San nia moru. Sira fila fali ba Jabes no sunu sira-nia mate-isin iha neʼebá.
13 Depois neʼe, sira foti Saul no ninia oan-mane sira-nia ruin+ no hakoi iha ai-tamargeira nia okos iha Jabes,+ no sira halo jejún ba loron hitu.
