Segundu Samuel 18:1-33
18 Tuirmai David sura mane sira neʼebé hamutuk ho nia. Nia hili xefe sira atu dirije tropa naʼin-1.000 no tropa naʼin-100.+
2 David fahe mane sira-neʼe ba grupu tolu no nia haruka sira bá. Grupu ida Joab mak dirije;+ no grupu ida tan Zeruia nia oan-mane+ Abisai+ mak dirije, nia mak Joab nia maun; no grupu ida seluk Itai+ ema Gat mak dirije. Tuirmai liurai hatete ba sira: “Haʼu mós sei bá hamutuk ho imi.”
3 Maibé sira dehan: “Ita labele bá ho ami,+ tanba se ami halai, sira sei la hanoin* kona-ba ami; no se ema sorin balu husi ami mate, sira mós sei la hanoin kona-ba ami, tanba Ita folin-boot hanesan ho ami naʼin-10.000.+ Tan neʼe, diʼak liu Ita fó ajuda deʼit ba ami husi sidade.”
4 Liurai dehan ba sira: “Haʼu sei halo buat neʼebé imi hanoin mak diʼak ba imi.” Entaun liurai hamriik besik sidade nia portaun, no mane sira-neʼe sai tuir grupu tropa naʼin-100 no grupu tropa naʼin-1.000.
5 Tuirmai liurai fó orden ba Joab, Abisai no Itai, hodi dehan: “Hatudu laran-diʼak ba Absalão tanba nia haʼu-nia oan.”+ Ema hotu rona ida-neʼe bainhira liurai fó mandamentu ba xefe hotu kona-ba Absalão.
6 Mane sira-neʼe sai ba rai-luan hodi kontra tropa Izraél, no halo funu iha ai-laran Efraim.+
7 Iha neʼebá mak David nia atan sira+ manán ema Izraél,+ no ema barak mate iha loron neʼebá, hamutuk mane naʼin-20.000.
8 Funu habelar ba área neʼe tomak. Liután neʼe, iha loron neʼebá ai-laran neʼe halo ema barak liu mate duké sira neʼebé mate ho surik.
9 Ikusmai Absalão rasik hasoru David nia atan sira. Absalão saʼe hela kuda-mula* ida, no kuda-mula neʼe halai liu ai-hun boot ida nia sanak boot sira-nia okos, no Absalão nia ulun kaʼit metin iha ai-hun boot neʼe. Nia tabele hela* no kuda-mula neʼe kontinua halai ba oin.
10 Tuirmai ema ida haree neʼe no fó-hatene ba Joab+ dehan: “Haʼu haree Absalão tabele hela iha ai-hun boot ida.”
11 Joab hatán ba mane neʼe: “Se ó haree nia, tanbasá mak ó la oho kedas nia iha neʼebá? Nuneʼe haʼu sei kontente hodi fó osan-mutin sanulu no sintu ida ba ó.”
12 Maibé mane neʼe dehan ba Joab: “Maski haʼu simu* osan-mutin 1.000, maibé haʼu labele foti liman hasoru liurai nia oan-mane, tanba ami rona ona liurai nia mandamentu ba Ita no Abisai no mós Itai, hodi dehan: ‘Imi kuidadu bá katak ema ida la halo buat aat ba haʼu-nia oan Absalão.’+
13 Se haʼu la halo tuir ninia liafuan no oho Absalão, ikusmai liurai sei hatene kona-ba neʼe, no Ita sei la proteje haʼu.”
14 Joab dehan: “Haʼu lakohi lakon tempu tan ho ó!” Entaun Joab foti rama-oan* tolu no sona borus Absalão nia fuan bainhira nia sei moris no kaʼit hela iha ai-hun boot.
15 Tuirmai Joab nia atan naʼin-sanulu neʼebé lori ninia armas mós mai no ataka Absalão toʼo nia mate.+
16 Depois neʼe, Joab huu dikur, atu nuneʼe tropa sira bele fila fali hodi la duni tuir tan ema Izraél. Entaun Joab hapara sira.
17 Sira foti Absalão no soe ba rai-kuak boot ida iha ai-laran no butuk fatuk barak iha ninia leten.+ No ema Izraél hotu halai ba sira-nia uma.
18 Bainhira Absalão sei moris hela, nia foti fatuk boot ida no harii neʼe iha área neʼebé hanaran Rai-Tetuk Liurai+ tanba nia dehan: “Haʼu la iha oan-mane ida atu hatutan haʼu-nia naran.”+ Entaun nia hanaran monumentu neʼe tuir ninia naran rasik, no neʼe hanaran Absalão nia Monumentu toʼo ohin loron.
19 Zadoc nia oan-mane Ahimaz+ hatete: “Favór ida, husik haʼu halai bá hodi fó-hatene ba liurai, tanba Jeová hatudu ona justisa ba nia hodi halo nia livre husi ninia inimigu.”+
20 Maibé Joab hatete: “Ó sei la lori lia-menon iha loron neʼe. Karik loron seluk mak ó bele lori lia-menon, maibé ohin ó sei la lori lia-menon, tanba liurai nia oan-mane rasik mak mate.”+
21 Tuirmai Joab hatete ba ema Kus ida:+ “Bá, konta ba liurai buat neʼebé ó haree ona.” Ho ida-neʼe, ema Kus neʼe hakruʼuk ba Joab no nia halai bá.
22 Zadoc nia oan-mane Ahimaz dehan tan ba Joab: “Favór ida, husik haʼu mós halai iha ema Kus neʼe nia kotuk.” Maibé Joab hatete: “Haʼu-nia oan, tanbasá mak ó tenke halai se ó la iha lia-menon atu fó sai?”
23 Maibé nia dehan: “La iha buat ida, husik haʼu halai bá.” Entaun Joab dehan ba nia: “Halai bá!” Ho ida-neʼe, Ahimaz halai tuir dalan ba área Jordaun nian,* no ikusmai nia halai liu ema Kus neʼe.
24 Iha tempu neʼebá David tuur daudaun entre sidade nia portaun liʼur no portaun laran,+ no guarda+ ida saʼe ba portaun leten besik moru. Guarda neʼe foti matan no haree mane ida halai mai mesamesak.
25 Entaun guarda bolu ba liurai no fó-hatene ba nia. Liurai hatete: “Se nia mesak deʼit, nia iha lia-menon atu fó sai.” Nuʼudar nia hakbesik daudaun,
26 guarda haree mane ida seluk halai mai daudaun. Guarda neʼe hakilar ba mane neʼebé hein portaun, hodi dehan: “Haree bá! Mane ida tan halai mesamesak!” Liurai dehan: “Nia mós lori lia-menon.”
27 Guarda neʼe hatete: “Haʼu bele haree katak mane ida primeiru halai hanesan Zadoc nia oan-mane Ahimaz”,+ entaun liurai dehan: “Nia mak ema diʼak. Nia mai lori liafuan diʼak.”
28 Ahimaz koʼalia ho lian makaʼas ba liurai dehan: “Haʼu iha lia-menon diʼak!” Ho ida-neʼe, nia hakneʼak no hakruʼuk ho oin ba rai iha liurai nia oin. Tuirmai nia hatete: “Fó hahiʼi ba Jeová, Ita-nia Maromak, neʼebé entrega ona kontradór sira* ba haʼu-nia naʼi liurai!”+
29 Maibé liurai hatete: “Haʼu-nia oan-mane Absalão diʼak ka lae?” Ahimaz hatán: “Haʼu haree buat hotu runguranga boot bainhira Joab haruka liurai nia atan no mós haʼu,* maibé haʼu la hatene saida mak akontese.”+
30 Entaun liurai dehan: “Muda ba sorin, no hamriik iha neʼebá.” Ho ida-neʼe, nia muda ba sorin no hamriik iha neʼebá.
31 Tuirmai ema Kus neʼe toʼo+ no dehan: “Haʼu-nia naʼi liurai, simu lia-menon neʼe bá: Ohin Jeová hatudu ona justisa hodi halo Ita-Boot livre husi ema hotu neʼebé kontra Ita.”+
32 Maibé liurai husu ba ema Kus neʼe: “Haʼu-nia oan-mane Absalão diʼak ka lae?” Ema Kus neʼe hatán: “Haʼu hein katak haʼu-nia naʼi liurai nia inimigu hotu no mós ema hotu neʼebé kontra Ita hodi halo aat ba Ita sei sai hanesan mane joven neʼe!”+
33 Liafuan neʼe halo liurai neon-susar, no nia saʼe ba kuartu iha portaun nia leten no tanis, no nuʼudar nia laʼo nia dehan: “Haʼu-nia oan Absalão, haʼu-nia oan Absalão! Diʼak liu haʼu mak mate duké ó, haʼu-nia oan Absalão, haʼu-nia oan!”+
Nota-rodapé
^ Orj., “la fó laran”.
^ Neʼe mak oan husi kuda-burru aman no kuda-inan.
^ Orj., “tabele entre lalehan no rai”.
^ Orj., “haʼu tetu iha haʼu-nia liman laran”.
^ Ka karik “diman”. Orj., “ai”.
^ Orj., “distritu”.
^ Orj., “sira neʼebé hiʼit ona sira-nia liman”.
^ Orj., “Ita-nia atan”.
