Apóstolu 16:1-40
16 Entaun, Paulo toʼo Derbe no Listra.+ Dixípulu ida naran Timóteo+ hela iha neʼebá. Timóteo nia inan mak ema Judeu ida neʼebé fiar-naʼin, maibé ninia aman ema Gregu,
2 no maluk fiar-naʼin sira iha Listra no Ikónio koʼalia diʼak kona-ba nia.
3 Paulo dehan katak nia hakarak atu Timóteo laʼo hamutuk ho nia. Paulo lori nia no fó sirkunsizaun* ba nia tanba ema Judeu sira iha fatin sira neʼebá,+ tanba ema hotu hatene katak ninia aman mak ema Gregu.
4 Bainhira sira laʼo liu sidade oioin, sira fó sai ba maun-alin sira iha fatin sira-neʼe atu halo tuir ukun-fuan neʼebé apóstolu no katuas sira deside ona iha Jeruzalein.+
5 Tan neʼe, kongregasaun sira-nia fiar kontinua sai metin liután no loron ba loron fiar-naʼin sira aumenta ba beibeik.
6 Depois neʼe, sira laʼo liuhusi Fríjia no área Galásia,+ tanba espíritu santu bandu sira atu labele haklaken Maromak nia liafuan iha provínsia Ázia.
7 Kuandu sira toʼo Mízia, sira koko atu laʼo ba Bitínia,+ maibé Jesus nia espíritu la husik sira bá neʼebá.
8 Entaun, sira laʼo liu Mízia no tun ba Tróade.
9 Iha kalan Paulo hetan vizaun no nia haree ema Masedónia ida hamriik iha ninia oin hodi husu nia dehan: “Hakat liu mai Masedónia no ajuda ami.”
10 Depois nia haree tiha vizaun neʼe, ami bá kedas Masedónia tanba ami hatene katak Maromak bolu ona ami atu haklaken liafuan diʼak ba sira.
11 Entaun, ami saʼe ró husi Tróade no bá loos deʼit toʼo Samotrásia, no loron tuirmai ami toʼo iha Neápolis.
12 No husi neʼebá ami bá Filipe,+ sidade* Roma nian. Sidade neʼe mak sidade importante liu iha área Masedónia. Ami hela iha sidade neʼe ba loron balu.
13 Iha loron Sábadu ami laʼo sai ba sidade nia portaun besik mota ninin, tanba ami rona katak iha neʼebá iha fatin atu ema halo orasaun, no ami tuur no hahú koʼalia ba feto sira neʼebé halibur ona iha neʼebá.
14 No iha feto ida naran Lídia neʼebé faʼan hena kór-violeta, nia husi sidade Tiatira+ no nia hamtaʼuk Maromak. Feto neʼe rona no Jeová* loke nia laran atu simu Paulo nia liafuan.
15 Kuandu nia no ninia umakain hetan batizmu,+ nia husu ami ho laran-manas dehan: “Se imi haree haʼu nuʼudar ema neʼebé laran-metin ba Jeová,* mai no hela iha haʼu-nia uma.” No nia hakaʼas ami atu bá ninia uma.
16 Loron ida kuandu ami laʼo daudaun ba fatin orasaun nian, atan-feto ida hasoru ami, no anju aat ida mak domina nia no halo nia bele siʼik futuru.+ Liuhusi ida-neʼe mak ninia naʼi sira hetan osan barak.
17 Feto neʼe kontinua laʼo tuir Paulo no mós ami, no nia hakilar dehan: “Ema sira-neʼe mak Maromak neʼebé Aas Liu Hotu+ nia atan, sira haklaken ba imi kona-ba dalan atu hetan salvasaun.”
18 Feto neʼe halo nuneʼe ba loron barak. Ikusmai, Paulo sai baruk ona ho ida-neʼe, tan neʼe nia fila oin no dehan ba anju aat neʼe: “Hodi Jesus Kristu nia naran, haʼu haruka ó atu sai husi feto neʼe.” Iha oras neʼe kedas anju aat neʼe sai husi nia.+
19 Kuandu feto neʼe nia naʼi sira haree katak sira la iha ona esperansa atu hetan osan liuhusi atan-feto neʼe,+ sira kaer Paulo no Silas no lori sira ba ukun-naʼin sira iha merkadu.+
20 Bainhira lori tiha sira ba majistradu tribunál* sira, ema sira-neʼe dehan: “Mane sira-neʼe halo runguranga iha ita-nia sidade.+ Sira mak ema Judeu,
21 no sira hanorin lisan sira neʼebé ita labele halo tuir, tanba ita mak ema Roma.”
22 No ema-lubun hotu koʼalia ho hirus hasoru sira. No depois lees tiha Paulo no Silas nia roupa, majistradu tribunál sira-neʼe haruka ema atu baku sira ho ai.+
23 Bainhira baku tiha sira ba dala barak, sira hatama Paulo no Silas ba komarka no haruka guarda tau matan didiʼak atu nuneʼe sira labele halai lakon.+
24 Tanba guarda neʼe hetan mandamentu neʼe, entaun nia hatama sira iha fatin neʼebé seguru liu iha komarka laran no xave metin sira-nia ain.*
25 Maibé iha kalan fahe-rua, Paulo no Silas halo orasaun no hahiʼi Maromak ho knananuk,+ no ema iha komarka laran rona ba sira.
26 Derrepente deʼit rai nakdoko makaʼas iha komarka neʼe toʼo uma nia fundasaun mós nakdoko. Liután neʼe, odamatan hotu nakloke kedas, no korrente neʼebé kesi hela ema dadur hotu namkore.+
27 Kuandu guarda komarka nian hadeer no haree katak odamatan sira nakloke tiha ona, nia losu ninia surik atu oho an, tanba nia hanoin katak dadur sira halai tiha ona.+
28 Maibé Paulo hakilar ho lian makaʼas dehan: “Keta oho an, tanba ami hotu iha neʼe!”
29 Entaun, nia husu ahi-oan no halai tama ba laran, no tanba nia nakdedar, nia hakneʼak iha Paulo no Silas nia oin.
30 Nia lori sira sai no dehan: “Señór sira, saida mak haʼu tenke halo atu hetan salvasaun?”
31 Sira hatán: “Tau fiar ba Naʼi Jesus, no ó hamutuk ho ó-nia umakain sei hetan salvasaun.”+
32 No sira fó sai Jeová* nia liafuan ba nia hamutuk ho sira hotu neʼebé iha ninia umakain.
33 Iha oras neʼe kuandu rai kalan hela, nia lori sira bá fatin ida atu fase sira-nia kanek. Tuirmai, guarda neʼe no ninia família tomak hetan batizmu iha momentu neʼe kedas.+
34 Nia lori sira bá ninia uma no prepara ai-han iha meza, no nia haksolok tebes hamutuk ho ninia umakain tomak tanba agora nia tau fiar ona ba Maromak.
35 Kuandu rai loron ona, majistradu tribunál sira haruka guarda sira atu dehan: “Husik ema sira-neʼe livre.”
36 Entaun guarda komarka nian lori sira-nia lia-menon ba Paulo no dehan: “Majistradu tribunál sira haruka ema mai atu husik imi naʼin-rua livre. Entaun, sai mai liʼur no laʼo bá ho dame.”
37 Maibé Paulo dehan ba sira: “Sira baku ami iha ema hotu nia oin, no hatama ami iha komarka maski ami mak ema Roma+ no la iha sala.* Agora sira hakarak atu hasai ami subasubar deʼit ka? Neʼe labele! Husik sira mai rasik no lori ami sai.”
38 Entaun guarda bá fó-hatene Paulo nia liafuan ba majistradu tribunál sira. Kuandu sira rona katak ema sira-neʼe mak ema Roma, sira sai taʼuk tebes.+
39 Tan neʼe, majistradu tribunál sira mai no husu deskulpa ba Paulo no Silas, no bainhira lori sai tiha sira, ema sira-neʼe husu sira atu husik sidade neʼe.
40 Maibé kuandu Paulo no Silas sai husi komarka, sira laʼo ba Lídia nia uma. No bainhira sira haree maun-alin sira, sira naʼin-rua fó aten-brani ba maun-alin sira-neʼe+ no tuirmai sira sai husi sidade neʼe.
