Juís 17:1-13
-
Miqueias nia estátua sira no amlulik (1-13)
17 Iha mane ida iha Efraim nia área foho nian,+ ninia naran mak Miqueias.
2 Nia hatete ba ninia inan: “Uluk ema naʼok osan-mutin 1.100 husi Ita no haʼu rona Ita fó-malisan ba naʼok-teen neʼe. Osan-mutin neʼe iha hela haʼu. Haʼu mak foti.” Ho ida-neʼe, ninia inan hatete: “Haʼu hein katak Jeová sei haraik bensaun ba haʼu-nia oan-mane.”
3 Entaun nia fó fali osan-mutin 1.100 neʼe ba ninia inan, maibé ninia inan hatete: “Haʼu sei halo santu haʼu-nia osan-mutin neʼe ba Jeová. Haʼu hakarak ó uza neʼe atu bahat estátua ida no halo estátua ida husi besi.+ Agora haʼu entrega osan-mutin neʼe ba ó.”
4 Bainhira nia fó fali tiha osan-mutin sira-neʼe ba ninia inan, ninia inan foti osan-mutin 200 no fó ba badaen osan-mutin nian. Badaen neʼe bahat estátua ida no halo estátua ida husi besi, no tau estátua sira-neʼe iha Miqueias nia uma.
5 Miqueias iha uma ida ba maromak sira, no nia halo efod*+ no estátua terafín sira*+ no ordena ninia oan-mane ida* hodi sai nuʼudar amlulik ba nia.+
6 Iha tempu neʼebá, la iha liurai ida iha Izraél.+ Ema ida-idak halo tuir deʼit buat neʼebé sira hakarak.*+
7 Iha tempu neʼe, iha mane joven ida husi Belein+ iha rai-Judá, no mane neʼe husi Judá nia família.* Nia mak ema Levi ida+ neʼebé hela ona iha neʼebá ba tempu balu.
8 Mane neʼe husik sidade Belein iha rai-Judá hodi bá buka fatin ida atu hela. Nuʼudar nia halo hela ninia viajen, nia toʼo iha Efraim nia área foho nian, no nia bá Miqueias nia uma.+
9 Tuirmai Miqueias husu ba nia: “Ó mai husi neʼebé?” Nia hatán: “Haʼu mak ema Levi ida husi Belein iha rai-Judá, no haʼu halo viajen hodi buka fatin ida atu hela.”
10 Entaun Miqueias hatete ba nia: “Hela ho haʼu no sai nuʼudar aman* ida no amlulik ida ba haʼu. No tinan-tinan haʼu sei fó osan-mutin sanulu ba ó no fó roupa balu no ai-han ba ó.” Entaun ema Levi neʼe tama ba uma neʼe.
11 Ho ida-neʼe, mane joven Levi neʼe konkorda atu hela ho Miqueias, no nia sai hanesan Miqueias nia oan-mane ida.
12 Liután neʼe, Miqueias mós fó knaar ba ema Levi neʼe* hodi sai nuʼudar amlulik ida ba nia,+ no nia hela iha Miqueias nia uma.
13 Tuirmai Miqueias hatete: “Agora haʼu hatene katak Jeová sei halo diʼak ba haʼu, tanba ema Levi sai ona haʼu-nia amlulik.”
Nota-rodapé
^ Ka “família nia maromak sira”. Haree “Terafín” iha Glosáriu.
^ Ka “buat neʼebé sira hanoin mak loos”.
^ Karik neʼe katak mane neʼe hela iha rai-Judá.
^ Ka “konsellu-naʼin”.
^ Orj., “halo nakonu ema Levi neʼe nia liman”.
